Success Story: ఢిల్లీ జాబ్‌కు బై-బై.. సొంతూరులో ఆ సూపర్ ఐడియాతో ఏటా రూ. 10 లక్షలు సంపాదన! |

న్యూస్ 18 హిందీ కథనం ప్రకారం బీహార్ రాష్ట్రం సీతామర్హి జిల్లా సోన్‌బర్సా బ్లాక్ పరిధిలోని పరఛయ్యా గ్రామానికి చెందిన సునీల్ కుమార్ గతంలో దేశ రాజధాని ఢిల్లీలోని ఓ ప్రైవేట్ కంపెనీలో ఉద్యోగం చేసేవారు. రోజంతా కష్టపడినా నెలకు కేవలం రూ.12 వేల నుంచి రూ.13 వేల వరకు మాత్రమే జీతం వచ్చేది. తక్కువ ఆదాయం, నగర జీవితంలోని ఒత్తిడి కారణంగా ఆయన ఆ ఉద్యోగాన్ని వదిలి స్వగ్రామానికి వెళ్లాలని నిర్ణయించుకున్నారు.

గ్రామానికి తిరిగి వచ్చిన తర్వాత ఉద్యోగాల కోసం తిరగకుండా, స్వయం ఉపాధి దిశగా అడుగులు వేశారు. నాలుగేళ్ల క్రితం డెయిరీ ఫార్మింగ్ ప్రారంభించి పశుపోషణను జీవనోపాధిగా ఎంచుకున్నారు. ప్రారంభంలో అనేక సవాళ్లు ఎదురైనా వెనుకడుగు వేయకుండా కష్టపడి వ్యాపారాన్ని అభివృద్ధి చేశారు.

ప్రస్తుతం సునీల్ నిర్వహిస్తున్న డెయిరీ ఫారంలో మొత్తం 40 పశువులు ఉన్నాయి. వీటిలో ఆవులు, గేదెలు రెండూ ఉన్నాయి. ప్రస్తుతం 18 ఆవులు పాలిస్తున్నాయి. దీంతో రోజుకు సుమారు 100 నుంచి 120 లీటర్ల పాలను స్థానిక మార్కెట్‌లో విక్రయిస్తున్నారు. పశువుల ఆహారం, ఆరోగ్యం, పరిశుభ్రత విషయంలో ప్రత్యేక శ్రద్ధ తీసుకోవడం వల్ల నాణ్యమైన పాలు లభిస్తున్నాయని ఆయన చెబుతున్నారు.

వాతావరణ పరిస్థితులు అనుకూలంగా ఉన్న సమయంలో 25 నుంచి 30 ఆవులు ఒకేసారి పాలిస్తే రోజువారీ పాల ఉత్పత్తి 150 నుంచి 170 లీటర్ల వరకు పెరుగుతుందని తెలిపారు. దీంతో ఆదాయం కూడా మరింత పెరుగుతోందని చెప్పారు.

ఈ డెయిరీ వ్యాపారం ద్వారా ప్రస్తుతం సునీల్ సంవత్సరానికి రూ.8 నుంచి రూ.10 లక్షల వరకు ఆదాయం పొందుతున్నారు. ఢిల్లీలోని తక్కువ జీతం ఉద్యోగాన్ని వదిలి గ్రామంలోనే స్వయం ఉపాధి ప్రారంభించిన ఆయన నిర్ణయం ఆర్థికంగా ఎంతో లాభదాయకంగా మారింది.

వ్యవసాయం, పశుపోషణను ఆధునిక పద్ధతుల్లో నిర్వహిస్తే గ్రామంలోనే మంచి ఆదాయం సంపాదించవచ్చని సునీల్ విజయగాథ నిరూపిస్తోంది. ఉపాధి కోసం నగరాలకు వెళ్లాల్సిన అవసరం లేకుండా, సరైన ప్రణాళికతో గ్రామాల్లోనే స్వయం ఉపాధి అవకాశాలను సృష్టించుకోవచ్చని ఆయన ఉదాహరణ చెబుతోంది. ప్రస్తుతం ఆయన విజయాన్ని చూసి స్థానిక యువత కూడా డెయిరీ ఫార్మింగ్ వైపు ఆసక్తి చూపుతున్నట్లు తెలుస్తోంది.