Last Updated:
దేశ యువత భవిష్యత్తుపై ప్రధాని నరేంద్ర మోదీ కీలక వ్యాఖ్యలు చేశారు. మత్తు పదార్థాల అలవాటు యువత జీవితాలను నాశనం చేయకుండా దేశవ్యాప్తంగా ప్రత్యేక చర్యలు చేపట్టాలని మంత్రులు, ఉన్నతాధికారులకు సూచించారు.
దేశ యువతను మత్తు పదార్థాల బారిన పడకుండా కాపాడటమే లక్ష్యంగా కేంద్ర ప్రభుత్వం మరో కీలక కార్యాచరణకు సిద్ధమవుతోంది. అభివృద్ధి చెందిన భారతదేశం నిర్మాణంలో యువత పాత్ర ఎంతో ముఖ్యమని భావిస్తున్న ప్రధానమంత్రి నరేంద్ర మోదీ.. దేశాన్ని మత్తు పదార్థాల రహితంగా మార్చేందుకు ప్రత్యేక దృష్టి పెట్టాలని మంత్రులు, ఉన్నతాధికారులకు సూచించారు. నక్సలిజం, వామపక్ష తీవ్రవాదాన్ని అరికట్టడంలో ప్రభుత్వం సాధించిన విజయాన్ని ఇదే తరహాలో మత్తు పదార్థాలపై పోరాటానికి ఉపయోగించాలని పిలుపునిచ్చారు.
బుధవారం ఢిల్లీలోని భారత్ మండపంలో కేంద్ర మంత్రిమండలి సమావేశం జరిగింది. ఉదయం 10 గంటలకు ప్రారంభమైన ఈ భేటీ మధ్యాహ్నం 3 గంటల వరకు కొనసాగింది. కేంద్ర మంత్రులతో పాటు కార్యదర్శి స్థాయి ఉన్నతాధికారులు కూడా పాల్గొన్నారు. సుమారు 40 నిమిషాల పాటు మాట్లాడిన మోదీ.. దేశ భవిష్యత్తు అయిన పిల్లలు, యువత మత్తు పదార్థాలకు దూరంగా ఉండాలని ఆకాంక్షించారు. నషా ముక్త్ భారత్ సాధనకు అందరూ సమష్టిగా కృషి చేయాలని స్పష్టం చేశారు.
వామపక్ష తీవ్రవాదం, నక్సల్స్ హింసను నియంత్రించేందుకు ప్రభుత్వం ఏ స్థాయిలో ప్రయత్నాలు చేసిందో.. అదే పట్టుదలతో మాదకద్రవ్యాల సమస్యను కూడా ఎదుర్కోవాలని సూచించారు. ఈ ఏడాది ఆగస్టులోనే ‘నషా ముక్త్ యువ ఫర్ వికసిత్ భారత్ సంకల్ప్ అభియాన్’ కార్యక్రమాన్ని మోదీ ప్రారంభించిన విషయం తెలిసిందే.
ఈ సమావేశంలో దేశంలో తీవ్ర పేదరికం గణనీయంగా తగ్గిన అంశంపైనా చర్చ జరిగింది. ప్రపంచ బ్యాంకు ఇటీవల విడుదల చేసిన నివేదికకు సంబంధించిన వివరాలను ఆర్థిక వ్యవహారాల శాఖ కార్యదర్శి అనురాధ ఠాకూర్ పవర్పాయింట్ ప్రజెంటేషన్ ద్వారా వివరించారు. ఇటీవలి సంవత్సరాల్లో దేశ ఆర్థిక వృద్ధి, ప్రభుత్వ మూలధన వ్యయం, మౌలిక సదుపాయాల విస్తరణ పేదరికం తగ్గడానికి దోహదపడ్డాయని ఆమె పేర్కొన్నట్లు సమాచారం.
కేంద్రం, రాష్ట్ర ప్రభుత్వాల శాఖలు సమన్వయంతో చేపట్టిన చర్యల వల్లే ఈ ఫలితాలు సాధ్యమయ్యాయని వివరించారు. అనంతరం ఆరుగురికి పైగా వివిధ శాఖల కార్యదర్శులు పేదరిక నిర్మూలనకు సంబంధించి తమ అభిప్రాయాలను వెల్లడించారు. ప్రభుత్వ కార్యక్రమాల ద్వారా సుమారు 50 కోట్ల మంది పేదరికం నుంచి బయటపడేందుకు అవకాశం కలిగిందని వారు వివరించినట్లు తెలుస్తోంది.
ఆయుష్మాన్ భారత్ ప్రధానమంత్రి జన్ ఆరోగ్య యోజన, జల్ జీవన్ మిషన్, స్వచ్ఛ భారత్ మిషన్ వంటి కేంద్ర పథకాల ప్రభావాన్ని అధికారులు ప్రస్తావించారు. గ్రామీణ ఉపాధి, వ్యవసాయం, టెలికాం, ఆర్థిక సేవలను సామాన్యులకు అందుబాటులోకి తీసుకొచ్చే కార్యక్రమాల గురించి కూడా వివరించారు.
మరోవైపు, వామపక్ష తీవ్రవాదం, నక్సల్స్ హింసను అరికట్టడంలో సాధించిన పురోగతిపై కేంద్ర హోంశాఖ కార్యదర్శి గోవింద్ మోహన్ ప్రజెంటేషన్ ఇచ్చారు. ఈ సమస్యను నియంత్రించేందుకు ప్రభుత్వం అమలు చేసిన చర్యలు, సాధించిన విజయాలను సమావేశంలో వివరించారు.

