అంతేకాదు, కొన్ని సందర్భాల్లో మీ వ్యక్తిగత ఖాతాతో సంబంధం లేకుండానే క్రెడిట్ లిమిట్ తగ్గవచ్చు. బ్యాంకులు తమ మొత్తం క్రెడిట్ కార్డ్ పోర్ట్ఫోలియోను ఎప్పటికప్పుడు సమీక్షిస్తూ, మార్కెట్ పరిస్థితులు, అంతర్గత రిస్క్ పాలసీలు లేదా వ్యాపార వ్యూహాల ఆధారంగా రుణ నిబంధనలను కఠినతరం చేస్తాయి. అలాంటి సమయంలో మంచి చెల్లింపు చరిత్ర ఉన్న వినియోగదారులకూ క్రెడిట్ పరిమితి తగ్గే అవకాశం ఉంటుంది. క్రెడిట్ లిమిట్ తగ్గడం వల్ల మరో పరోక్ష ప్రభావం కూడా ఉంటుంది. ఉదాహరణకు, మీరు ప్రతి నెలా సగటున రూ.35,000 ఖర్చు చేస్తున్నారని అనుకుందాం. మీ క్రెడిట్ లిమిట్ రూ.2 లక్షల నుంచి రూ.70 వేలకే తగ్గితే, మీ ఖర్చు మారకపోయినా క్రెడిట్ వినియోగ నిష్పత్తి (Credit Utilization Ratio) ఒక్కసారిగా పెరుగుతుంది. ఈ నిష్పత్తి ఎక్కువగా ఉంటే, అది కాలక్రమేణా మీ క్రెడిట్ స్కోర్పై ప్రతికూల ప్రభావం చూపే అవకాశం ఉంది.
