1. భాగస్వామి ప్రేమను పదేపదే పరీక్షించడం: మీ భాగస్వామికి మీపై ఎంత ప్రేమ ఉందో తెలుసుకోవడానికి కావాలనే మాట్లాడకుండా ఉండటం, ఫోన్ చేయకుండా వారి స్పందన కోసం ఎదురుచూడటం వంటివి చేస్తుంటారా? ఇలాంటి పరీక్షలు కొంతసేపు సంతోషాన్ని ఇచ్చినా, క్రమంగా ఇద్దరి మధ్య అపార్థాలను పెంచుతాయి. మీకు వారి నుంచి శ్రద్ధ, ప్రేమ కావాలనిపిస్తే దాన్ని నేరుగా చెప్పడం మంచిది.
2. సమస్య వచ్చినప్పుడు మౌనంగా ఉండిపోవడం: గొడవ జరిగిన ప్రతిసారీ మాట్లాడకుండా దూరంగా ఉండటం సమస్యను పరిష్కరించదు. కోపం తగ్గించుకోవడానికి కొంత సమయం తీసుకోవడం మంచిదే. అయితే మళ్లీ ఎప్పుడు మాట్లాడతారో చెప్పకుండా పూర్తిగా మౌనంగా ఉండిపోవడం భాగస్వామిని బాధపెట్టవచ్చు. కాబట్టి కొంత సమయం కావాలని చెప్పి, ఆ తర్వాత సమస్య గురించి ప్రశాంతంగా మాట్లాడండి.
3. చిన్న విషయాల గురించి అతిగా ఆలోచించడం: భాగస్వామి ఫోన్ చేయకపోయినా, మెసేజ్‌కు ఆలస్యంగా సమాధానం ఇచ్చినా వెంటనే అనుమానాలు పెంచుకోవద్దు. వారు పనిలో బిజీగా ఉండవచ్చు. ప్రతి విషయానికీ ప్రతికూల అర్థాలు వెతకకుండా, నిజం తెలుసుకోవడానికి నేరుగా మాట్లాడండి.
4. గత అనుభవాలను ప్రస్తుత బంధంతో పోల్చడం: గతంలో ఎదురైన మోసం లేదా బాధ కారణంగా కొత్త భాగస్వామిని కూడా అనుమానించడం సరికాదు. ప్రతి ఒక్కరూ ఒకేలా ఉండరు. గతాన్ని గుర్తుచేసుకుని ప్రస్తుత వ్యక్తిని పదేపదే ప్రశ్నించడం బంధంలో నమ్మకాన్ని తగ్గిస్తుంది.
5. ఎవరు ఎక్కువ చేశారో లెక్కలు వేయడం: ఎవరు ఎక్కువగా ఫోన్ చేశారు? ఎవరు క్షమాపణ చెప్పారు? ఎవరు ఎక్కువ ఖర్చు పెట్టారు? అంటూ లెక్కలు వేయడం వల్ల ప్రేమ పోటీగా మారుతుంది. ఇద్దరూ ఒకరికొకరు సహకరించుకోవడం, సమస్యలకు పరిష్కారం వెతకడం ముఖ్యం.
6. బంధం దగ్గరవుతున్నప్పుడు దూరంగా వెళ్లడం: భాగస్వామితో అనుబంధం పెరుగుతున్నప్పుడు కొందరికి భయం లేదా అసౌకర్యం కలగవచ్చు. తమ బలహీనతలు బయటపడతాయనే ఆలోచనతో భావాలను దాచుకుంటారు. అయితే ఇలా పదేపదే దూరం కావడం వల్ల భాగస్వామికి అపార్థాలు కలగవచ్చు. మీ భయాలను నెమ్మదిగా వారితో పంచుకోవడం మంచిది.
ఈ అలవాట్లను ఎలా మార్చుకోవాలి?
ముందుగా మీకు కోపం, బాధ లేదా అభద్రత కలిగించే పరిస్థితులను గుర్తించండి. వెంటనే స్పందించకుండా కాసేపు ఆగి ఆలోచించండి. మీ భావాలను మనసులో దాచుకోకుండా ప్రశాంతంగా చెప్పండి. భాగస్వామి మాటలను కూడా ఓపికగా వినండి. ఒకరినొకరు మార్చుకోవాలని ప్రయత్నించడం కంటే, పరస్పరం అర్థం చేసుకోవడానికి ప్రాధాన్యత ఇవ్వండి. గతంలో జరిగిన తప్పులను పదేపదే గుర్తుచేయకుండా, ప్రస్తుతం బంధాన్ని ఎలా మెరుగుపరచుకోవాలో ఆలోచించండి.
గుర్తుంచుకోండి.. మంచి సంబంధం అంటే ఎప్పుడూ గొడవలు లేకుండా ఉండటం కాదు. విభేదాలు వచ్చినప్పుడు కూడా ఒకరినొకరు గౌరవించుకుంటూ, మాట్లాడుకుని పరిష్కరించుకోవడమే నిజమైన అనుబంధానికి గుర్తు. ఈ అలవాట్లు మార్చుకోవడానికి ఇద్దరూ ప్రయత్నిస్తే బంధంలో నమ్మకం, ప్రేమ, ఆప్యాయత మరింత పెరుగుతాయి.
