Last Updated:
ప్రపంచ రాజకీయాల్లో భారతదేశ ప్రాధాన్యం పెరుగుతోందా? ప్రధాని నరేంద్ర మోదీ నాయకత్వంపై పోలాండ్ ప్రధానమంత్రి డొనాల్డ్ టస్క్ చేసిన వ్యాఖ్యలు ఇప్పుడు ఆసక్తికరంగా మారాయి. మోదీని ప్రపంచానికి ఆశాకిరణంగా అభివర్ణించిన ఆయన.. భారత్ సాధిస్తున్న ఆర్థిక పురోగతిని ప్రశంసించారు. పూర్తి వివరాలు తెలుసుకుందాం.
భారత ప్రధాని నరేంద్ర మోదీ నాయకత్వంపై పోలాండ్ ప్రధానమంత్రి డొనాల్డ్ టస్క్ ప్రశంసలు కురిపించారు. భారత్ వంటి శక్తిమంతమైన దేశానికి నాయకత్వం వహిస్తున్న మోదీ ప్రపంచానికి ఆశాకిరణంగా నిలుస్తున్నారని కొనియాడారు. భారత్, పోలాండ్ గత 35 ఏళ్లలో సాధించిన ఆర్థిక అభివృద్ధి, వేగవంతమైన పురోగతిని ప్రస్తావించారు. అక్టోబర్ 22న న్యూఢిల్లీలోని హైదరాబాద్ హౌస్‌లో మోదీ, టస్క్ నేతృత్వంలో ఇరు దేశాల ప్రతినిధి బృందాల మధ్య చర్చలు జరిగాయి. అనంతరం నిర్వహించిన సంయుక్త మీడియా సమావేశంలో టస్క్ ఈ వ్యాఖ్యలు చేశారు. మోదీని తన స్నేహితుడిగా చెప్పుకోవడం గర్వంగా ఉందని పేర్కొన్నారు.
భారత్, పోలాండ్ మధ్య వ్యూహాత్మక భాగస్వామ్యాన్ని మరింత బలోపేతం చేసేందుకు చర్చలు ఫలప్రదంగా సాగాయని టస్క్ తెలిపారు. 2024 ఆగస్టులో మోదీ వార్సా పర్యటన సందర్భంగా ఈ భాగస్వామ్యాన్ని ఏర్పాటు చేయాలని ఇరు దేశాలు నిర్ణయించుకున్నాయని గుర్తుచేశారు. భారత్, పోలాండ్ ప్రయోజనాలు పరస్పరం అనుకూలంగా ఉన్నాయని, తమ మధ్య విభేదాలకు కారణమయ్యే చారిత్రక వివాదాలు లేవని స్పష్టం చేశారు. పరస్పర విశ్వాసం, ఉమ్మడి విలువలు, అహింస వంటి సూత్రాల ఆధారంగా స్నేహాన్ని మరింత బలపరుచుకుంటున్నామని చెప్పారు. పోలాండ్‌లోని సాలిడారిటీ ఉద్యమ సంప్రదాయంపై భారతదేశ అహింసా మార్గం ప్రభావం ఉందని కూడా ప్రస్తావించారు. ప్రపంచవ్యాప్తంగా అనిశ్చితి, రాజకీయ అస్థిరత నెలకొన్న సమయంలో మోదీ అంతర్జాతీయ పాత్ర ఆశను కలిగిస్తోందని ప్రశంసించారు.
భారత్, పోలాండ్ మధ్య రక్షణ, అంతరిక్షం, అణుశక్తి రంగాల్లో సహకారాన్ని పెంచుకోవాలని నిర్ణయించినట్లు ప్రధాని మోదీ వెల్లడించారు. సంస్కృతి, విద్య, క్రీడలు, పర్యాటక రంగాల్లోనూ పరస్పర సహకారాన్ని విస్తరించేందుకు అంగీకరించినట్లు తెలిపారు. ప్రాంతీయ, అంతర్జాతీయ పరిణామాలపై ఇరువురు నేతలు విస్తృతంగా చర్చించారు. ప్రజాస్వామ్య విలువలు, చట్టబద్ధ పాలనపై తమకు విశ్వాసం ఉందని మోదీ పేర్కొన్నారు. ప్రపంచ పాలన సంస్థలను మరింత సమర్థంగా మార్చేందుకు సంస్కరణలు అవసరమని అభిప్రాయపడ్డారు. ఉక్రెయిన్, పశ్చిమాసియా పరిణామాలను ప్రస్తావిస్తూ, శాంతి కోసం జరిగే ప్రతి అర్థవంతమైన ప్రయత్నానికి భారత్ మద్దతు కొనసాగిస్తుందని స్పష్టం చేశారు.
భారత్, పోలాండ్ సంబంధాలకు మానవత్వం, కరుణతో కూడిన చరిత్ర పునాదిగా ఉందని మోదీ పేర్కొన్నారు. రెండో ప్రపంచ యుద్ధ సమయంలో జామ్‌నగర్, కొల్హాపూర్ సంస్థానాల రాజకుటుంబాలు వేలాది మంది పోలిష్ పిల్లలు, కుటుంబాలకు ఆశ్రయం కల్పించిన విషయాన్ని గుర్తుచేశారు. 2022లో ఉక్రెయిన్ నుంచి భారత విద్యార్థులను సురక్షితంగా తరలించడంలో పోలాండ్ అందించిన సహకారాన్ని కూడా ప్రశంసించారు.
అక్టోబర్ 21 నుంచి 23 వరకు భారత్‌లో అధికారిక పర్యటన కోసం టస్క్ అక్టోబర్ 21న న్యూఢిల్లీకి చేరుకున్నారు. అక్టోబర్ 22న రాజ్‌ఘాట్‌లో మహాత్మా గాంధీ స్మారకానికి పుష్పాంజలి ఘటించారు. విదేశాంగ మంత్రి ఎస్. జైశంకర్ ఆయనతో భేటీ అయి, వివిధ రంగాల్లో సహకారంపై చర్చించారు. భారత ప్రతినిధి బృందంలో జైశంకర్‌తో పాటు జాతీయ భద్రతా సలహాదారు అజిత్ దోవల్, విదేశాంగ కార్యదర్శి విక్రమ్ మిస్రీ ఉన్నారు. పోలాండ్ తరఫున ఆర్థిక, ఆర్థిక వ్యవహారాల మంత్రి ఆండ్రేజ్ డొమాన్స్కీ, వ్యాపార ప్రతినిధులు పాల్గొన్నారు. అక్టోబర్ 22న న్యూఢిల్లీలో భారత్-పోలాండ్ వ్యాపార సదస్సు నిర్వహిస్తున్నారు. అక్టోబర్ 23న టస్క్ బెంగళూరులో పర్యటించి, సమాచార సాంకేతిక, అంతరిక్ష రంగాల వ్యాపార ప్రముఖులతో సమావేశం కానున్నారు. 2010 తర్వాత భారత్‌లో పర్యటిస్తున్న తొలి పోలాండ్ ప్రధాని టస్క్ కావడం విశేషం. 2024 ఆగస్టులో మోదీ పోలాండ్ పర్యటన సందర్భంగా ఇరు దేశాల సంబంధాలు వ్యూహాత్మక భాగస్వామ్య స్థాయికి చేరాయి.
