జియోస్పేషియల్ మ్యాప్స్‌లో ఏమేం చూడొచ్చు?
ఈ ప్లాట్‌ఫామ్‌లో అందుబాటులో ఉన్న జియోస్పేషియల్ మ్యాప్స్ ద్వారా వినియోగదారులు తమ ప్రాంతంలోని నెట్‌వర్క్ పనితీరును తెలుసుకోవచ్చు.
– సెల్యులార్ నెట్‌వర్క్, ఫిక్స్‌డ్ బ్రాడ్‌బ్యాండ్ సేవలకు సంబంధించిన టెస్ట్ ఫలితాలను విడివిడిగా చూడొచ్చు.
– సర్వీస్ ప్రొవైడర్, టెక్నాలజీ ఆధారంగా ఫలితాలను వేరు చేసి తెలుసుకోవచ్చు.
– డౌన్‌లోడ్ స్పీడ్, అప్‌లోడ్ స్పీడ్ వంటి వివరాలను పరిశీలించవచ్చు.
– మ్యాప్‌ను జూమ్ చేసి తమ ప్రాంతంలో ఇతర వినియోగదారులు చేసిన నెట్‌వర్క్ టెస్టుల వివరాలను చూడొచ్చు.
– ఫిల్టర్లు, లెజెండ్స్, సపోర్టింగ్ టేబుల్స్ ఉపయోగించి ఫలితాలను సులభంగా అర్థం చేసుకోవచ్చు.
– అవసరమైతే రిపోర్టులను డౌన్‌లోడ్ చేసుకోవచ్చు.
యూజర్లు ఒక నిర్దిష్ట ప్రాంతంలో నిర్వహించిన నెట్‌వర్క్ టెస్టుల ఆధారంగా పర్సంటైల్ విలువలను కూడా ఈ ప్లాట్‌ఫామ్ చూపిస్తుంది.
P50 (మీడియన్ స్పీడ్): నిర్వహించిన మొత్తం టెస్టుల్లో సగం టెస్టులలో ఈ స్పీడ్ లేదా అంతకంటే ఎక్కువ స్పీడ్ నమోదైందని అర్థం.
P80 (మొబైల్ బ్రాడ్‌బ్యాండ్): నిర్వహించిన టెస్టుల్లో 80 శాతం టెస్టులలో ఈ స్పీడ్ లేదా అంతకంటే ఎక్కువ స్పీడ్ నమోదైంది.
P90 (ఫిక్స్‌డ్ బ్రాడ్‌బ్యాండ్): నిర్వహించిన టెస్టుల్లో 90 శాతం టెస్టులలో ఈ స్పీడ్ లేదా అంతకంటే ఎక్కువ స్పీడ్ వచ్చింది.
అయితే, యూజర్లు స్వయంగా చేసిన టెస్టుల ఆధారంగా లెక్కించిన ఈ గణాంకాలు నెట్‌వర్క్ నాణ్యతకు పూర్తి స్థాయి అంచనా కాదని ట్రాయ్ స్పష్టం చేసింది. ప్రామాణిక పద్ధతిలో నిర్వహించే సమగ్ర నెట్‌వర్క్ పరీక్షలకు ఇవి ప్రత్యామ్నాయం కావు. అయినప్పటికీ, తమ ప్రాంతంలో ఇతర వినియోగదారులకు ఎలాంటి నెట్‌వర్క్ అనుభవం ఎదురవుతోందో తెలుసుకోవడానికి ఇవి ఉపయోగపడతాయి. అలాగే, ట్రాయ్ స్వతంత్రంగా నిర్వహించిన డ్రైవ్ టెస్టుల ఫలితాలను కూడా మ్యాప్‌లో చూడొచ్చు. ఈ రెండు రకాల డేటాను ఒకేచోట అందించడం వల్ల వివిధ ప్రాంతాల్లో నెట్‌వర్క్ పరిస్థితిపై స్పష్టత వస్తుంది.
వినియోగదారులకు మరింత ఉపయోగం
ఈ కొత్త ప్లాట్‌ఫామ్‌తో వినియోగదారులు స్పామ్ కాల్స్, మెసేజ్‌లపై ఫిర్యాదు చేయడంతో పాటు తమ ఇంటర్నెట్ స్పీడ్‌ను కూడా పరీక్షించుకోవచ్చు. ట్రాయ్‌కు చెందిన యాప్స్, వెబ్ ఇంటర్‌ఫేస్, ఇండిపెండెంట్ డ్రైవ్ టెస్టుల నుంచి సేకరించిన సమాచారాన్ని ఒకచోట చేర్చి నెట్‌వర్క్ అనుభవ్ డ్యాష్‌బోర్డ్‌లో అందుబాటులో ఉంచారు. దీంతో వినియోగదారులు తమ ప్రాంతంలో ఇతరులు చేసిన టెస్టుల ఫలితాలను చూసి నెట్‌వర్క్ పనితీరును అంచనా వేసుకోవచ్చు.
ఈ ప్లాట్‌ఫామ్ కేవలం వినియోగదారులకే కాకుండా టెలికాం కంపెనీలకు కూడా ఉపయోగపడుతుంది. సురక్షితమైన వెబ్ ఇంటర్‌ఫేస్ ద్వారా టెలికాం సర్వీస్ ప్రొవైడర్లు (TSPs) వినియోగదారులు చేసిన కాల్ క్వాలిటీ, నెట్‌వర్క్ కవరేజ్, ఇంటర్నెట్ స్పీడ్ టెస్టుల వివరాలను చూడొచ్చు. ఈ డేటాలో టెస్ట్ చేసిన ప్రాంతం, తేదీ, సమయం, టెక్నికల్ పారామీటర్ల వివరాలు కూడా ఉంటాయి. వీటి ఆధారంగా నెట్‌వర్క్ సమస్యలు ఎక్కువగా ఉన్న ప్రాంతాలను కంపెనీలు గుర్తించవచ్చు. ఆ ప్రాంతాల్లో మరింత విశ్లేషణ చేసి నెట్‌వర్క్ పనితీరును మెరుగుపర్చేందుకు చర్యలు తీసుకోవచ్చు. ట్రాయ్ కూడా ఈ డేటాను ఉపయోగించుకోనుంది. వినియోగదారులకు ఎదురవుతున్న నెట్‌వర్క్ సమస్యలను వాస్తవ గణాంకాల ఆధారంగా పర్యవేక్షించవచ్చు. నెట్‌వర్క్ పనితీరును మెరుగుపర్చేందుకు అవసరమైన నిర్ణయాలు తీసుకోవచ్చు.
మైస్పీడ్ ఎస్‌డీకే ద్వారా మరిన్ని యాప్స్‌కు అవకాశం
ట్రాయ్ తీసుకొచ్చిన మైస్పీడ్ ఎస్‌డీకే (MySpeed SDK) మరో ముఖ్యమైన ఫీచర్. దీని ద్వారా అర్హత ఉన్న థర్డ్ పార్టీ యాప్స్ కూడా ఇంటర్నెట్ కనెక్టివిటీని కొలిచే సదుపాయాన్ని తమ యాప్స్‌లో చేర్చుకోవచ్చు. ఇలా మరిన్ని యాప్స్‌లో ఈ సదుపాయం అందుబాటులోకి వస్తే ఎక్కువ మంది వినియోగదారులు నెట్‌వర్క్ టెస్టులు చేసే అవకాశం ఉంటుంది. ఫలితంగా ప్లాట్‌ఫామ్‌లో వాస్తవ పరిస్థితులకు సంబంధించిన డేటా మరింత పెరుగుతుంది. దీనివల్ల నెట్‌వర్క్ పనితీరుపై మరింత విస్తృతమైన సమాచారం అందుతుంది.
డీఎన్‌డీ సేవలు ఇక వెబ్‌సైట్‌లోనే
నెట్‌వర్క్ అనుభవ్ పోర్టల్ ద్వారా డీఎన్‌డీ (Do Not Disturb) సేవలను కూడా వెబ్‌సైట్‌లోనే ఉపయోగించుకోవచ్చు.
దీని ద్వారా వినియోగదారులు:
– కమర్షియల్ కాల్స్, మెసేజ్‌లకు సంబంధించి తమకు ఎలాంటి సమాచారం రావాలో ప్రాధాన్యతలను ఎంచుకోవచ్చు.
– అనవసరమైన కమర్షియల్ కాల్స్, మెసేజ్‌లపై ఫిర్యాదు చేయొచ్చు.
– ఫిర్యాదు చేసిన తర్వాత దాని స్టేటస్‌ను ట్రాక్ చేయొచ్చు.
– మొత్తం ఫిర్యాదుల వివరాలతో పాటు టెలికాం కంపెనీల వారీగా నమోదైన ఫిర్యాదులను కూడా చూడొచ్చు.
ఈ సందర్భంగా ట్రాయ్ ఛైర్మన్ అనిల్ కుమార్ లహోటి మాట్లాడుతూ.. నెట్‌వర్క్ అనుభవ్ ప్లాట్‌ఫామ్ ద్వారా వినియోగదారులు, ట్రాయ్ నిర్వహించిన నెట్‌వర్క్ టెస్టుల వివరాల్లో మరింత పారదర్శకత వస్తుందని చెప్పారు. తమ ప్రాంతం, సర్వీస్ ప్రొవైడర్ ఆధారంగా నెట్‌వర్క్ టెస్టుల ఫలితాలను వినియోగదారులు స్వయంగా విశ్లేషించుకోవచ్చని తెలిపారు. నెట్‌వర్క్‌లో మెరుగుదల అవసరమైన ప్రాంతాలను టెలికాం కంపెనీలు గుర్తించేందుకు కూడా ఈ ప్లాట్‌ఫామ్ ఉపయోగపడుతుందని వివరించారు. నెట్‌వర్క్ పనితీరును మెరుగుపర్చేందుకు ట్రాయ్ చేస్తున్న ప్రయత్నాలకు ఇది మరింత బలాన్నిస్తుందని పేర్కొన్నారు. యూజర్లు క్రమం తప్పకుండా ట్రాయ్ మైస్పీడ్ (MySpeed), మైకాల్ (MyCall) యాప్స్ ద్వారా నెట్‌వర్క్ టెస్టులు చేసి తమ వంతు సహకారం అందించాలని ట్రాయ్ కోరింది. ఎక్కువ మంది ఈ టెస్టుల్లో పాల్గొంటే ప్లాట్‌ఫామ్‌లో లభించే సమాచారం మరింత విస్తృతంగా, ఉపయోగకరంగా మారుతుంది.
నెట్‌వర్క్ అనుభవ్ ప్లాట్‌ఫామ్‌ను ఎలా ఉపయోగించుకోవాలి?
వినియోగదారులు ట్రాయ్ అధికారిక వెబ్‌సైట్ https://anubhav.trai.gov.in ద్వారా ఈ ప్లాట్‌ఫామ్‌ను యాక్సెస్ చేయొచ్చు. మొత్తంగా చూస్తే, నెట్‌వర్క్ అనుభవ్ ప్లాట్‌ఫామ్ ద్వారా తమ ప్రాంతంలో ఏ టెలికాం కంపెనీ నెట్‌వర్క్ ఎలా పనిచేస్తోందో వినియోగదారులు సులభంగా తెలుసుకోవచ్చు. ఇంటర్నెట్ స్పీడ్, కాల్ క్వాలిటీ, నెట్‌వర్క్ కవరేజ్ వంటి అంశాలపై ఇతరుల అనుభవాలను కూడా పరిశీలించవచ్చు. అదే సమయంలో నెట్‌వర్క్ సమస్యలను గుర్తించి వాటిని పరిష్కరించేందుకు టెలికాం కంపెనీలకు, ట్రాయ్‌కు ఈ డేటా ఉపయోగపడుతుంది.
