1. నా బిడ్డ మధ్యాహ్న భోజన సమయంలో ఎవరితో కూర్చుంటాడు?
ఈ ప్రశ్న ద్వారా పిల్లల స్నేహాలు, సామాజిక ప్రవర్తన గురించి కొంత తెలుసుకోవచ్చు. పిల్లలు ఎవరితో ఎక్కువగా కలుస్తున్నారు, ఎవరితో సౌకర్యంగా ఉంటున్నారు, ఇతర పిల్లలతో సులభంగా కలిసిపోతున్నారా అనే విషయాలను టీచర్స్ చెప్పగలరు. పిల్లవాడు ఒంటరిగా కూర్చుంటే వెంటనే అది సమస్య అని భావించాల్సిన అవసరం లేదు. కొంతమంది పిల్లలు ఒంటరిగా ఉండటాన్ని ఇష్టపడవచ్చు. అయితే ఈ విషయం గురించి టీచర్స్తో మాట్లాడటం ద్వారా పిల్లల సామాజిక ప్రవర్తనను అర్థం చేసుకోవచ్చు.
2. చదువులో కష్టమైన విషయం ఎదురైనప్పుడు నా బిడ్డ ఎలా స్పందిస్తాడు?
ఒక ప్రశ్న అర్థం కాకపోయినా, హోంవర్క్ కష్టంగా అనిపించినా పిల్లలు ఎలా స్పందిస్తారో తెలుసుకోవడం ముఖ్యం. వారు మళ్లీ ప్రయత్నిస్తారా? టీచర్స్‌ని సహాయం అడుగుతారా? లేక ఏమీ మాట్లాడకుండా వదిలేస్తారా? దీని ద్వారా పిల్లల నేర్చుకునే విధానం, సమస్యలను ఎదుర్కొనే తీరు గురించి పేరంట్స్కు అవగాహన వస్తుంది. ఇంట్లో చదువుకునే సమయంలో కూడా వారికి ఎలా సహాయం చేయాలో అర్థమవుతుంది.
3. నా బిడ్డ బాధగా ఉన్నప్పుడు ఎవరితో మాట్లాడతాడు?
పాఠశాలలో పిల్లలు కొన్నిసార్లు బాధపడవచ్చు, భయపడవచ్చు లేదా ఆందోళనకు గురికావచ్చు. అలాంటి సమయంలో వారు తమ సమస్యను ఎవరితో పంచుకుంటున్నారో తెలుసుకోవడం మంచిది. స్నేహితులతో మాట్లాడుతున్నారా? టీచర్‌ను సంప్రదిస్తున్నారా? లేక తమలో తామే ఉండిపోతున్నారా? అనే విషయాలు తెలుసుకోవడం ద్వారా వారి భావోద్వేగ ప్రవర్తనపై పేరంట్స్కు కొంత అవగాహన వస్తుంది.
4. నా బిడ్డ తప్పు చేసినప్పుడు ఎలా స్పందిస్తాడు?
పిల్లలు తప్పు చేసినప్పుడు వారి స్పందన కూడా ముఖ్యమే. కొంతమంది పిల్లలు తమ తప్పును అంగీకరించి సరిదిద్దుకోవడానికి ప్రయత్నిస్తారు. మరికొందరు వెంటనే నిరాశ చెందవచ్చు లేదా ఎవరి సహాయం తీసుకోవడానికి ఇష్టపడకపోవచ్చు. టీచర్స్‌ని ఈ విషయం అడగడం ద్వారా పిల్లలు తప్పులను ఎలా ఎదుర్కొంటున్నారో తెలుసుకోవచ్చు. దీంతో ఇంట్లో కూడా తప్పుల విషయంలో వారిని తిట్టడం కంటే, సమస్యను అర్థం చేసుకుని మాట్లాడే అవకాశం ఉంటుంది.
5. నా బిడ్డ పాఠశాలలో ఇతరులకు సహాయం చేస్తాడా?
పిల్లలు తమ చదువుపైనే దృష్టి పెడుతున్నారా? లేక అవసరమైనప్పుడు తోటి విద్యార్థులకు సహాయం చేస్తున్నారా? అని టీచర్స్‌ని అడగవచ్చు. దీనివల్ల పిల్లల సహకార స్వభావం, ఇతరులతో కలిసి పనిచేసే తీరు గురించి కొంత అవగాహన వస్తుంది. అయితే ఒక సంఘటన ఆధారంగా పిల్లల వ్యక్తిత్వంపై తుది నిర్ణయానికి రావడం సరికాదు. పిల్లల ప్రవర్తనను అర్థం చేసుకోవడానికి టీచర్స్తో నిరంతరం మాట్లాడటం, ఇంట్లో పిల్లలతో ప్రేమగా సంభాషించడం చాలా ముఖ్యం.
మొత్తంగా, PTM అనేది కేవలం మార్కులు తెలుసుకునే మీటింగ్ కాదు. పిల్లల చదువుతో పాటు వారి స్నేహాలు, భావోద్వేగాలు, ప్రవర్తన, సమస్యలను ఎదుర్కొనే విధానం వంటి విషయాలను తెలుసుకునే మంచి అవకాశం. కాబట్టి వచ్చే PTMలో మార్కుల గురించి మాత్రమే కాకుండా, ఇలాంటి ప్రశ్నలు కూడా టీచర్స్‌ను అడగండి. అప్పుడు పాఠశాలలో మీ పిల్లల రోజువారీ జీవితంపై మరింత స్పష్టమైన అవగాహన పొందవచ్చు.
