Last Updated:
కాఫీ రుచికే కాదు, ఆరోగ్యానికి కూడా కొన్ని ప్రయోజనాలు ఉన్నాయని నిపుణులు చెబుతున్నారు. ముఖ్యంగా కాలేయం (లివర్) ఆరోగ్యాన్ని కాపాడడంలో కాఫీ ఉపయోగపడుతుందని తాజా అధ్యయనాలు సూచిస్తున్నాయి.
చాలా మందికి ఉదయం లేవగానే ఒక కప్పు వేడి వేడి కాఫీ తాగడం అలవాటు. కొందరికి అది రోజును ప్రారంభించే శక్తినిస్తే, మరికొందరికి మనసుకు ప్రశాంతతను ఇస్తుంది. ఉదయపు కాఫీ కేవలం ఒక పానీయం మాత్రమే కాదు.. అది చాలామందికి రోజువారీ జీవితంలో ఒక భాగంగా మారిపోయింది. పనిఒత్తిడి, కుటుంబ బాధ్యతలు, రోజువారీ హడావుడి మధ్య కొన్ని నిమిషాలు ప్రశాంతంగా కూర్చొని కాఫీని ఆస్వాదించడం మనసుకు ఎంతో హాయిని కలిగిస్తుంది. అయితే కాఫీ రుచికే కాదు, ఆరోగ్యానికి కూడా కొన్ని ప్రయోజనాలు ఉన్నాయని నిపుణులు చెబుతున్నారు. ముఖ్యంగా కాలేయం (లివర్) ఆరోగ్యాన్ని కాపాడడంలో కాఫీ ఉపయోగపడుతుందని తాజా అధ్యయనాలు సూచిస్తున్నాయి.
గ్యాస్ట్రోఎంటరాలజిస్ట్ డాక్టర్ సౌరభ్ సేథి తన ఇన్స్టాగ్రామ్ వీడియోలో ఉదయం పూట ఒక కప్పు కాఫీ తాగడం వల్ల కాలేయానికి కలిగే ప్రయోజనాలను వివరించారు. ఆయన చెప్పిన వివరాల ప్రకారం, క్రమం తప్పకుండా కాఫీ తాగే వారిలో లివర్ సిర్రోసిస్ వచ్చే ప్రమాదం సుమారు 44 శాతం వరకు తగ్గే అవకాశం ఉందని పరిశోధనలు సూచిస్తున్నాయి.
లివర్ సిర్రోసిస్ అనేది కాలేయం క్రమంగా దెబ్బతిని, దాని స్థానంలో గట్టి మచ్చల కణజాలం ఏర్పడే తీవ్రమైన వ్యాధి. ఇది ఎక్కువకాలం మద్యం సేవించడం, హెపటైటిస్-బి లేదా హెపటైటిస్-సి ఇన్ఫెక్షన్, అలాగే ఫ్యాటీ లివర్ వంటి సమస్యల వల్ల రావచ్చు. ఒకసారి కాలేయం తీవ్రంగా దెబ్బతింటే పూర్తిగా కోలుకోవడం చాలా కష్టం. అందుకే కాలేయాన్ని ముందుగానే సంరక్షించుకోవడం చాలా ముఖ్యం.
డాక్టర్ సేథి ప్రకారం, ప్రతిరోజూ ఉదయం కాఫీ తాగడం వల్ల కాలేయ పనితీరును అంచనా వేసే ముఖ్యమైన ALT, AST ఎంజైమ్ల స్థాయిలు మెరుగుపడే అవకాశం ఉంది. ఈ ఎంజైమ్ల స్థాయిలు ఎక్కువగా ఉండటం కాలేయ సమస్యలకు సంకేతంగా భావిస్తారు. క్రమం తప్పకుండా కాఫీ తీసుకోవడం వల్ల ఇవి నియంత్రణలో ఉండటానికి సహాయపడుతుందని ఆయన తెలిపారు.
ప్రస్తుతం ప్రపంచవ్యాప్తంగా నాన్-ఆల్కహాలిక్ ఫ్యాటీ లివర్ డిసీజ్ (NAFLD) సమస్య వేగంగా పెరుగుతోంది. ప్రతి ముగ్గురు పెద్దల్లో ఒకరికి ఈ సమస్య కనిపిస్తోందని వైద్యులు చెబుతున్నారు. శరీరంలో అధిక కొవ్వు పేరుకుపోవడం, ఊబకాయం, మధుమేహం, వ్యాయామం లేకపోవడం వంటి కారణాలతో ఈ వ్యాధి వచ్చే ప్రమాదం పెరుగుతుంది. డాక్టర్ సేథి ప్రకారం, ఈ సమస్యను నివారించడంలో సహాయపడే పానీయాల్లో కాఫీ కూడా ఒకటి. దీనికి బలమైన వైద్యపరమైన ఆధారాలు ఉన్నాయని ఆయన పేర్కొన్నారు.
చాలామంది కాఫీలో ఉండే కెఫీన్ వల్లే ఈ ప్రయోజనాలు వస్తాయని అనుకుంటారు. కానీ అది పూర్తిగా నిజం కాదని నిపుణులు చెబుతున్నారు. సాధారణ కాఫీతో పాటు డీకాఫ్ కాఫీ (కెఫీన్ తక్కువగా ఉన్న కాఫీ) కూడా కాలేయ ఆరోగ్యానికి మేలు చేస్తుందని పరిశోధనలు చెబుతున్నాయి. కాఫీలో ఉండే పాలిఫెనాల్స్ అనే సహజ యాంటీ ఆక్సిడెంట్లు కాలేయాన్ని రక్షించడంలో ముఖ్యమైన పాత్ర పోషిస్తాయి. ఇవి శరీరంలో వాపును తగ్గించి, కాలేయ కణాలను దెబ్బతినకుండా కాపాడటానికి సహాయపడతాయి.
అయితే కాఫీ ఆరోగ్యానికి మంచిదని చెప్పి ఎక్కువగా తాగడం కూడా మంచిది కాదు. రోజుకు ఒకటి లేదా రెండు కప్పుల వరకు మాత్రమే పరిమితం కావడం మంచిది. అలాగే అధికంగా చక్కెర, క్రీమ్ లేదా ఫ్లేవర్ సిరప్లు కలిపిన కాఫీ కంటే సాధారణ కాఫీనే ఆరోగ్యానికి మేలు చేస్తుంది. ఇప్పటికే కాలేయ సంబంధిత వ్యాధులు ఉన్నవారు లేదా ఇతర ఆరోగ్య సమస్యలతో బాధపడుతున్నవారు కాఫీని రోజువారీ ఆహారంలో చేర్చే ముందు తప్పనిసరిగా వైద్యుల సలహా తీసుకోవాలి.
గమనిక: పై సమాచారం వైద్య నిపుణులు తెలిపిన వివరాలు, అందుబాటులో ఉన్న అధ్యయనాల ఆధారంగా మాత్రమే ఇవ్వబడింది. ఇది సాధారణ ఆరోగ్య అవగాహన కోసం మాత్రమే. వ్యక్తిగత ఆరోగ్య పరిస్థితులకు అనుగుణంగా వైద్యుల సలహా తీసుకున్న తర్వాతే ఏ నిర్ణయం తీసుకోవాలి.
Hyderabad,Telangana
