Last Updated:
మీ స్మార్ట్‌ఫోన్‌లోని ఫొటోలు, జీమెయిల్‌ సందేశాలు, గూగుల్ డ్రైవ్‌లోని వ్యక్తిగత సమాచారాన్ని భద్రపరుస్తున్నారా? అయితే గూగుల్ తీసుకొచ్చిన తాజా ప్రైవసీ పాలసీ మార్పుల గురించి తెలుసుకోవాలి. మీ సమాచారాన్ని కాపాడుకోవడానికి ఎలాంటి సెట్టింగ్స్‌ పరిశీలించాలో తెలుసుకుందాం.
ప్రపంచవ్యాప్తంగా కోట్లాది మంది ఉపయోగించే గూగుల్ సేవలకు సంబంధించి కీలక మార్పు చోటుచేసుకుంది. జీమెయిల్‌, గూగుల్ డ్రైవ్‌, గూగుల్ ఫొటోస్‌లోని సమాచారాన్ని వ్యక్తిగతీకరించిన ప్రకటనల కోసం ఉపయోగించే అవకాశాన్ని గూగుల్ తన తాజా ప్రైవసీ విధానంలో ప్రస్తావించింది. వినియోగదారులు ఈ అనువర్తనాల్లోని సమాచారాన్ని గూగుల్‌కు చెందిన ఇతర సేవలతో పంచుకోవడానికి అనుమతించినప్పుడు ఈ అవకాశం ఉంటుంది. ఆండ్రాయిడ్ అథారిటీ నివేదిక ప్రకారం, ఈ మార్పును అక్టోబర్‌ 16న తీసుకొచ్చారు. గతంలో ఈ సేవల్లోని సమాచారాన్ని వ్యక్తిగతీకరించిన ప్రకటనల కోసం ఉపయోగించబోమని విధానంలో పేర్కొనగా, తాజా నిబంధనల్లో దీనికి మినహాయింపును చేర్చారు. ముఖ్యంగా గూగుల్ పర్సనల్ ఇంటెలిజెన్స్‌, కృత్రిమ మేధ ఆధారిత శోధన సాధనాలకు తమ ఖాతాలను అనుసంధానించే వినియోగదారులపై ఈ మార్పు ప్రభావం చూపే అవకాశం ఉంది.
గూగుల్ పర్సనల్ ఇంటెలిజెన్స్‌ లక్ష్యం వినియోగదారుల అవసరాలు, ఆసక్తులకు అనుగుణంగా సమాధానాలు, సూచనలు అందించడం. ఇందుకోసం అనుమతి పొందిన అనుసంధానిత అనువర్తనాల సమాచారాన్ని ఉపయోగిస్తుంది. ఉదాహరణకు, జీమెయిల్‌ లేదా గూగుల్ ఫొటోస్‌కు అనుమతి ఇచ్చినప్పుడు, గూగుల్ సెర్చ్‌, జెమినీ వినియోగదారుల కార్యకలాపాలు, ఆసక్తులకు సంబంధించిన సమాచారాన్ని ఆధారంగా చేసుకుని మరింత వ్యక్తిగతీకరించిన సమాధానాలు అందించవచ్చు. అయితే, తాజా విధానం ప్రకారం ఈ సమాచారాన్ని కంటెంట్‌ను వ్యక్తిగతీకరించడానికి, అందులో ప్రకటనలను చూపించడానికి కూడా ఉపయోగించే అవకాశం ఉంది. ఇది వినియోగదారుల ప్రైవసీ సెట్టింగులు, సంబంధిత సేవలకు ఇచ్చిన అనుమతులపై ఆధారపడి ఉంటుంది. అంటే ప్రతి ఒక్కరి జీమెయిల్‌, ఫొటోస్‌ సమాచారం ఆటోమేటిక్‌గా ప్రకటనల కోసం ఉపయోగిస్తారని కాదు.
వినియోగదారుల జీమెయిల్‌, డ్రైవ్‌, ఫొటోస్‌ సమాచారాన్ని ప్రకటనలు ఇచ్చే సంస్థలకు నేరుగా అందించబోమని గూగుల్ స్పష్టం చేసింది. అలాగే పేరు, ఈమెయిల్‌ చిరునామా వంటి వ్యక్తిగత గుర్తింపును వెల్లడించే వివరాలను కూడా ఈ ప్రక్రియ ద్వారా ప్రకటనదారులకు అందించబోమని తెలిపింది. జాతి, లైంగిక అభిరుచి, మతం, ఆరోగ్యం వంటి సున్నితమైన అంశాల ఆధారంగా ప్రకటనలు చూపించబోమని కంపెనీ పేర్కొంది.
గూగుల్ సెర్చ్‌, జెమినీ వంటి సేవలకు జీమెయిల్‌, గూగుల్ ఫొటోస్‌, వర్క్‌స్పేస్‌ అనువర్తనాల సమాచారాన్ని ఉపయోగించుకునే అనుమతి ఇవ్వవచ్చని తాజా విధానం చెబుతోంది. అయితే, డేటా వినియోగం సంబంధిత సేవల నిబంధనలు, వినియోగదారుల సెట్టింగులకు లోబడి ఉంటుంది. మీ ఆసక్తులు, కార్యకలాపాలు లేదా వ్యక్తిగతీకరించిన కంటెంట్‌ ఆధారంగా ప్రకటనలు కనిపించే అవకాశం కూడా ఉంది.
మీ సమాచారం ఇతర సేవలతో పంచుకోకూడదనుకుంటే, గూగుల్ ఖాతాలోని ప్రైవసీ సెట్టింగులను పరిశీలించాలి. ఏయే అనువర్తనాలకు డేటా అనుమతులు ఇచ్చారో తనిఖీ చేసి, అవసరం లేని అనుసంధానాలను నిలిపివేయాలి. కృత్రిమ మేధ ఆధారిత సేవలు పెరుగుతున్న నేపథ్యంలో, మెరుగైన వ్యక్తిగత అనుభవంతో పాటు సమాచార వినియోగంపై కూడా వినియోగదారులు అప్రమత్తంగా ఉండటం అవసరం.
