Last Updated:
CJP Protest: జంతర్ మంతర్ వద్ద నిరసనకు పిలుపునిచ్చిన కాక్రోచ్ జనతా పార్టీ (CJP)కి ఢిల్లీ పోలీసులు గట్టి షాక్ ఇచ్చారు.
శనివారం (అక్టోబరు 10) ఇందిరా గాంధీ అంతర్జాతీయ విమానాశ్రయంలో ఎయిర్ ఇండియా విమానంలో ఉన్న ముగ్గురు కీలక సీజేపీ నేతలు అభిజిత్ దిప్కే, సౌరవ్ దాస్, అశుతోష్ రాంకాలను ఢిల్లీ పోలీసులు అదుపులోకి తీసుకున్నారు. జంతర్ మంతర్ ఆందోళన నేపథ్యంలో దేశ రాజధానిలో భద్రతను పటిష్టం చేసిన అధికారులు, వీరు ఢిల్లీలో అడుగుపెట్టగానే నిర్బంధించారు. ఎయిర్ ఇండియా విమానం ఏఐ 2428 (AI 2428)లో ప్రయాణిస్తున్న సమయంలో ఈ ముగ్గురు నేతలను పోలీసులు అదుపులోకి తీసుకున్నట్లు సంబంధిత వర్గాలు వెల్లడించాయి. అనంతరం వారిని వేర్వేరు ప్రాంతాల్లో ఉంచినట్లు సమాచారం.
రాజధానిలో ప్రస్తుత పరిస్థితి పూర్తిగా అదుపులోనే ఉందని ఢిల్లీ పోలీసు ఉన్నత వర్గాలు స్పష్టం చేశాయి. వివిధ ప్రాంతాల్లో అక్కడక్కడా దాదాపు 300 నుంచి 500 మంది మాత్రమే నిరసనకారులు గుమిగూడినట్లు, వారు కూడా కాసేపు ఉండి వెళ్లిపోతున్నట్లు అధికారులు అంచనా వేశారు. ఇప్పటివరకు ఎక్కడా ఎలాంటి హింసాత్మక ఘటనలు నమోదు కాలేదని, క్షేత్రస్థాయి సిబ్బంది సంయమనంతో వ్యవహరిస్తూ శాంతిభద్రతలను పర్యవేక్షిస్తున్నారని తెలిపారు.
విమానాశ్రయంలో పోలీసుల అదుపులోకి వెళ్లిన వెంటనే సీజేపీ వ్యవస్థాపకుడు అభిజిత్ దిప్కే ఇన్‌స్టాగ్రామ్‌లో ఒక వీడియోను పోస్ట్ చేశారు. పోలీసుల తీరుపై ఆయన తీవ్ర ఆగ్రహం వ్యక్తం చేశారు. “మేము శాంతియుతంగా నిరసన తెలపాలని మాత్రమే అనుకున్నాం. కానీ ఏదో నేరస్థులను పట్టుకున్నట్లుగా మమ్మల్ని విమానం లోపలికి వచ్చి అదుపులోకి తీసుకుంటున్నారు. మేము మీకేమీ భయపడటం లేదు. రండి, మమ్మల్ని అరెస్టు చేసుకోండి” అని ఆ వీడియోలో దిప్కే వ్యాఖ్యానించారు.
ఓటర్ల జాబితాల ప్రత్యేక సమగ్ర సవరణ (ఎస్‌ఐఆర్) ప్రక్రియను రద్దు చేయాలని, కేంద్ర ఎన్నికల ప్రధాన కమిషనర్ (సీఈసీ) జ్ఞానేశ్ కుమార్ వెంటనే రాజీనామా చేయాలని డిమాండ్ చేస్తూ సీజేపీ అక్టోబరు 10న జంతర్ మంతర్ వద్ద నిరసనకు పిలుపునిచ్చింది. అయితే, తీవ్రమైన శాంతిభద్రతల సమస్యలు తలెత్తే అవకాశం ఉందన్న కారణంతో పాటు గతంలో జూలై నెలలో జరిగిన నిరసన సందర్భంగా నిబంధనలను ఉల్లంఘించారని పేర్కొంటూ ఢిల్లీ పోలీసులు ఈ ఆందోళనకు అనుమతి నిరాకరించారు.
ఈ నేపథ్యంలో పోలీసులు నగరం అంతటా కట్టుదిట్టమైన భద్రతా ఏర్పాట్లు చేశారు. మార్కెట్లు, మెట్రో స్టేషన్ల వద్ద ఆంక్షలు విధించడంతో పాటు కొన్ని రైళ్ల రద్దు, నగరంలోని పలు ప్రాంతాల్లో ఇంటర్నెట్ సేవలపై నియంత్రణలు అమలు చేశారు. ఇతర రాష్ట్రాలు, కేంద్రపాలిత ప్రాంతాల నుంచి నిరసనకారులు ఢిల్లీకి చేరుకోకుండా నిరోధించేందుకు ఢిల్లీ పోలీసులతో సమన్వయం చేసుకోవాలని కేంద్ర హోంశాఖ ఇప్పటికే అన్ని రాష్ట్రాలకు ఆదేశాలు జారీ చేసింది. ప్రస్తుతం ఢిల్లీలో పరిస్థితి పూర్తిగా నియంత్రణలో ఉందని అధికారులు పునరుద్ఘాటించారు.
