స్థానిక అడ్రస్ ప్రూఫ్ లేకపోతే ఏం చేయాలి?
హైదరాబాద్‌కు ఉద్యోగం కోసం వచ్చిన కొత్తవారికి స్థానిక చిరునామాతో కూడిన పత్రాలు వెంటనే సిద్ధంగా ఉండకపోవచ్చు. అలాంటప్పుడు ఇంటి యజమాని అడ్రస్ ఫ్రూప్‌ ఉపయోగించవచ్చా అనే విషయాన్ని సంబంధిత LPG పంపిణీదారుని వద్ద ముందుగా నిర్ధారించుకోవాలి. అద్దె ఒప్పందం, గుర్తింపు పత్రం, ప్రస్తుత నివాసాన్ని నిర్ధారించే ఇతర పత్రాలు, KYC వివరాలను అడిగే అవకాశం ఉంది. అయితే, ఓనర్ అడ్రస్ ప్రూఫ్ ఒక్కటే అద్దెదారుకు సరిపోతుందని కచ్చితంగా చెప్పలేం. ఏ పత్రాలు ఆమోదయోగ్యమో గ్యాస్ కంపెనీ నిబంధనలు, దరఖాస్తుదారుడి పరిస్థితులపై ఆధారపడి ఉంటుంది. ఇండేన్, భారత్‌గ్యాస్, హెచ్‌పీ గ్యాస్ వంటి సంస్థల అధీకృత డిస్ట్రిబ్యూటర్‌ను సంప్రదించి కొత్త కనెక్షన్‌కు కావాల్సిన పత్రాల జాబితాను తెలుసుకోవడం మంచిది. గుర్తింపు, చిరునామా వివరాలు, కుటుంబ వివరాలను సరిగ్గా ఇవ్వాలి. స్థానిక చిరునామా రుజువు అందుబాటులో లేకపోతే, ప్రత్యామ్నాయంగా ఏ పత్రాలను అంగీకరిస్తారో ముందుగానే అడగడం వల్ల అనవసర జాప్యాన్ని నివారించవచ్చు.
