జాతీయ రహదారులపై టోల్ ప్లాజాల దగ్గర టాయిలెట్లు, పార్కింగ్ సదుపాయాలను మెరుగుపరచేందుకు నేషనల్ హైవేస్ అథారిటీ ఆఫ్ ఇండియా (ఎన్‌హెచ్‌ఏఐ) కొత్త మార్గదర్శకాలను విడుదల చేసింది. ప్రయాణికులకు శుభ్రమైన టాయిలెట్లు, సురక్షితమైన పార్కింగ్, రాత్రి వేళల్లోనూ అందుబాటులో ఉండే సదుపాయాలు కల్పించడమే ఈ నిర్ణయం ముఖ్య ఉద్దేశం. వీటి నిర్వహణను పర్యవేక్షించేందుకు ఆధునిక టెక్నాలజీని కూడా ఉపయోగించనున్నారు. ప్రస్తుతం ఉన్న టాయిలెట్లను మరమ్మతులు చేసే ముందు వాటి పరిస్థితిని సాంకేతికంగా పరిశీలిస్తారు. ఎక్కడ మరమ్మతులు చేయాలి, ఏయే పరికరాలను మార్చాలి అనేది గుర్తిస్తారు. ఆ తర్వాత అవసరమైన పనులు చేపడతారు. టాయిలెట్లలో ఫ్లోరింగ్, ప్లంబింగ్, శానిటరీ ఫిట్టింగ్స్, లైటింగ్, గాలి సరిగా వచ్చేలా వెంటిలేషన్, డ్రైనేజీ, సూచిక బోర్డులు వంటి సదుపాయాలను మెరుగుపరుస్తారు. టాయిలెట్ల పరిమాణం, అక్కడికి వచ్చే వాహనాలు, ప్రయాణికుల సంఖ్యను బట్టి శుభ్రం చేసే సమయాలను నిర్ణయిస్తారు. దీనివల్ల టాయిలెట్లు క్రమం తప్పకుండా శుభ్రంగా ఉండటంతో పాటు అవసరమైన సదుపాయాలు అందుబాటులో ఉంటాయి. (ప్రతీకాత్మక చిత్రం)
