Last Updated:
Jio IPO: జియో ప్లాట్‌ఫామ్స్ IPOపై అంచనాలు పెరుగుతున్న వేళ ఆకాష్ అంబానీ కీలక వ్యాఖ్యలు చేశారు. ఐపీఓతో తమ బాధ్యత పూర్తికాదని, లిస్టింగ్ తర్వాత కంపెనీ వృద్ధితో పాటు వాటాదారులకు విలువ అందించడమే ప్రధాన లక్ష్యమని చెప్పారు. అక్టోబర్ 21-23 మధ్య IPO సబ్‌స్క్రిప్షన్, అక్టోబర్ 28న లిస్టింగ్ ఉండే అవకాశం ఉందన్న వార్తల నేపథ్యంలో ఈ వ్యాఖ్యలకు ప్రాధాన్యం ఏర్పడింది.
రిలయన్స్ జియో ప్రతిపాదిత ఇనీషియల్ పబ్లిక్ ఆఫరింగ్ (IPO)పై అంచనాలు పెరుగుతున్న వేళ, రిలయన్స్ జియో ఛైర్మన్ ఆకాష్ అంబానీ కీలక వ్యాఖ్యలు చేశారు. జియో ఐపీఓను కేవలం ఒక సాధారణ లిస్టింగ్‌గా కాకుండా, వాటాదారుల పట్ల తమకు ఉన్న పెద్ద బాధ్యతగా చూస్తున్నట్లు ఆయన చెప్పారు. ఐపీఓ తర్వాత కంపెనీ వృద్ధితో పాటు పెట్టుబడిదారులకు విలువను అందించడం తమ ప్రధాన లక్ష్యంగా ఉంటుందని స్పష్టం చేశారు.
న్యూఢిల్లీలో జరుగుతున్న ఇండియా మొబైల్ కాంగ్రెస్ 2026 సందర్భంగా మనీకంట్రోల్‌తో మాట్లాడిన ఆకాష్ అంబానీ, జియో ఐపీఓపై తమ వైఖరిని వెల్లడించారు. వాటాదారుల విలువకు రిలయన్స్ గ్రూప్ ఎప్పటి నుంచో అత్యంత ప్రాధాన్యం ఇస్తోందని ఆయన పేర్కొన్నారు. దాదాపు మూడు దశాబ్దాల తర్వాత రిలయన్స్ గ్రూప్ నుంచి వస్తున్న తొలి పబ్లిక్ ఇష్యూ కావడంతో జియో ఐపీఓ తమకు ప్రత్యేకమైనదని ఆయన వివరించారు.
ఐపీఓ ద్వారా జియో ప్లాట్‌ఫామ్స్ స్టాక్ మార్కెట్‌లో లిస్టింగ్ కావడం కంపెనీ ప్రయాణంలో మరో కీలక దశకు నాంది పలుకుతుందని ఆకాష్ అంబానీ అన్నారు. అయితే లిస్టింగ్‌తో తమ పని పూర్తవదని ఆయన స్పష్టం చేశారు. ఐపీఓ అనేది జియోకు కొత్త ప్రయాణానికి ప్రారంభం మాత్రమేనని, ఆ తర్వాత కంపెనీ వృద్ధిని కొనసాగిస్తూ వాటాదారులకు విలువను అందించడమే తమ అసలు లక్ష్యమని చెప్పారు. అంటే కంపెనీ భవిష్యత్ పనితీరు, ఆదాయ వృద్ధి, కొత్త వ్యాపార అవకాశాలు పెట్టుబడిదారులకు మరింత కీలకం కానున్నాయి.
ఇదిలా ఉంటే, జియో వ్యాపారం ఇప్పుడు కేవలం మొబైల్ కనెక్టివిటీకి పరిమితం కావడం లేదు. టెలికాం సేవలతో పాటు డిజిటల్ ప్లాట్‌ఫామ్స్, టెక్నాలజీ సేవలు, వివిధ డిజిటల్ సొల్యూషన్స్ వైపు కూడా కంపెనీ విస్తరిస్తోంది. ఈ నేపథ్యంలో భవిష్యత్ వృద్ధిలో టెక్నాలజీకి మరింత ప్రాధాన్యం ఇవ్వనున్నప్పటికీ, సేవలు వినియోగదారులకు అందుబాటు ధరల్లో ఉండేలా చూడటం తమ వ్యూహంలో కీలక అంశంగా కొనసాగుతుందని ఆకాష్ అంబానీ తెలిపారు. వినియోగదారులకు సాధ్యమైనంత సరసమైన ధరల్లో సేవలు అందించేందుకు జియో ఎప్పటికీ తన వంతు ప్రయత్నం చేస్తుందని ఆయన చెప్పారు. టెలికాం రంగంలో ధరలు, టారిఫ్‌లపై చర్చ జరుగుతున్న సమయంలో ఆకాష్ అంబానీ చేసిన ఈ వ్యాఖ్యలకు ప్రాధాన్యం ఏర్పడింది. ఎక్కువ మంది ప్రజలకు డిజిటల్ సేవలు అందుబాటులోకి రావాలంటే సరసమైన ధరలు కీలకమని జియో భావిస్తున్నట్లు ఆయన మాటల ద్వారా స్పష్టమవుతోంది.
ప్రస్తుతం దేశంలో అతిపెద్ద మొబైల్ నెట్‌వర్క్‌లలో ఒకటిగా ఉన్న రిలయన్స్ జియో, రిలయన్స్ ఇండస్ట్రీస్‌కు చెందిన డిజిటల్ హోల్డింగ్ సంస్థ జియో ప్లాట్‌ఫామ్స్ లిమిటెడ్ ద్వారా తన వివిధ డిజిటల్ వ్యాపారాలను నిర్వహిస్తోంది. జియో ప్లాట్‌ఫామ్స్ ప్రతిపాదిత ఐపీఓపై మార్కెట్ వర్గాల్లో చాలాకాలంగా ఆసక్తి ఉంది. కంపెనీ మార్కెట్‌లోకి వస్తే దేశీయ క్యాపిటల్ మార్కెట్‌లో ఇది ఒక ముఖ్యమైన లిస్టింగ్‌గా నిలిచే అవకాశం ఉందని అంచనాలు ఉన్నాయి.
మనీకంట్రోల్ గతంలో వెల్లడించిన వివరాల ప్రకారం, జియో ప్లాట్‌ఫామ్స్ తన ఐపీఓను ఈ అక్టోబర్‌లో ప్రారంభించేందుకు సిద్ధమవుతున్నట్లు తెలుస్తోంది. ప్రతిపాదిత షెడ్యూల్ ప్రకారం అక్టోబర్ 21 నుంచి 23 వరకు పబ్లిక్ సబ్‌స్క్రిప్షన్‌కు ఐపీఓ అందుబాటులో ఉండే అవకాశం ఉంది. అంటే ఈ మూడు రోజుల్లో సాధారణ ఇన్వెస్టర్లు జియో ఐపీఓలో షేర్ల కోసం దరఖాస్తు చేసుకునే అవకాశం ఉంటుంది. అదే సమయంలో మార్కెట్ పరిస్థితులను బట్టి అక్టోబర్ 19న యాంకర్ ఇన్వెస్టర్ల కోసం యాంకర్ బుక్ తెరవాలని కంపెనీ లక్ష్యంగా పెట్టుకున్నట్లు సమాచారం. యాంకర్ ఇన్వెస్టర్లు సాధారణంగా పెద్ద సంస్థాగత పెట్టుబడిదారులు. వీరి భాగస్వామ్యం ఐపీఓపై మార్కెట్ ఆసక్తిని అంచనా వేయడంలో కూడా కీలకంగా ఉంటుంది. అనంతరం అక్టోబర్ 28న జియో ప్లాట్‌ఫామ్స్ షేర్లను స్టాక్ ఎక్స్ఛేంజీల్లో లిస్ట్ చేయాలని లక్ష్యంగా పెట్టుకున్నట్లు తెలుస్తోంది.
