OTT: రూ.35 కోట్ల బడ్జెట్ పెడితే.. వచ్చింది రూ.2 కోట్లు మాత్రమే.. వామ్మో తమన్నా ఇంత ఘెరమైన సినిమా చేసిందా? | తెలుగు సినిమా వార్తలు

మలయాళ స్టార్ హీరో దిలీప్ నటించిన ఈ సినిమాతో తమన్నా మలయాళ ఇండస్ట్రీలోకి అడుగుపెట్టారు. భారీ అంచనాల మధ్య విడుదలైన ఈ చిత్రం బాక్సాఫీస్ వద్ద మాత్రం ఆశించిన ఫలితాన్ని అందుకోలేకపోయింది. సుమారు రూ.35 కోట్ల భారీ బడ్జెట్‌తో తెరకెక్కిన ఈ సినిమా కేవలం రూ.2 కోట్ల వసూళ్లకే పరిమితమైందని సమాచారం. దీంతో నిర్మాతలకు భారీ నష్టాలు ఎదురయ్యాయి. థియేటర్లలో ప్రేక్షకులను ఆకట్టుకోవడంలో విఫలమైన ఈ సినిమాకు ఓటీటీ విడుదల విషయంలోనూ ఆలస్యం జరిగింది.

సాధారణంగా థియేటర్లలో విడుదలైన కొన్ని వారాలకే సినిమాలు ఓటీటీలోకి వచ్చేస్తుంటాయి. కానీ ‘బాంద్రా’ విషయంలో మాత్రం పరిస్థితి భిన్నంగా ఉంది. 2023లో విడుదలైన ఈ సినిమా దాదాపు మూడేళ్ల తర్వాత ఇప్పుడు డిజిటల్ ప్రేక్షకుల ముందుకు వచ్చేందుకు సిద్ధమైంది. ప్రముఖ ఓటీటీ సంస్థ జీ5 ఈ సినిమా స్ట్రీమింగ్ హక్కులను సొంతం చేసుకుంది. ఈ నెల 13 నుంచి జీ5 వేదికగా ‘బాంద్రా’ అందుబాటులోకి రానుంది. ఈ విషయాన్ని సదరు ఓటీటీ సంస్థ అధికారికంగా ప్రకటించింది.

థియేటర్లలో విడుదలైన సమయంలో పెద్దగా ప్రేక్షకుల దృష్టిని ఆకర్షించలేకపోయిన ఈ సినిమా.. ఇప్పుడు ఓటీటీలో ఎలాంటి స్పందన అందుకుంటుందనేది ఆసక్తికరంగా మారింది. ముఖ్యంగా తమన్నా అభిమానులకు ఈ సినిమా డిజిటల్ ప్రీమియర్ మంచి అవకాశంగా చెప్పుకోవచ్చు.

‘బాంద్రా’ కథ విషయానికి వస్తే.. ఓ మాఫియా డాన్ నుంచి తప్పించుకున్న హీరోయిన్ చుట్టూ కథ తిరుగుతుంది. ఆ క్రమంలో ఆమె ఓ గ్యాంగ్‌స్టర్‌తో ప్రేమలో పడుతుంది. ఇద్దరి మధ్య ప్రేమ ప్రయాణం కొనసాగుతున్న సమయంలో అనూహ్యమైన సంఘటన చోటుచేసుకుంటుంది. హీరోయిన్ అనుకోని పరిస్థితుల్లో మరణిస్తుంది. ఆ తర్వాత ఏం జరిగింది? ఆమె మరణం వెనుక ఉన్న కారణాలేంటి? అనే అంశాలతో కథ ముందుకు సాగుతుంది.

యాక్షన్, ప్రేమ, మాఫియా నేపథ్యాన్ని కలిపి ఈ సినిమాను తెరకెక్కించారు. భారీ బడ్జెట్, ప్రముఖ నటీనటులు ఉన్నప్పటికీ థియేటర్లలో మాత్రం ఈ చిత్రం ప్రేక్షకులను మెప్పించలేకపోయింది. ఇప్పుడు జీ5లో స్ట్రీమింగ్ కానున్న నేపథ్యంలో ఓటీటీ ప్రేక్షకుల నుంచి ఎలాంటి స్పందన వస్తుందో చూడాలి. మొత్తానికి దాదాపు మూడేళ్ల నిరీక్షణ తర్వాత తమన్నా నటించిన మలయాళ చిత్రం ‘బాంద్రా’ డిజిటల్ ప్రేక్షకుల ముందుకు రాబోతోంది.