సరోజ్ కుమార్ ఈ సినిమాకు హీరోగా మాత్రమే కాకుండా, తెరవెనుక కూడా కీలక బాధ్యతలు నిర్వహిస్తున్నారు. కథ, స్క్రీన్‌ప్లే, సంభాషణలు, పాటల సాహిత్యం, ఎడిటింగ్, సంగీతం, దర్శకత్వం వంటి విభాగాలను ఆయనే చూసుకుంటున్నారు. అంటే ఒక సినిమాకు అవసరమైన అనేక బాధ్యతలను తన భుజాలపై వేసుకుని ఈ ప్రాజెక్ట్‌ను తెరకెక్కిస్తున్నారు. BSK మెయిన్ స్ట్రీమ్ బ్యానర్‌పై సరోజ్, ప్రమోద్ పడమటి, పృథ్వీ చౌహాన్ సంయుక్తంగా ఈ చిత్రాన్ని నిర్మిస్తున్నారు.
‘ఛప్రి’ సినిమా కథ విషయానికి వస్తే.. ఓ మురికివాడలో నివసించే యువకుడి జీవితం, అతని ప్రేమ ప్రయాణం చుట్టూ ఈ కథ సాగుతుంది. సాధారణ జీవితాన్ని గడిపే ఓ కుర్రాడి జీవితంలోకి కొంతమంది ధనవంతులు ప్రవేశించడంతో పరిస్థితులు పూర్తిగా మారిపోతాయి. వారి వల్ల అతని జీవితం అనూహ్యమైన మలుపులు తిరుగుతుంది. ఈ క్రమంలో ఎదురయ్యే సమస్యలు, ప్రేమ కోసం అతను చేసే పోరాటం కథలో ఆసక్తికరంగా ఉండనున్నాయి.
ప్రేమను ప్రధాన అంశంగా తీసుకున్నప్పటికీ, కథలో యాక్షన్, భావోద్వేగాలకు కూడా ప్రాధాన్యత ఇచ్చినట్లు తెలుస్తోంది. తన ప్రేమను గెలిపించుకోవడానికి ఆ యువకుడు ఎలాంటి పరిస్థితులను ఎదుర్కొన్నాడు? అతని ప్రయాణంలో ఎదురైన సవాళ్లు ఏంటి? చివరకు ప్రేమలో విజయం సాధించాడా? లేదా? అనే అంశాలతో సినిమాను రూపొందిస్తున్నారు. ఒక స్లమ్ యువకుడి జీవితాన్ని విభిన్న కోణంలో చూపించే ప్రయత్నం చేస్తున్నట్లు కథాంశం చూస్తే అర్థమవుతోంది.
తాజాగా విడుదలైన ‘ఛప్రి’ ఫస్ట్ లుక్ పోస్టర్‌లో సరోజ్ కుమార్ పూర్తిగా కొత్త లుక్‌లో కనిపిస్తున్నారు. స్లమ్‌లో పెరిగిన యువకుడి పాత్రకు తగ్గట్టుగా రా అండ్ రస్టిక్ అవతారంలో దర్శనమిచ్చారు. పోస్టర్‌లో ఆయన కనిపిస్తున్న తీరు, యాక్షన్ మోడ్ ఈ సినిమాపై ఆసక్తిని పెంచుతున్నాయి. గత చిత్రాల్లో కనిపించిన పాత్రలకు భిన్నంగా ఈసారి సరికొత్త గెటప్‌లో ప్రేక్షకులను పలకరించబోతున్నారు.
ఈ సినిమాలో సరోజ్‌తో పాటు ఐశ్వర్య బోరా, దివ్య జ్యోతి, శ్లోకా, ప్రవీణ్, మోహన్ ఆర్య, జీవా బాలచందర్, ప్రియాంక సింగ్ తదితరులు కీలక పాత్రల్లో నటిస్తున్నారు. సినిమాటోగ్రఫీ బాధ్యతలను రమేష్ మర్రెపల్లి నిర్వహిస్తుండగా, ఆర్ట్ డైరెక్టర్‌గా నాని దేవరపల్లి పనిచేస్తున్నారు. పబ్లిసిటీ డిజైన్స్‌ను అనిల్, భాను రూపొందించారు. చీఫ్ ఎగ్జిక్యూటివ్ నిర్మాతగా ప్రవీణ్ గూడూరి వ్యవహరిస్తున్నారు. కాస్ట్యూమ్ డిజైనర్‌గా అజయ్ జాయ్ పనిచేస్తున్నారు. పీఆర్ఓలుగా ఏలూరు శ్రీను, మాడూరి మధు వ్యవహరిస్తున్నారు.
ప్రస్తుతం ‘ఛప్రి’ ఫస్ట్ లుక్‌తో ప్రేక్షకుల్లో ఆసక్తి పెంచిన చిత్ర బృందం.. త్వరలోనే సినిమాకు సంబంధించిన మరిన్ని వివరాలను వెల్లడించనుంది. మొత్తానికి నటనతో పాటు దర్శకత్వం, సంగీతం వంటి పలు విభాగాలను సరోజ్ కుమార్ స్వయంగా నిర్వహిస్తుండటంతో ఈ సినిమా ఎలా ఉండబోతుందనే ఆసక్తి నెలకొంది.
