Last Updated:
జంతర్ మంతర్ వద్ద నిరసనకు సంబంధించిన కేసులో కస్టడీ పొడిగింపును సవాలు చేస్తూ కాక్రోచ్ జనతా పార్టీ నాయకులు సౌరవ్ దాస్, ఆశుతోష్ రంకా కోర్టును ఆశ్రయించారు. ఈ క్రమంలో వారి వయసుల ప్రస్తావన రావడంతో.. ‘మీరు జెన్ జీ కాదు’ అంటూ న్యాయమూర్తి వ్యాఖ్యానించారు. కార్యకర్తల కస్టడీపై కోర్టు ఏ ప్రశ్నలు లేవనెత్తింది? వారి విడుదల పిటిషన్‌పై విచారణలో ఏం జరిగింది?
Jantar Mantar Protest Case: నిరసన కార్యక్రమంలో జాతీయ జెండాను ఎగురవేసేందుకు ప్రయత్నించిన కేసులో కస్టడీ పొడిగింపును సవాలు చేస్తూ దాఖలైన పిటిషన్‌పై ఢిల్లీ హైకోర్టులో బుధవారం విచారణ జరిగింది. ఈ సందర్భంగా కాక్రోచ్ జనతా పార్టీ (CJP) నాయకులు సౌరవ్ దాస్, ఆశుతోష్ రంకా వయసు గురించి న్యాయస్థానంలో ఆసక్తికర వ్యాఖ్యలు చోటుచేసుకున్నాయి. పిటిషనర్ల తరఫున న్యాయవాది అభిక్ చిమ్ని వాదనలు వినిపిస్తూ.. దాస్ వయసు 27 ఏళ్లు కాగా, రంకా వయసు 32 ఏళ్లని తెలిపారు. దీనిపై స్పందించిన న్యాయమూర్తి జస్టిస్ సుబ్రమోనియం ప్రసాద్.. “అయితే మీరు జెన్ జీ కాదు. జెన్ జీ అంటే ఏమిటి?” అని ప్రశ్నించారు. 1997 తర్వాత జన్మించిన వారిని జెన్ జీగా పరిగణిస్తారని చెప్పినప్పటికీ, పిటిషనర్లు ఆ తరానికి చెందినవారు కాదని న్యాయమూర్తి వ్యాఖ్యానించినట్లు బార్ అండ్ బెంచ్ వెల్లడించింది.
ప్రత్యేక కార్యనిర్వాహక మేజిస్ట్రేట్ (SEM) అక్టోబర్ 19న జారీ చేసిన ఉత్తర్వుల ద్వారా ఇద్దరు కార్యకర్తల కస్టడీని అక్టోబర్ 21 వరకు పొడిగించారు. భారతీయ నాగరిక్ సురక్షా సంహిత (BNSS)లోని సెక్షన్లు 126, 170 కింద చేపట్టిన ముందస్తు నివారణ చర్యల్లో భాగంగా ఈ నిర్ణయం తీసుకున్నారు. ఈ ఉత్తర్వులను రద్దు చేయాలని, తమను వెంటనే విడుదల చేయాలని, కస్టడీ పొడిగింపుపై స్టే విధించాలని పిటిషనర్లు కోరారు. తమ నిర్బంధం చట్టవిరుద్ధమని, వ్యక్తిగత స్వేచ్ఛకు భంగం కలిగిస్తోందని వాదించారు.
అయితే, ఈ పిటిషన్‌ను విచారించే ముందు ప్రత్యామ్నాయ న్యాయపరిష్కార మార్గాలు అందుబాటులో ఉన్నాయా అని జస్టిస్ ప్రసాద్ ప్రశ్నించారు. సంబంధిత ఉత్తర్వుపై రివిజన్ దాఖలు చేసే అవకాశం ఉంటే ముందుగా ఆ మార్గాన్ని ఎందుకు అనుసరించలేదని అడిగారు. రెండోసారి శాంతిభద్రతలకు విఘాతం కలిగించినట్లు ఆరోపణలు ఎదుర్కొంటున్న నేపథ్యంలో, అధికారులు కఠినమైన షరతులు విధించడంలో తప్పేముందని ప్రశ్నించారు. అదే రోజు ప్రత్యేక కార్యనిర్వాహక మేజిస్ట్రేట్ ముందు విచారణ జరగాల్సి ఉండటంతో, పిటిషన్‌ను ఉపసంహరించుకుని అక్కడి నిర్ణయం కోసం వేచి చూడాలని సూచించారు.
గతంలో బాండ్లు సమర్పించినప్పటికీ, నిరసనలకు అనుమతించిన ప్రదేశంగా జంతర్ మంతర్‌ను తొలగించిన తర్వాత అక్కడికి తిరిగి వెళ్లారని న్యాయస్థానం పేర్కొంది. ఈ నిర్ణయాన్ని సవాలు చేస్తూ దాఖలైన పిటిషన్ సుప్రీంకోర్టులో పెండింగ్‌లో ఉందని, అయితే సంబంధిత నోటిఫికేషన్‌పై స్టే లేదని గుర్తుచేసింది. బారికేడ్లు దాటడం వంటి చర్యలతో మరింత మంది చేరి నిషేధాజ్ఞలను ఉల్లంఘించే ప్రమాదం ఉందని ఆందోళన వ్యక్తం చేసింది. ఇతర దేశాల్లో శాంతియుత నిరసనలు హింస, అగ్నిప్రమాదాలకు దారితీసిన ఘటనలను కూడా ప్రస్తావించింది. నిరసనల్లో అవాంఛనీయ వ్యక్తులు చేరకుండా పోలీసుల అనుమతులు కీలకమని పేర్కొంది.
అక్టోబర్ 13న జంతర్ మంతర్ వద్ద జరిగిన నిరసన ఈ కేసుకు కారణమైంది. అప్పటి నుంచి తాము కస్టడీలో ఉన్నామని, విడుదల కోసం పలుమార్లు హామీదారులను సమర్పించినా ప్రయోజనం లేకపోయిందని కార్యకర్తలు పేర్కొన్నారు. అక్టోబర్ 19న అదనపు హామీదారులు, బాండ్లు, ఫిక్స్‌డ్ డిపాజిట్ రసీదులు సిద్ధంగా ఉన్నప్పటికీ సమర్పించేందుకు అనుమతించలేదని ఆరోపించారు. పోలీసుల దరఖాస్తు ఆధారంగా నిర్దిష్ట కాలానికి కస్టడీ పొడిగించే స్వతంత్ర అధికారం BNSS సెక్షన్ 135(3) కల్పించలేదని వాదించారు. తమపై ఉన్న ఆరోపణలు గతంలో జరిగిన ఘటనలకు సంబంధించినవే తప్ప, తక్షణ ముప్పును నిరూపించలేవని తెలిపారు. ఢిల్లీ పోలీసుల తరఫున అదనపు సొలిసిటర్ జనరల్ చేతన్ శర్మ, న్యాయవాది ఆశిష్ దీక్షిత్ వాదనలు వినిపించగా, పిటిషనర్ల తరఫున అభిక్ చిమ్ని హాజరయ్యారు.
