Last Updated:
US Midterm Elections 2026 Results: అమెరికా అధ్యక్షుడు డొనాల్డ్ ట్రంప్ పాలనకు రెఫరెండంగా మారిన 2026 మధ్యంతర ఎన్నికల (US Midterm Polls 2026) పోలింగ్ ప్రక్రియ అత్యంత ఉత్కంఠభరితంగా కొనసాగుతోంది.
దేశవ్యాప్తంగా వివిధ రాష్ట్రాల్లోని పోలింగ్ కేంద్రాల వద్ద మంగళవారం ఉదయం ఆరు గంటల నుంచే ఓటర్లు బారులు తీరి తమ ఓటు హక్కును వినియోగించుకుంటున్నారు. ఈ ఎన్నికల్లో ప్రధానంగా డెమొక్రాట్లు, రిపబ్లికన్ల మధ్య హోరాహోరీ పోరు నెలకొనగా, సర్వేలన్నీ డెమొక్రాట్ల వైపే మొగ్గు చూపుతున్నట్లు వార్తలు వెలువడుతున్నాయి. అధ్యక్షుడు ట్రంప్ రెండవసారి అధికారంలోకి వచ్చిన తర్వాత జరుగుతున్న ఈ ఎన్నికలు ఆయన ప్రభుత్వ విధానాలకు ప్రజాకోర్టుగా మారాయి.
భారతదేశంలో మాదిరిగా కేంద్ర ఎన్నికల సంఘం అమెరికాలో ఉండదు. అమెరికా రాజ్యాంగం ప్రకారం ఎన్నికల నిర్వహణ బాధ్యత పూర్తిగా రాష్ట్రాల చేతుల్లోనే ఉంటుంది. దేశంలోని 50 రాష్ట్రాల్లో వేర్వేరు ఎన్నికల నిబంధనలు, చట్టాలు అమలులో ఉంటాయి. ఓటర్ల నమోదు, పోలింగ్ కేంద్రాల ఏర్పాటు, ఓటింగ్ వేళల నిర్ణయం నుంచి ఓట్ల లెక్కింపు వరకు ప్రతి ప్రక్రియను స్థానిక రాష్ట్ర ప్రభుత్వాలే స్వయంగా నిర్వహిస్తాయి. అమెరికా పౌరసత్వం కలిగి ఉండి, నమోదిత ఓటరుగా ఉన్న పౌరులు మాత్రమే ఈ ఎన్నికల్లో ఓటు వేయడానికి అర్హులు.
అమెరికాలో బ్యాలెట్ విధానంలోనే ఎన్నికలు జరుగుతాయి. చాలా చోట్ల పేపర్ బ్యాలెట్లను పెన్ను లేదా పెన్సిల్‌తో పూరించాల్సి ఉండగా, కొన్ని ప్రాంతాల్లో ఆధునిక ఎలక్ట్రానిక్ స్క్రీన్ల ద్వారా బ్యాలెట్‌ను పూర్తి చేసి, వచ్చిన ప్రింట్‌ను బ్యాలెట్ డ్రాప్ బాక్సుల్లో వేసే సౌకర్యాన్ని కల్పించారు. పోలింగ్ రోజున కేంద్రాలకు రాలేని వారి కోసం, వికలాంగులు, వయోవృద్ధులు, విదేశాల్లో నివసిస్తున్న వారి కోసం ‘మెయిల్-ఇన్’ (ఆబ్సెంటీ బ్యాలెట్) సదుపాయం విస్తృతంగా అందుబాటులో ఉంది. కొన్ని రాష్ట్రాలు సాధారణ ఓటర్లకు కూడా ఇంటి నుంచే ఓటు వేసే అవకాశాన్ని ఇస్తున్నాయి.
ఈసారి మధ్యంతర ఎన్నికల్లో ముందస్తు పోలింగ్ (Early Voting) సరికొత్త రికార్డులను సృష్టించింది. దేశవ్యాప్తంగా మొత్తం 21 కోట్ల మంది ఓటర్లు ఉండగా, పోలింగ్ రోజుకు రెండు రోజుల ముందే దాదాపు 5.5 కోట్ల మంది తమ ఓటు హక్కును ముందస్తుగానే వినియోగించుకున్నట్లు గణాంకాలు వెల్లడిస్తున్నాయి.
అమెరికా ఎన్నికల బ్యాలెట్ కేవలం ప్రజాప్రతినిధుల ఎన్నికకే పరిమితం కాదు. ఒకే బ్యాలెట్‌లో చట్టసభ సభ్యుల ఎంపికతో పాటు ప్రజా ప్రాధాన్యత కలిగిన అనేక స్థానిక, జాతీయ సమస్యలపై ప్రజల అభిప్రాయాన్ని (బ్యాలెట్ మెజర్స్) సేకరిస్తారు. అబార్షన్ హక్కులు, వలస విధానాలు, ఓటరు గుర్తింపు కార్డు నిబంధనలు, స్థానిక పన్నులు వంటి అంశాలపై ఓటర్లు తమ అభిప్రాయాలను నేరుగా బ్యాలెట్ ద్వారా వ్యక్తం చేసే వెసులుబాటు ఇక్కడ ఉంటుంది.
ఎన్నికల రోజు (Election Day) పోలింగ్ పూర్తయిన వెంటనే కౌంటింగ్ ప్రక్రియ ప్రారంభమవుతుంది. బ్యాలెట్లను అధునాతన స్కానర్లతో లేదా మాన్యువల్ పద్ధతిలో లెక్కిస్తారు. మెయిల్-ఇన్ బ్యాలెట్లను ముందుగానే పరిశీలించి సిద్ధం చేసినప్పటికీ, పోలింగ్ ముగిసిన తర్వాతే అన్ని ఫలితాలను క్రోడీకరించి ఎన్నికల అధికారులకు చేరవేస్తారు.
విశాలమైన దేశం, భిన్నమైన సమయ మండలాలు (Time Zones), మెయిల్ బ్యాలెట్ల ధ్రువీకరణల కారణంగా తుది అధికారిక ఫలితాలు వెల్లడి కావడానికి కొన్ని రోజుల సమయం పట్టే అవకాశం ఉంది. అయితే అంతర్జాతీయ వార్తా సంస్థ అయిన ‘అసోసియేటెడ్ ప్రెస్’ (AP) వంటి ప్రధాన మీడియా సంస్థలు స్థానిక పోలింగ్ కేంద్రాలు, కౌంటింగ్ సరళిని విశ్లేషిస్తూ ముందస్తు ఫలితాల ట్రెండ్స్‌ను ఎప్పటికప్పుడు ప్రకటిస్తుంటాయి. మొత్తంగా ఈ ఎన్నికల ఫలితాలు అమెరికా కాంగ్రెస్‌పై ఏ పార్టీ ఆధిపత్యం చెలాయిస్తుందో తేల్చడమే కాకుండా, రాబోయే రెండేళ్ల ట్రంప్ ప్రభుత్వ పాలనా దిశను నిర్దేశించనున్నాయి.
