Last Updated:
స్టాక్ మార్కెట్ లో మల్టీబ్యాగర్ రిటర్న్స్ ఇచ్చిన స్టాక్స్ ఎన్నో కనిపిస్తుంటాయి. అయితే వాటిని సరైన సమయంలో గుర్తించి పెట్టుబడి పెడితే మంచి రాబడి వస్తుంది. అలా భారీ లాభాలు తెచ్చియిపట్టిన ఓ షేరు గురించి ఇప్పుడు చూద్దాం.
స్టాక్ మార్కెట్ లో మల్టీబ్యాగర్ రిటర్న్స్ ఇచ్చిన స్టాక్స్ ఎన్నో కనిపిస్తుంటాయి. అయితే వాటిని సరైన సమయంలో గుర్తించి పెట్టుబడి పెడితే మంచి రాబడి ఉంటుందని నిపుణులు చెబుతున్నారు. ప్రస్తుతం కేంద్ర ప్రభుత్వం ‘ఆత్మనిర్భర్ భారత్’ పథకం కింద రక్షణ రంగానికి ఇస్తున్న ప్రోత్సాహంతో, డిఫెన్స్ స్టాక్స్ అద్భుతమైన లాభాలను అందిస్తున్నాయి. ఇటీవలి కాలంలో అటువంటి అద్భుతమైన పనితీరు కనబరిచిన మల్టీబ్యాగర్ స్టాక్లలో అపోలో మైక్రో సిస్టమ్స్ ఒకటిగా నిలిచింది. ఒకప్పుడు ఇస్రోకు సేవలందించిన ఈ రక్షణ సంస్థ షేర్లు, ఇన్వెస్టర్ల దృష్టిని విశేషంగా ఆకర్షిస్తూ కాసుల వర్షం కురిపిస్తున్నాయి. ఈ రక్షణ రంగ స్టాక్ ఒక సంవత్సరంలో దాదాపు 125 శాతం రాబడిని ఇవ్వగా, ఐదు సంవత్సరాల కాలంలో ఏకంగా 3,250 శాతం కంటే ఎక్కువగా పెరిగి ఇన్వెస్టర్లకు భారీ లాభాలను తెచ్చిపెట్టింది.
తాజాగా అపోలో మైక్రో సిస్టమ్స్ స్టాక్ అకస్మాత్తుగా మళ్లీ ఇంతలా పుంజుకోవడానికి ఒక ప్రధాన కారణం ఉంది. ట్రేడింగ్ గ్యాప్-డౌన్తో ప్రారంభమైనప్పటికీ బలంగా పుంజుకున్న ఈ షేరు, తన భారత నావికాదళ ప్రాజెక్టును విజయవంతంగా పూర్తి చేసినట్లు భారత మార్కెట్ ఎక్స్ఛేంజీలకు తెలియజేయడంతో బుల్స్ దృష్టిని ఆకర్షించింది. ఈ సంస్థ తన సాధారణ వ్యాపార కార్యకలాపాలలో భాగంగా, పూర్తి స్వదేశీ పరిజ్ఞానంతో అభివృద్ధి చేసిన ‘సేఫ్టీ అండ్ డిటోనేషన్ డివైస్’ (SDD)ను భారత నౌకాదళానికి విజయవంతంగా అప్పగించినట్లు తన ఎక్స్ఛేంజ్ ఫైలింగ్లో అధికారికంగా ప్రకటించింది. దీంతో మార్కెట్లో ఈ షేరుకు కొనుగోలుదారుల మద్దతు విపరీతంగా పెరిగింది.
ఈ SDD స్వదేశీ అభివృద్ధికి ముందు, భారత నౌకాదళం ఇలాంటి కీలకమైన పరికరాల కోసం విదేశీ దిగుమతులపైనే ఎక్కువగా ఆధారపడేది. ఇప్పుడు అపోలో మైక్రో సిస్టమ్స్ సాధించిన ఈ స్వదేశీకరణ విజయంతో, భారత నౌకాదళానికి కొనుగోలు ఖర్చులు గణనీయంగా తగ్గడమే కాకుండా, రక్షణ రంగంలో స్వావలంబన (మేక్ ఇన్ ఇండియా) మరింత పెరుగుతుందని భావిస్తున్నారు. ఈ ప్రాజెక్ట్ అప్పగింత విజయవంతం కావడంతో, నౌకాదళం సహా ఇతర రక్షణ విభాగాలు సైతం స్వదేశీ ఆయుధీకరణ పరిష్కారాలను తమ ఆయుధాగారాల్లో క్రమంగా చేర్చుకుంటున్నందున, భవిష్యత్తులో ఈ సంస్థకు ఉత్పత్తి ఆర్డర్లు భారీగా పెరిగే అవకాశం ఉందని కంపెనీ, అలాగే మార్కెట్ వర్గాలు అంచనా వేస్తున్నాయి. దీంతో రాబోయే 5 నుంచి 10 ఏళ్లలో ఈ షేర్లు ఓ రేంజ్ లో పెరిగే అవకాశం ఉంటుందని మార్కెట్ వర్గాలు అంచనా వేస్తున్నాయి.
(Declaimer: ఈ వార్తలోని వివరాలు, విశ్లేషణలు కేవలం సమాచారం కోసం మాత్రమే అందించబడ్డాయి. స్టాక్ మార్కెట్ పెట్టుబడులు ఎల్లప్పుడూ మార్కెట్ నష్టభయాలకు లోబడి ఉంటాయి. మీరు ఏదైనా పెట్టుబడి నిర్ణయం తీసుకునే ముందు రిజిస్టర్డ్ లేదా లైసెన్స్ పొందిన ఆర్థిక సలహాదారుల సహాయం తీసుకోవడం తప్పనిసరి.)
Hyderabad,Hyderabad,Telangana
