త్రిషపై తప్పుడు వ్యాఖ్యలు చేయలేదు.. సీఎం విజయ్ ఒక ‘డమ్మీ’: ఉదయనిధి స్టాలిన్ ఫైర్! |

గత మూడు నెలలుగా ఒక్కో మంత్రి ఏం చేస్తున్నారో ఆధారాలతో సహా తాను ప్రశ్నించానని ఉదయనిధి చెప్పారు. ఆ ప్రశ్నలకు సమాధానం చెప్పే ధైర్యం లేకనే ముఖ్యమంత్రి విజయ్ ఇలాంటి చౌకబారు చర్యలకు పాల్పడుతున్నారని విమర్శించారు. ప్రస్తుత ముఖ్యమంత్రి విజయ్ కేవలం ఒక “డమ్మీ సీఎం” అని, పాలన చేతకాని అసమర్థుడని ధ్వజమెత్తారు. కావేరీ జలాల సమస్యపై తక్షణమే సర్వపక్ష సమావేశం ఏర్పాటు చేయాలని తాను డిమాండ్ చేసినట్లు తెలిపారు. కేవలం రైతుల ప్రయోజనాల కోసమే తాను మాట్లాడానని, ఏ నటి గురించీ తప్పుగా మాట్లాడలేదని తేల్చి చెప్పారు.

ఈ తప్పుడు కేసును న్యాయస్థానంలోనే చట్టపరంగా ఎదుర్కొంటానని ఉదయనిధి ధీమా వ్యక్తం చేశారు. అసెంబ్లీ బడ్జెట్ సమావేశాలు ప్రారంభం కానున్న నేపథ్యంలో డీఎంకే ఎమ్మెల్యేలందరూ తమ పార్టీ అధినేతను కలవనున్నట్లు వెల్లడించారు. విచారణ ముగించుకుని బయటకు వచ్చిన ఉదయనిధికి పోలీస్ స్టేషన్ వెలుపల భారీగా తరలివచ్చిన డీఎంకే కార్యకర్తలు ఘన స్వాగతం పలికారు. ప్రభుత్వం తమ గొంతు నొక్కలేదని పెద్ద ఎత్తున నినాదాలు చేశారు.

మరోవైపు ఈ ఘటనపై నటి మరియా జూలియానా స్పందిస్తూ టీవీకే ప్రభుత్వ తీరును తప్పుపట్టారు. ప్రభుత్వం ప్రజాస్వామ్య హక్కులను అణచివేస్తోందని, ఉదయనిధి వ్యాఖ్యలను కావాలనే వక్రీకరించి బూటకపు కేసు పెట్టారని విమర్శించారు. పూర్తిగా రైతుల డిమాండ్లపై సాగిన ప్రసంగాన్ని రాజకీయం చేయడం తగదని డీఎంకే శ్రేణులు ఆగ్రహం వ్యక్తం చేస్తున్నాయి. న్యాయపోరాటం ద్వారానే ఈ కుట్రలను తిప్పికొడతామని స్పష్టం చేశాయి.