Dengue Alert: వర్షాకాలంలో డెంగ్యూ ముప్పు.. ఈ లక్షణాలు ఉంటే అస్సలు నిర్లక్ష్యం చేయకండి! | లైఫ్ స్టైల్

ఆయన తెలిపిన ప్రకారం వర్షాకాలంలో వచ్చే సాధారణ సీజనల్ జ్వరం మొదట్లో ఒళ్లు నొప్పులు, తేలికపాటి దగ్గు, గొంతు నొప్పి, అలసట వంటి లక్షణాలతో ప్రారంభమవుతుంది. సరైన విశ్రాంతి తీసుకోవడం, వైద్యుల సూచన మేరకు మందులు వాడటం, తగినంత నీరు తాగడం వల్ల సాధారణంగా రెండు నుంచి మూడు రోజుల్లో జ్వరం తగ్గిపోతుంది. ఈ సమయంలో ఆకలి తగ్గడం కూడా సహజమే. తేలికగా జీర్ణమయ్యే ఆహారం తీసుకోవడం, బయట ఆహారాన్ని నివారించడం, శరీరానికి తగినంత విశ్రాంతి ఇవ్వడం వల్ల త్వరగా కోలుకునే అవకాశం ఉంటుంది.

అయితే జ్వరం తగ్గకుండా కొనసాగితే లేదా శరీర ఉష్ణోగ్రత పదేపదే పెరుగుతూ ఉంటే దానిని నిర్లక్ష్యం చేయకూడదు. అలాంటి పరిస్థితుల్లో డెంగ్యూ లేదా మలేరియా వంటి వ్యాధులు ఉండే అవకాశం ఉంది. ముఖ్యంగా డెంగ్యూ ప్రారంభమైనప్పుడు ఒక్కసారిగా అధిక జ్వరం వస్తుంది. దానితో పాటు తీవ్రమైన తలనొప్పి, కళ్ల వెనుక నొప్పి, కీళ్ల నొప్పులు, కండరాల నొప్పులు, తీవ్రమైన నీరసం వంటి లక్షణాలు కనిపిస్తాయి. కొంతమందిలో వాంతులు, ఆకలి లేకపోవడం కూడా కనిపించవచ్చు.

డెంగ్యూను గుర్తించడంలో ముఖ్యమైన లక్షణాల్లో ఒకటి శరీరంపై చిన్న చిన్న ఎర్రటి దద్దుర్లు లేదా మచ్చలు కనిపించడం. కొందరిలో చిగుళ్ల నుంచి లేదా ముక్కు నుంచి రక్తస్రావం కూడా జరగవచ్చు. ఇలాంటి లక్షణాలు కనిపిస్తే ఆలస్యం చేయకుండా వైద్యుడిని సంప్రదించాలి. డెంగ్యూ ఉందో లేదో నిర్ధారించడానికి వైద్యులు అవసరమైన రక్త పరీక్షలు చేయిస్తారు. స్వయంగా మందులు వాడటం లేదా యాంటీబయోటిక్స్ తీసుకోవడం మంచిది కాదు.

డెంగ్యూ వచ్చినప్పుడు శరీరంలో నీటి శాతం తగ్గే అవకాశం ఉంటుంది. అందుకే ఎక్కువగా నీరు, కొబ్బరి నీరు, ఓఆర్‌ఎస్ ద్రావణం, పండ్ల రసాలు వంటి ద్రవాలు తీసుకోవాలి. తేలికగా జీర్ణమయ్యే పోషకాహారం తీసుకోవడం కూడా అవసరం. ప్లేట్‌లెట్ కౌంట్ తగ్గిందని భయపడకుండా, వైద్యుల సూచనల ప్రకారం చికిత్స తీసుకోవాలి. క్రమం తప్పకుండా పరీక్షలు చేయించుకుంటూ ఆరోగ్య పరిస్థితిని పరిశీలించుకోవాలి.

డెంగ్యూ నుంచి కోలుకుంటున్న సమయంలో కూడా పూర్తిగా విశ్రాంతి తీసుకోవడం చాలా ముఖ్యం. జ్వరం తగ్గిందని వెంటనే సాధారణ పనుల్లోకి వెళ్లకూడదు. శరీరానికి పూర్తిగా బలం వచ్చే వరకు పోషకాహారం తీసుకుంటూ, ఎక్కువగా ద్రవాలు తాగాలి. పండ్లు, ఆకుకూరలు, ప్రోటీన్ ఎక్కువగా ఉండే ఆహారం తీసుకోవడం వల్ల శరీరం త్వరగా కోలుకుంటుంది. వైద్యుడు సూచించిన మందులను పూర్తి కోర్సు వరకు వాడాలి. వర్షాకాలంలో దోమల నివారణ కూడా చాలా అవసరం. ఇంటి పరిసరాల్లో నీరు నిల్వ ఉండకుండా చూడాలి.

చేతులు కవర్ అయ్యేలా దుస్తులు ధరించడం, దోమతెరలు ఉపయోగించడం, దోమల నివారణ మందులు వాడడం వంటి జాగ్రత్తలు తీసుకుంటే డెంగ్యూ ప్రమాదాన్ని చాలా వరకు తగ్గించుకోవచ్చు. disclaimer: జ్వరం మూడు రోజుల కంటే ఎక్కువ కొనసాగినా, అధిక జ్వరం, తీవ్రమైన ఒళ్లు నొప్పులు, దద్దుర్లు, రక్తస్రావం లేదా తీవ్రమైన నీరసం వంటి లక్షణాలు కనిపించిన వెంటనే వైద్యుడిని సంప్రదించాలి. స్వయంగా మందులు వాడకుండా, వైద్యుల సలహా మేరకే చికిత్స తీసుకోవడం ఆరోగ్యానికి సురక్షితం.