ప్రధాన మంత్రి ముద్రా యోజన కింద ఆదాయం వచ్చే కార్యకలాపాలు నిర్వహించే సూక్ష్మ, చిన్న వ్యాపారాలకు రుణాలు అందిస్తారు. వ్యాపారం ఏ దశలో ఉంది, ఎంత మొత్తంలో రుణం అవసరం అనే అంశాలను బట్టి ముద్రా రుణాలను వివిధ కేటగిరీలుగా విభజించారు. ఇందులో శిశు, కిషోర్, తరుణ్, తరుణ్ ప్లస్ అనే నాలుగు విభాగాలు ఉన్నాయి. ముద్రా పథకంలోని తరుణ్ ప్లస్ కేటగిరీ ప్రత్యేకంగా గతంలో తరుణ్ కేటగిరీ కింద రుణం తీసుకుని, దానిని విజయవంతంగా తిరిగి చెల్లించిన అర్హులైన రుణగ్రహీతలను లక్ష్యంగా చేసుకుంటుంది. ఈ కేటగిరీలో రూ.10 లక్షలకు పైగా, గరిష్ఠంగా రూ.20 లక్షల వరకు రుణం పొందే అవకాశం ఉంటుంది. అంటే ఇప్పటికే చిన్న వ్యాపారం నిర్వహిస్తూ, గతంలో తీసుకున్న రుణాన్ని సక్రమంగా చెల్లించిన వ్యాపారులకు మరింత పెద్ద మొత్తంలో వ్యాపార అవసరాల కోసం నిధులు సమకూర్చుకునే అవకాశం కలుగుతుంది.
