Last Updated:
స్విట్జర్లాండ్‌లోని దావోస్ ప్రపంచ ఆర్థిక వేదిక సదస్సుకు తమిళనాడు ముఖ్యమంత్రి విజయ్ హాజరుకానున్నారు. రాష్ట్ర చరిత్రలోనే ఒక సిట్టింగ్ ముఖ్యమంత్రి ఈ సదస్సుకు వెళ్లడం ఇదే తొలిసారి కావడంతో సర్వత్రా ఆసక్తి నెలకొంది.
తమిళనాడు పారిశ్రామిక అభివృద్ధిని అంతర్జాతీయ స్థాయికి తీసుకెళ్లే లక్ష్యంతో ముఖ్యమంత్రి విజయ్ కీలక ముందడుగు వేశారు. స్విట్జర్లాండ్‌లోని దావోస్ నగరంలో జరగనున్న ప్రతిష్టాత్మక ప్రపంచ ఆర్థిక వేదిక (WEF) వార్షిక సదస్సుకు ఆయన హాజరుకానున్నారు. టీవీకే వర్గాలు ఈ విషయాన్ని అధికారికంగా ధ్రువీకరించాయి. తమిళనాడు రాజకీయ చరిత్రలో పదవిలో ఉన్న ఒక ముఖ్యమంత్రి దావోస్ సదస్సుకు వెళ్లడం ఇదే ప్రథమం. గతంలో డీఎంకే ప్రభుత్వ హయాంలో పరిశ్రమల మంత్రులు తంగం తెన్నరసు, టీఆర్‌బీ రాజా మాత్రమే ఈ సదస్సుకు హాజరయ్యారు.
తాజా పర్యటన ద్వారా ప్రపంచ దిగ్గజ సంస్థల అధినేతలతో సీఎం స్వయంగా సమావేశమై, రాష్ట్రంలో భారీ పెట్టుబడులు పెట్టేలా ఒప్పించనున్నారు. ఇటీవల లండన్ పర్యటన ముగించుకున్న విజయ్, ఇప్పుడు దావోస్ వేదికగా తమిళనాడును ప్రధాన ఆకర్షణగా నిలపాలని భావిస్తున్నారు.
పెట్టుబడుల ఆకర్షణ విషయంలో ప్రభుత్వం విఫలమవుతోందంటూ ప్రతిపక్షాలు చేస్తున్న విమర్శలను టీవీకే అధికార ప్రతినిధి ఎం. సత్యకుమార్ తీవ్రంగా ఖండించారు. విదేశీ పెట్టుబడులు రాబట్టడంలో కేంద్ర ప్రభుత్వం, విదేశాంగ శాఖల నుంచి తమిళనాడుకు తగిన సహకారం అందడం లేదని ఆరోపించారు. కేంద్రంలోని ఎన్డీయే కూటమిలో భాగస్వామిగా ఉన్న చంద్రబాబు నాయుడు నేతృత్వంలోని ఆంధ్రప్రదేశ్‌కు ఇస్తున్నంత ప్రాధాన్యతను తమిళనాడుకు ఇవ్వడం లేదని విమర్శించారు. అయితే ఈ ఆరోపణలను బీజేపీ తోసిపుచ్చింది.
కేంద్రం నుంచి ఆశించిన సహకారం లేనప్పటికీ, రాష్ట్ర ప్రభుత్వం స్వశక్తితో దాదాపు లక్ష కోట్ల రూపాయల విలువైన పెట్టుబడుల హామీలను సాధించగలిగిందని టీవీకే స్పష్టం చేసింది. ఈ ఒప్పందాలను త్వరితగతిన క్షేత్రస్థాయి పరిశ్రమలుగా మార్చడమే తమ ప్రధాన లక్ష్యమని తెలిపింది.
రాష్ట్రంలో ఇప్పటికే కార్యకలాపాలు సాగిస్తున్న పారిశ్రామిక సంస్థలు తమ వ్యాపారాలను మరింత విస్తరించేలా ప్రోత్సహించడం కూడా ఈ వ్యూహంలో భాగమని పేర్కొంది. దావోస్ వేదికపై విజయ్ పర్యటన ద్వారా అంతర్జాతీయ పెట్టుబడిదారుల్లో సరికొత్త భరోసా ఏర్పడుతుందని, తమిళనాడు సరికొత్త పారిశ్రామిక హబ్‌గా ఎదుగుతుందని ప్రభుత్వం ధీమా వ్యక్తం చేస్తోంది.
