రాహుల్ గాంధీ, మరో ఇద్దరు ఎంపీలపై కేసు నమోదు.. కారణం ఏంటంటే? |

అయోధ్యలోని రామమందిరానికి వచ్చిన విరాళాలను కొందరు స్వామీజీలు దుర్వినియోగం చేస్తున్నారంటూ ప్రతిపక్ష ‘ఇండియా’ కూటమి నేతలు శుక్రవారం పార్లమెంటు ఆవరణలో ఒక నిరసన కార్యక్రమం చేపట్టారు. ఈ క్రమంలో పార్లమెంట్ మకర్ ద్వార్ మెట్ల వద్ద విరాళాల పెట్టెలను ఉంచి వినూత్నంగా నిరసన తెలిపారు. రాహుల్ గాంధీతో సహా పలువురు ఎంపీలు అందులో డబ్బులు వేస్తుండగా, కాషాయ దుస్తులు ధరించి పూజారి వేషంలో ఉన్న పప్పు యాదవ్ ఆ డబ్బును దొంగిలిస్తున్నట్లుగా ఒక ‘స్కిట్’ చేశారు. ఈ నిరసనలో ఎంపీ అవధేష్ ప్రసాద్ కూడా పాల్గొన్నారు. ఈ విధంగా కాషాయ దుస్తులను, సాధువుల సంప్రదాయాన్ని అవహేళన చేశారంటూ పాతాళపురి మఠాధిపతి జగద్గురు బాలక్ దాస్ తదితరులు వారణాసి పోలీసులకు ఫిర్యాదు చేశారు.

రాహుల్ గాంధీ, పప్పు యాదవ్ చేసిన ఈ ప్రదర్శన హిందూ సాధువుల సంప్రదాయాన్ని, శ్రీరాముడిని కించపరిచేలా ఉందని ఫిర్యాదుదారులు మండిపడ్డారు. సనాతన ధర్మాన్ని పాటించే ఎవరూ ఈ చర్యను క్షమించరని జగద్గురు బాలక్ దాస్ ఆగ్రహం వ్యక్తం చేశారు. మరోవైపు ఢిల్లీలోనూ బీజేపీ నాయకులు ఈ ఘటనపై పార్లమెంట్ స్ట్రీట్ పోలీస్ స్టేషన్‌లో ఫిర్యాదు చేశారు. ఈ అంశం ఇప్పుడు రాజకీయంగా పెద్ద దుమారం రేపుతోంది. కాగా, ఇదే నిరసనలో కేంద్ర హోంమంత్రి అమిత్ షా రాజీనామా చేయాలని విపక్షాలు డిమాండ్ చేశాయి.