Last Updated:
ప్రముఖ యూట్యూబ్ ఛానెల్ ఇంటర్వ్యూలో నిర్మాత చైతన్య రెడ్డి మాట్లాడుతూ డైరెక్టర్ పూరి జగన్నాథ్, సహ నిర్మాత ఛార్మి (Charmme Kaur) లపై సంచలన ఆరోపణలు చేశారు.
టాలీవుడ్ ఇండస్ట్రీలో ‘హనుమాన్’ (HanuMan) సినిమాతో సృష్టించిన సెన్సేషన్ అంతా ఇంతా కాదు. పాన్ ఇండియా స్థాయిలో భారీ విజయాన్ని అందుకున్న ఈ ఒక్క సినిమాతో ప్రైమ్ షో ఎంటర్‌టైన్‌మెంట్స్ (Prime Show Entertainment) బ్యానర్ పేరు దేశవ్యాప్తంగా మారుమోగిపోయింది. నిర్మాతలుగా, డిస్ట్రిబ్యూటర్లుగా నిరంజన్ రెడ్డి, చైతన్య రెడ్డి ఇండస్ట్రీలో అగ్రశ్రేణి నిర్మాణ సంస్థల సరసన చేరారు. ఈ భారీ విజయం తర్వాత వారు వరుస క్రేజీ ప్రాజెక్టులతో బిజీగా మారారు. అయితే, వీరి పంపిణీలో ఇటీవలే ప్రేక్షకుల ముందుకు వచ్చిన ‘డబుల్ ఇస్మార్ట్’ (Double iSmart) సినిమా వ్యవహారం ఇప్పుడు టాలీవుడ్‌లో పెద్ద దుమారం రేపుతోంది.
ఉస్తాద్ రామ్ పోతినేని హీరోగా, డైనమిక్ డైరెక్టర్ పూరి జగన్నాథ్ (Puri Jagannath) దర్శకత్వంలో వచ్చిన ‘డబుల్ ఇస్మార్ట్’ పై విడుదలకు ముందు భారీ అంచనాలు నెలకొన్నాయి. దీంతో ఈ సినిమా డిస్ట్రిబ్యూషన్ హక్కులను ప్రైమ్ షో ఎంటర్‌టైన్‌మెంట్స్ భారీ ధరకు దక్కించుకుంది. కానీ, బాక్సాఫీస్ వద్ద ఈ సినిమా దారుణంగా విఫలమై డిస్ట్రిబ్యూటర్లకు కన్నీళ్లు మిగిల్చింది. ఈ నేపథ్యంలో ఇటీవల ఒక ప్రముఖ యూట్యూబ్ ఛానెల్ ఇంటర్వ్యూలో చైతన్య రెడ్డి మాట్లాడుతూ డైరెక్టర్ పూరి జగన్నాథ్, సహ నిర్మాత ఛార్మి (Charmme Kaur) లపై సంచలన ఆరోపణలు చేశారు.
“డబుల్ ఇస్మార్ట్ సినిమా పంపిణీ హక్కులు తీసుకోవడం వల్ల మేము సుమారు రూ. 35 కోట్ల నుంచి రూ. 40 కోట్ల వరకు భారీగా నష్టపోయాము. పూరి జగన్నాథ్, ఛార్మి మమ్మల్ని దారుణంగా మోసం చేశారు” అని ఆమె ఆవేదన వ్యక్తం చేశారు. అసలు విషయం ఏమిటంటే.. సినిమా విడుదలకు ముందే పూరి, ఛార్మిల పాత సినిమాల ఫైనాన్షియల్ వ్యవహారాలు (లైగర్ సినిమా నష్టాలు తదితర సమస్యలు) ఇంకా క్లియర్ కాకపోవడంతో ప్రైమ్ షో సంస్థ ఈ ప్రాజెక్ట్ నుంచి పూర్తిగా తప్పుకోవాలని గట్టిగా నిర్ణయించుకుందట.
కానీ ఆ కీలక సమయంలో ఛార్మి, పూరి జగన్నాథ్ రోజూ గంటల తరబడి ఫోన్లు చేసి తీవ్ర స్థాయిలో ఎమోషనల్ బ్లాక్‌మెయిల్‌కు పాల్పడ్డారని చైతన్య రెడ్డి వెల్లడించారు. “మీరు ఈ సమయంలో మమ్మల్ని కాపాడకపోతే, మాకు ఇక చచ్చిపోవడం తప్ప వేరే ప్రత్యామ్నాయ మార్గం లేదు. దయచేసి సినిమా రిలీజ్ అవ్వనివ్వండి, ఆ తర్వాత వచ్చే నష్టాలను మేమే చూసుకుంటాం” అని వారు కన్నీళ్లు పెట్టుకుంటూ బతిమిలాడటంతో, మానవత్వంతో తాము కరిగిపోయి వారికి సాయం చేశామని ఆమె తెలిపారు. కానీ, సినిమా ప్లాప్ అయ్యి కోట్ల రూపాయల నష్టం వచ్చిన తర్వాత వారు తమ మాట నిలబెట్టుకోలేదని, తమను నట్టేట ముంచారని ఆమె వాపోయారు.
సినిమా పరిశ్రమలో డిస్ట్రిబ్యూషన్ అనేది ఎప్పుడూ కత్తిమీద సాము లాంటిదే అని ఈ ఉదంతం మరోసారి నిరూపించింది. నష్టాల భర్తీ విషయంలో పూరి, ఛార్మి భవిష్యత్తులో ఎలా స్పందిస్తారో చూడాలి. ఏది ఏమైనా, టాలీవుడ్‌లో చైతన్య రెడ్డి చేసిన ఈ వ్యాఖ్యలు ప్రస్తుతం హాట్ టాపిక్‌గా మారాయి.
