Last Updated:
చల్లని గాలులు, గాలిలో తేమ తగ్గడం, తరచుగా చేతులు కడుక్కోవడం, వేడి నీటిని ఉపయోగించడం వంటి కారణాలతో చేతుల్లో సహజ తేమ తగ్గిపోతుంది. కొన్నిసార్లు చేతులపై దురద, మంట, పగుళ్లు కూడా ఏర్పడవచ్చు. అయితే కొన్ని సులభమైన జాగ్రత్తలు పాటిస్తే చలికాలంలోనూ చేతులను మృదువుగా, ఆరోగ్యంగా ఉంచుకోవచ్చు.
చలికాలం వచ్చిందంటే చర్మం పొడిబారడం, పెదవులు పగలడం వంటి సమస్యలు చాలామందిని ఇబ్బంది పెడతాయి. ముఖ్యంగా చేతుల చర్మం త్వరగా పొడిబారి, గరుకుగా మారుతుంది. చల్లని గాలులు, గాలిలో తేమ తగ్గడం, తరచుగా చేతులు కడుక్కోవడం, వేడి నీటిని ఉపయోగించడం వంటి కారణాలతో చేతుల్లో సహజ తేమ తగ్గిపోతుంది. కొన్నిసార్లు చేతులపై దురద, మంట, పగుళ్లు కూడా ఏర్పడవచ్చు. అయితే కొన్ని సులభమైన జాగ్రత్తలు పాటిస్తే చలికాలంలోనూ చేతులను మృదువుగా, ఆరోగ్యంగా ఉంచుకోవచ్చు.
గోరువెచ్చని నీటితో చేతులు కడుక్కోవాలి: చలిగా ఉందని చేతులు కడుక్కోవడానికి మరీ వేడి నీటిని ఉపయోగించకూడదు. వేడి నీరు చర్మంపై ఉండే సహజ నూనెలను తొలగించి, మరింత పొడిబారేలా చేస్తుంది. అందుకే సాధారణ ఉష్ణోగ్రతలో ఉన్న నీరు లేదా గోరువెచ్చని నీటిని ఉపయోగించడం మంచిది. చేతులు కడిగిన తర్వాత మెత్తని టవల్తో నెమ్మదిగా తుడుచుకోవాలి.
మైల్డ్ క్లెన్సర్ ఉపయోగించాలి: ఎక్కువ రసాయనాలు, సువాసనలు ఉండే సబ్బులు చేతుల తేమను తగ్గించవచ్చు. అందుకే చర్మానికి అనుకూలమైన, తేమను కాపాడే మైల్డ్ క్లెన్సర్ను ఎంచుకోవాలి. చేతులు శుభ్రం చేసుకున్న తర్వాత మాయిశ్చరైజర్ రాసుకోవడం మర్చిపోవద్దు.
మాయిశ్చరైజర్ తప్పనిసరి: చేతులు కడుక్కున్న వెంటనే చర్మం కొద్దిగా తడిగా ఉన్నప్పుడే చిక్కటి హ్యాండ్ క్రీమ్ లేదా బాడీ బటర్ రాసుకోవాలి. ముఖ్యంగా వేళ్ల మధ్య, గోళ్ల చుట్టూ, అరచేతులపై కూడా రాయాలి. ఇలా చేయడం వల్ల చర్మంలో తేమ నిలిచి ఉంటుంది.
రాత్రిపూట ప్రత్యేక శ్రద్ధ: నిద్రపోయే ముందు చేతులకు మందమైన మాయిశ్చరైజింగ్ క్రీమ్ లేదా పెట్రోలియం జెల్లీ రాసుకోవచ్చు. అవసరమైతే కాటన్ గ్లౌజులు ధరించి నిద్రపోవచ్చు. దీనివల్ల రాత్రంతా చర్మానికి రక్షణ లభిస్తుంది.
ఎక్స్ఫోలియేషన్ జాగ్రత్తగా చేయాలి: చేతులపై మృత చర్మం పేరుకుపోతే గరుకుగా అనిపించవచ్చు. అయితే సున్నితమైన చర్మం ఉన్నవారు గట్టిగా స్క్రబ్ చేయకూడదు. అవసరమైతే వారానికి ఒకసారి మైల్డ్ ఎక్స్ఫోలియేటర్ ఉపయోగించవచ్చు. స్క్రబ్ చేసిన వెంటనే మాయిశ్చరైజర్ రాయాలి.
ఆహారం, నీరు కూడా ముఖ్యం: రోజంతా తగినంత నీరు తాగాలి. ఆహారంలో పండ్లు, కూరగాయలు, బాదం, వాల్నట్స్ వంటి పోషకాలు ఉన్న పదార్థాలను చేర్చుకోవాలి. బయటకు వెళ్లేటప్పుడు గ్లౌజులు ధరించడం, గిన్నెలు కడిగేటప్పుడు రబ్బరు గ్లౌజులు ఉపయోగించడం మంచిది. ఇలా చిన్న చిన్న జాగ్రత్తలు పాటిస్తే చలికాలంలో చేతులు పొడిబారకుండా కాపాడుకోవచ్చు. Disclaimer: చేతులపై పగుళ్లు, దురద లేదా మంట ఎక్కువగా ఉంటే వైద్యులను సంప్రదించాలి.

