గాంధీజీ చిత్రం భారత కరెన్సీలోకి అధికారికంగా రావడానికి మరికొన్ని దశాబ్దాలు పట్టింది. 1969లో ఆయన జన్మ శతాబ్ది సందర్భంగా విడుదల చేసిన ప్రత్యేక స్మారక కరెన్సీ సిరీస్‌లో తొలిసారి గాంధీజీ చిత్రం కనిపించింది. ఆ నోటులో గాంధీజీతో పాటు సేవాగ్రామ్ ఆశ్రమం నేపథ్యంగా ఉంది. తర్వాత 1987లో ₹500 నోటుపై కూడా గాంధీజీ చిత్రం కనిపించింది. అయితే అప్పటి నోట్లలో ఉపయోగించిన చిత్రాలు, ప్రస్తుతం మనం చూసే గాంధీజీ చిత్రంతో పూర్తిగా ఒకేలా ఉండవు. ప్రస్తుతం మనం భారతీయ కరెన్సీ నోట్లపై చూస్తున్న విధంగా గాంధీజీ చిత్రం విస్తృతంగా ఉపయోగించడం 1996లో ప్రారంభమైన మహాత్మా గాంధీ సిరీస్‌తో జరిగింది. RBI వివరాల ప్రకారం, ఈ సిరీస్ నోట్ల ముందు భాగంలో ఉన్న అశోక సింహచిహ్నం స్థానంలో గాంధీజీ చిత్రాన్ని తీసుకొచ్చారు. అదే సమయంలో నోట్లలో పలు భద్రతా లక్షణాలను కూడా ప్రవేశపెట్టారు. కరెన్సీ నోట్లలో మానవ ముఖాన్ని ఉపయోగించడం వల్ల నకిలీ నోట్లను గుర్తించడం, తయారు చేయడం మరింత కష్టతరం చేసే భద్రతా ప్రయోజనం కూడా ఉంది. ముఖంలోని సూక్ష్మ రేఖలు, వెలుగు-నీడల వివరాలను ఖచ్చితంగా పునరుత్పత్తి చేయాల్సి ఉండటంతో నకిలీ కరెన్సీ తయారీలో అదనపు సవాళ్లు ఏర్పడతాయి.
