ఇరాన్‌కు ఇదే చివరి అవకాశం.. ఒప్పందం కుదరకపోతే తీవ్ర చర్యలు: ట్రంప్ హెచ్చరిక |

ANI తెలిపిన వివరాల ప్రకారం… మొదట అమెరికా ఇరాన్‌పై భారీ స్థాయిలో సైనిక దాడికి సిద్ధమైందని, అయితే చివరి నిమిషంలో సౌదీ అరేబియా, యునైటెడ్ అరబ్ ఎమిరేట్స్ (UAE), ఖతర్‌తో పాటు ఇరాన్ కూడా దౌత్యపరమైన చర్చలకు అవకాశం ఇవ్వాలని కోరడంతో ఆ చర్యను తాత్కాలికంగా నిలిపివేసినట్లు ట్రంప్ వెల్లడించారు. రెండో ప్రపంచ యుద్ధం తర్వాత ఎన్నడూ లేని స్థాయిలో దాడి జరిపేందుకు సన్నాహాలు పూర్తయ్యాయని, అయితే పలు దేశాల విజ్ఞప్తులను పరిగణనలోకి తీసుకుని చర్చలకు మరో అవకాశం కల్పించామని చెప్పారు.

ఇరాన్ అభ్యర్థన మేరకే ప్రస్తుతం చర్చలు కొనసాగుతున్నాయని ట్రంప్ పేర్కొన్నారు. ఈ ప్రక్రియకు సౌదీ అరేబియా, యూఏఈ, ఖతర్ మద్దతు ఇస్తున్నాయని, మరికొన్ని దేశాలు కూడా మధ్యవర్తిత్వానికి ముందుకు వచ్చాయని తెలిపారు. అనేక గంటలపాటు అమెరికా, ఇరాన్ ప్రతినిధులు సమావేశాలు నిర్వహించినప్పటికీ, ఇరాన్ మాత్రం చర్చలు జరగడం లేదని బహిరంగంగా చెబుతోందని ఆయన ఆరోపించారు.

అమెరికా ప్రధాన లక్ష్యం ఇరాన్ అణ్వాయుధాలను అభివృద్ధి చేయకుండా నిరోధించడమేనని ట్రంప్ మరోసారి స్పష్టం చేశారు. గత 50 ఏళ్లుగా ఈ సమస్యను పరిష్కరించడంలో పూర్వ ప్రభుత్వాలు, ఇతర దేశాలు విఫలమయ్యాయని, ఇప్పుడు దానికి ముగింపు పలకాల్సిన సమయం వచ్చిందన్నారు.

ఇరాన్ అణు సామర్థ్యంపై అమెరికా గతంలో చేపట్టిన సైనిక చర్యలను కూడా ట్రంప్ ప్రస్తావించారు. ఏడాదికిపైగా క్రితం బీ-2 బాంబర్ విమానాలతో నిర్వహించిన దాడుల వల్ల ఇరాన్ అణు సామర్థ్యానికి గణనీయమైన దెబ్బ తగిలిందని ఆయన పేర్కొన్నారు. ఆ చర్యతో అమెరికా తన లక్ష్యంలో విజయవంతమైందని వ్యాఖ్యానించారు.

అంతకుముందు ట్రూత్ సోషల్ వేదికగా చేసిన పోస్టులో కూడా ట్రంప్ ఇరాన్ నాయకత్వంపై తీవ్ర విమర్శలు గుప్పించారు. అమెరికాతో చర్చలు కోరుతూ, అదే సమయంలో అలాంటి చర్చలు లేవని బహిరంగంగా చెప్పడం ద్వంద్వ వైఖరికి నిదర్శనమని ఆరోపించారు. అలాగే ఇరాన్ ఎట్టి పరిస్థితుల్లోనూ అణ్వాయుధాన్ని సొంతం చేసుకోదని పునరుద్ఘాటించారు. హోర్ముజ్ జలసంధిపై ఒప్పందం కుదిరే వరకు లేదా పూర్తి లొంగుబాటు జరిగే వరకు అమెరికాకు పూర్తి నియంత్రణ కొనసాగుతుందని కూడా పేర్కొన్నారు.

అయితే ట్రంప్ వ్యాఖ్యలను ఇరాన్ విదేశాంగ మంత్రిత్వ శాఖ ప్రతినిధి ఎస్మాయిల్ బఘాయీ ఖండించారు. అమెరికాతో ప్రత్యక్షంగానీ, పరోక్షంగానీ ఎలాంటి ద్వైపాక్షిక చర్చలు జరగడం లేదని స్పష్టం చేశారు. అలాగే హోర్ముజ్ జలసంధి ద్వారా కొత్త సముద్ర మార్గంపై ఒమాన్‌తో కుదిరిన అవగాహన కేవలం నౌకల భద్రత కోసం రూపొందించిన సాంకేతిక ఏర్పాటే తప్ప, వ్యూహాత్మక జలమార్గాన్ని తిరిగి పూర్తిస్థాయిలో తెరిచినట్లుగా భావించరాదని వివరించారు.

ఇదిలా ఉండగా, అదే కార్యక్రమంలో అమెరికా సైనిక కుటుంబాలకు మరింత మద్దతు అందించేందుకు దేశ చరిత్రలో తొలిసారిగా ప్రెసిడెన్షియల్ మిలిటరీ స్పౌస్ కమిషన్ ఏర్పాటు చేస్తూ ట్రంప్ కార్యనిర్వాహక ఉత్తర్వుపై సంతకం చేశారు. సైనికుల కుటుంబాల సంక్షేమాన్ని బలోపేతం చేయడమే ఈ కమిషన్ ప్రధాన లక్ష్యమని ఆయన తెలిపారు.