Last Updated:
హీరో విజయ్ దేవరకొండ కెరీర్‌లోనే అత్యంత ప్రతిష్టాత్మకమైన సినిమాగా ‘రణబాలి’ భారీ అంచనాల నడుమ ప్రేక్షకుల ముందుకు వచ్చింది. మరి తొలిరోజు ఈ సినిమా వసూళ్లు ఎలా ఉన్నాయో చూద్దామా..
టాలీవుడ్ సెన్సేషనల్ హీరో విజయ్ దేవరకొండ కెరీర్‌లోనే అత్యంత కీలకమైన ప్రతిష్టాత్మకమైన సినిమాగా ‘రణబాలి’ భారీ అంచనాల నడుమ ప్రేక్షకుల ముందుకు వచ్చింది. ‘టాక్సీవాలా’ లాంటి బ్లాక్ బస్టర్ తర్వాత మళ్లీ ఆ స్థాయి మాస్, కమర్షియల్ హిట్ కోసం చాలా కాలంగా విజయ్ ఎదురుచూస్తున్నాడు. గత చిత్రాలు ఆశించిన స్థాయిలో రాణించకపోవడంతో తన పాత లెక్కలన్నీ ఈ సినిమాతో సరిచేసుకోవాలనే కసితో, దసరా పండుగ కానుకగా అక్టోబర్ 16న ఈ చిత్రాన్ని భారీ ఎత్తున థియేటర్లలో విడుదల చేశారు. ప్రస్తుతం సినీ వర్గాల్లో, అభిమానుల్లో ఈ సినిమా బ్రేక్ ఈవెన్ టార్గెట్, బాక్సాఫీస్ వసూళ్లపై తీవ్ర ఆసక్తి నెలకొంది.
ప్రముఖ నిర్మాణ సంస్థ మైత్రీ మూవీ మేకర్స్ ఏమాత్రం రాజీ పడకుండా సుమారు రూ. 120 కోట్ల భారీ బడ్జెట్‌తో ఈ పీరియాడిక్ వార్ డ్రామాను ఎంతో ప్రతిష్టాత్మకంగా నిర్మించింది. తన కెరీర్‌లో విజయ్ దేవరకొండ మొదటిసారిగా పూర్తిస్థాయి పీరియాడిక్ వార్ బ్యాక్‌డ్రాప్‌లో నటిస్తుండటంతో సినిమాపై మొదటి నుంచే భారీ బజ్ ఏర్పడింది. అయితే, ఈ రేంజ్ బడ్జెట్ సినిమా బాక్సాఫీస్ వద్ద విజయం సాధించాలంటే కలెక్షన్ల పరంగా అద్భుతాలు సృష్టించాల్సి ఉంటుంది. ట్రేడ్ వర్గాల సమాచారం ప్రకారం, ‘రణబాలి’ చిత్రానికి నాన్‌-థియేట్రికల్ హక్కుల రూపంలోనే (ఓటీటీ, శాటిలైట్, ఆడియో హక్కులు) దాదాపు రూ. 60 కోట్ల మేర ముందస్తు రికవరీ జరగడం మేకర్స్‌కు కొంత ఊరటనిచ్చిన విషయం.
మిగిలిన మొత్తాన్ని రికవరీ చేయడంలో థియేట్రికల్ వసూళ్లు అత్యంత కీలకం కానున్నాయి. ఈ సినిమా థియేట్రికల్ బిజినెస్ ప్రపంచవ్యాప్తంగా సుమారు రూ. 60 కోట్ల స్థాయిలో జరిగినట్లు ట్రేడ్ పండితులు లెక్కలు కట్టారు. అంటే, సినిమా క్లీన్ హిట్‌గా నిలవాలన్నా, బయ్యర్లు లాభాల బాట పట్టాలన్నా.. బాక్సాఫీస్ వద్ద కనీసం రూ. 60 కోట్ల షేర్ సాధించాలి. ఇది దాదాపు రూ. 120 కోట్ల గ్రాస్ వసూళ్లకు సమానం. విజయ్ దేవరకొండ మార్కెట్, యూత్‌లో అతనికి ఉన్న ఫాలోయింగ్ దృష్టిలో పెట్టుకుంటే వీకెండ్ వసూళ్లు ఈ లక్ష్యాన్ని చేరుకోవడంలో కీలక పాత్ర పోషిస్తాయి.
ఇక వసూళ్ల విషయానికొస్తే.. ప్రముఖ ట్రేడ్ వెబ్‌సైట్ Sacnilk వెల్లడించిన అధికారిక వివరాల ప్రకారం, ‘రణబాలి’ ఇండియాలో మొదటి రోజు రూ. 9.25 కోట్ల నెట్ కలెక్షన్లు రాబట్టింది. దేశవ్యాప్తంగా 2,515 షోల ద్వారా రూ. 10.75 కోట్ల గ్రాస్ వసూళ్లు సాధించింది. అలాగే ఓవర్సీస్ మార్కెట్‌లో విజయ్‌కి ఉన్న క్రేజ్ దృష్ట్యా మొదటి రోజు రూ. 5.75 కోట్ల గ్రాస్ కలెక్షన్లు వచ్చాయి. దీంతో వరల్డ్‌వైడ్‌గా ‘రణబాలి’ తొలి రోజు మొత్తం రూ. 16.50 కోట్ల గ్రాస్ వసూళ్లను తన ఖాతాలో వేసుకుని డీసెంట్ ఓపెనింగ్స్ దక్కించుకుంది.
కలెక్షన్లతో పాటు థియేటర్లలో ఆక్యుపెన్సీ రేట్ కూడా ఆశాజనకంగానే ఉంది. మొదటి రోజు ఓవరాల్ ఆక్యుపెన్సీ 57 శాతంగా నమోదైంది. ముఖ్యంగా తెలుగు 2డీ వెర్షన్‌కు రాత్రి ఆటలలో (నైట్ షోస్) 67.92 శాతం అద్భుతమైన ఆక్యుపెన్సీ రావడం సినిమాకు ప్లస్ పాయింట్. ఉదయం షోలతో పోలిస్తే సాయంత్రం, రాత్రి షోలకు ప్రేక్షకుల స్పందన మెరుగ్గా ఉంది. ఈ సానుకూల ట్రెండ్ చూస్తుంటే, శని, ఆదివారాల్లో వసూళ్లు భారీగా పెరిగే అవకాశం ఉందని ట్రేడ్ నిపుణులు అంచనా వేస్తున్నారు. ఈ వీకెండ్‌లో ‘రణబాలి’ బాక్సాఫీస్ వద్ద ఎలాంటి మ్యాజిక్ చేస్తుందనేది ఆసక్తికరంగా మారింది.
