Last Updated:
FSSAI Food Safety Action: ప్రియాగోల్డ్ బిస్కెట్లు, డొడ్లా డెయిరీ పాలతో పాటు మరో కంపెనీ ఎండుద్రాక్షలో ఆహార భద్రతా ఉల్లంఘనలను గుర్తించినట్లు FSSAI వెల్లడించింది. ఈ మూడు కంపెనీలపై ప్రాసిక్యూషన్ కోసం చట్టపరమైన చర్యలు ప్రారంభించింది. తనిఖీల్లో ఏం గుర్తించారంటే?
దేశంలో ఆహార ఉత్పత్తుల నాణ్యత, భద్రతను పర్యవేక్షించే ఫుడ్ సేఫ్టీ అండ్ స్టాండర్డ్స్ అథారిటీ ఆఫ్ ఇండియా (FSSAI) మూడు కంపెనీలపై కీలక చర్యలు చేపట్టింది. ప్రియాగోల్డ్ బిస్కెట్ల తయారీ సంస్థ సూర్య ఫుడ్ అండ్ ఆగ్రో, డొడ్లా డెయిరీ, UEIR ఆర్గానిక్ ఫుడ్స్‌పై తీవ్రమైన ఆహార భద్రతా ఉల్లంఘనలకు సంబంధించి ప్రాసిక్యూషన్ కోసం చట్టపరమైన చర్యలు ప్రారంభించింది. ఈ విషయాన్ని FSSAI శనివారం సోషల్ మీడియా ద్వారా వెల్లడించింది.
సూర్య ఫుడ్ అండ్ ఆగ్రో తయారు చేసే ప్రియాగోల్డ్ బిస్కెట్ల తయారీలో మానవ వినియోగానికి ఉద్దేశించని పశువుల మేత ఊకను ముడి పదార్థంగా ఉపయోగిస్తున్నట్లు FSSAI అధికారులు గుర్తించారు. వినియోగదారుడి ఫిర్యాదు ఆధారంగా కంపెనీ తయారీ కేంద్రంలో తనిఖీలు నిర్వహించగా ఈ విషయం వెలుగులోకి వచ్చింది. బిస్కెట్లలో ఫైబర్ కోసం పశువుల మేతకు ఉపయోగించే ఊకను వినియోగిస్తున్నట్లు అధికారులు తెలిపారు. ఈ పదార్థం పశువుల ఆహారం కోసం ఉద్దేశించినదని సూచించే గుర్తులు ఉన్న గోనె సంచుల్లో నిల్వ చేసినట్లు కూడా గుర్తించారు.
తనిఖీల్లో తయారీ కేంద్రం పరిశుభ్రత, పురుగుల నియంత్రణ, ముడి పదార్థాల నిల్వ, సిబ్బంది వ్యక్తిగత పరిశుభ్రత, ప్రాంగణ నిర్వహణలోనూ లోపాలను గుర్తించారు. దీంతో గతంలోనే కంపెనీ లైసెన్స్‌ను సస్పెండ్ చేసిన FSSAI, తాజాగా ప్రాసిక్యూషన్ కోసం చట్టపరమైన చర్యలు ప్రారంభించింది.
డొడ్లా డెయిరీకి చెందిన ఫుల్ క్రీమ్ పాల నమూనాను పరీక్షించగా, పాల కొవ్వు శాతం నిర్దేశిత ప్రమాణాల కంటే తక్కువగా ఉన్నట్లు మొదట గుర్తించారు. దీంతో ఆ నమూనాను నాణ్యత లేనిదిగా ప్రకటించారు. కంపెనీ అప్పీల్ చేయడంతో నమూనాను రెఫరల్ ఫుడ్ లాబొరేటరీకి పంపించారు. అక్కడ నిర్వహించిన పరీక్షల్లో డిటర్జెంట్ లేదా కాస్టిక్ సోడా కారణంగా నమూనా సురక్షితం కాదని, పాల కొవ్వు శాతం కూడా కనీస ప్రమాణాలకు అనుగుణంగా లేదని నిర్ధారించినట్లు FSSAI వెల్లడించింది. ఈ ఉల్లంఘనలపై ప్రాసిక్యూషన్‌కు అనుమతి లభించడంతో తదుపరి చట్టపరమైన చర్యలు చేపట్టారు.
FSSAI has initiated legal proceedings for prosecution against M/s Surya Food & Agro Ltd. (Priyagold Biscuits), M/s Dodla Dairy Limited, and M/s Ueir Organic Foods Pvt Ltd for serious food safety violations. 1(2) #FSSAINotice https://t.co/xokBtvH2OZ
— FSSAI (@fssaiindia) October 17, 2026
UEIR ఆర్గానిక్ ఫుడ్స్ విక్రయించే పసుపు ఎండుద్రాక్ష నమూనాలో పురుగుమందుల అవశేషాలను అధికారులు గుర్తించారు. ఈ మూడు కంపెనీలకు సంబంధించిన కేసుల్లో ఆహార భద్రతా నిబంధనల ఉల్లంఘనలను తీవ్రంగా పరిగణించి చర్యలు ప్రారంభించినట్లు FSSAI తెలిపింది.
ప్యాక్ చేసిన ఆహార పదార్థాలను కొనుగోలు చేసేటప్పుడు తయారీ తేదీ, గడువు తేదీ, ప్యాకెట్ పరిస్థితిని పరిశీలించడం మంచిది. ఉత్పత్తిలో అసాధారణమైన వాసన లేదా రూపం కనిపిస్తే దాన్ని వినియోగించకూడదు. కాగా, ప్రాసిక్యూషన్ చర్యలు ప్రారంభించడం అనేది చట్టపరమైన ప్రక్రియలో భాగం. ఈ కేసుల్లో తుది నిర్ణయాలు విచారణ, చట్టపరమైన ప్రక్రియల ఆధారంగా వెలువడతాయి.
