చేతులు కడుక్కోవడం ఎందుకు ముఖ్యం? మనం రోజంతా మొబైల్ ఫోన్లు, డోర్ హ్యాండిల్స్, డబ్బులు, లిఫ్ట్ బటన్లు, ఇతర వస్తువులను తాకుతుంటాం. ఈ క్రమంలో వాటిపై ఉండే బ్యాక్టీరియా, వైరస్‌లు వంటి సూక్ష్మక్రిములు చేతులకు అంటుకుంటాయి. ఆ తర్వాత అదే చేతులతో కళ్లను, ముక్కును, నోటిని తాకినప్పుడు క్రిములు శరీరంలోకి ప్రవేశించి అనారోగ్యానికి కారణమవుతాయి. ముఖ్యంగా విరేచనాలు, జలుబు, దగ్గు వంటి ఇన్ఫెక్షన్లు వ్యాపించే ప్రమాదం ఉంటుంది. సబ్బుతో చేతులు శుభ్రంగా కడుక్కోవడం వల్ల అనేక రకాల క్రిములు తొలగిపోతాయి. పరిశుభ్రత పాటించడం ద్వారా విరేచనాల సమస్యలను సుమారు మూడింట ఒక వంతు, శ్వాసకోశ సంబంధిత ఇన్ఫెక్షన్లను సుమారు ఐదింట ఒక వంతు వరకు నివారించవచ్చని అధ్యయనాలు సూచిస్తున్నాయి.
చేతులు కడుక్కోవడానికి సరైన పద్ధతి ఇదే: ముందుగా శుభ్రమైన నీటితో చేతులను తడపాలి. ఆ తర్వాత సబ్బు రాసి బాగా నురుగు వచ్చేలా చేయాలి. కనీసం 20 సెకన్ల పాటు రెండు అరచేతులను ఒకదానికొకటి రుద్దాలి. చేతుల వెనుక భాగం, వేళ్ల మధ్య ఖాళీలు, బొటనవేళ్లు, గోళ్ల కింద ఉండే ప్రాంతాలు, మణికట్టులను కూడా శుభ్రం చేయాలి. చాలామంది అరచేతులను మాత్రమే కడిగి మిగతా భాగాలను పట్టించుకోరు. ఇది సరైన పద్ధతి కాదు. చేతుల్లోని అన్ని భాగాలను శుభ్రం చేసిన తర్వాత పారే నీటితో సబ్బు పూర్తిగా పోయే వరకు కడగాలి. చివరగా శుభ్రమైన టవల్ లేదా పేపర్ టవల్‌తో చేతులను తుడుచుకోవాలి.
ఈ సందర్భాల్లో తప్పనిసరిగా చేతులు కడుక్కోవాలి: భోజనం చేసే ముందు మాత్రమే కాకుండా, వంట చేయడానికి ముందు, వంట చేస్తున్నప్పుడు, ఆహార పదార్థాలను తాకిన తర్వాత కూడా చేతులు శుభ్రం చేసుకోవాలి. ముఖ్యంగా పచ్చి మాంసం, చేపలు, కోడిగుడ్లు వంటి వాటిని తాకిన వెంటనే చేతులు కడగాలి. చెత్తను తీసిన తర్వాత, ఇంటిని శుభ్రం చేసిన తర్వాత, పెంపుడు జంతువులను తాకిన తర్వాత కూడా సబ్బుతో చేతులు కడుక్కోవాలి. టాయిలెట్ ఉపయోగించిన తర్వాత, దగ్గినప్పుడు, తుమ్మినప్పుడు, ముక్కు తుడుచుకున్న తర్వాత చేతులను శుభ్రం చేసుకోవాలి. చిన్నపిల్లలకు డైపర్ మార్చిన తర్వాత, అనారోగ్యంతో ఉన్నవారికి సేవ చేసిన తర్వాత కూడా చేతులు కడుక్కోవడం తప్పనిసరి. బయటకు వెళ్లి ఇంటికి తిరిగి వచ్చినప్పుడు, ఇతరులు ఎక్కువగా తాకే వస్తువులను ఉపయోగించిన తర్వాత కూడా ఈ అలవాటు పాటించాలి.
సబ్బు, నీళ్లు లేకపోతే శానిటైజర్ వాడొచ్చా? బయట ఉన్నప్పుడు కొన్నిసార్లు సబ్బు, నీరు అందుబాటులో ఉండకపోవచ్చు. అలాంటి సందర్భాల్లో హ్యాండ్ శానిటైజర్ ఉపయోగించవచ్చు. అయితే అందులో కనీసం 60 శాతం ఆల్కహాల్ ఉండేలా చూసుకోవాలి. చేతులపై శానిటైజర్ రాసిన తర్వాత రెండు చేతులు, వేళ్ల మధ్య భాగాలు పూర్తిగా తడిసేలా రుద్దాలి. అవి ఆరిపోయే వరకు చేతులను రుద్దుతూనే ఉండాలి. అయితే చేతులపై మట్టి, జిడ్డు లేదా కనిపించే మురికి ఉన్నప్పుడు శానిటైజర్ కంటే సబ్బు, నీటితో కడుక్కోవడమే మంచిది. చిన్నపిల్లలు శానిటైజర్ ఉపయోగించేటప్పుడు పెద్దలు పర్యవేక్షించాలి. పొరపాటున దానిని మింగితే ప్రమాదం కలగవచ్చు కాబట్టి పిల్లలకు అందకుండా ఉంచాలి.
చేతులను అతిగా కడుక్కోవడం కూడా మంచిది కాదు: చేతుల పరిశుభ్రత ఎంత ముఖ్యమో, చర్మాన్ని కాపాడుకోవడం కూడా అంతే ముఖ్యం. అవసరానికి మించి తరచుగా చేతులు కడుక్కోవడం వల్ల చర్మంపై ఉండే సహజమైన నూనెలు తొలగిపోతాయి. దీనివల్ల చేతులు పొడిబారడం, చర్మం పగలడం, దురద రావడం వంటి సమస్యలు ఎదురవుతాయి. కొందరిలో ఎగ్జిమా వంటి చర్మ సమస్యలు కూడా ఎక్కువ కావచ్చు. అందుకే చేతులు కడిగిన తర్వాత మంచి మాయిశ్చరైజర్ రాసుకోవాలి. ముఖ్యంగా చర్మం సున్నితంగా ఉన్నవారు మృదువైన సబ్బులను ఉపయోగించడం మంచిది.
గుర్తుంచుకోండి: చేతులు కడుక్కోవడం చిన్న అలవాటే అయినప్పటికీ ఆరోగ్యాన్ని కాపాడుకోవడంలో ఎంతో కీలక పాత్ర పోషిస్తుంది. రోజూ సరైన పద్ధతిలో కనీసం 20 సెకన్ల పాటు చేతులు శుభ్రం చేసుకోవడం అలవాటు చేసుకోండి. ఈ అలవాటును కుటుంబ సభ్యులు, ముఖ్యంగా చిన్నపిల్లలకు కూడా నేర్పించండి. ఇలా చేయడం వల్ల వ్యక్తిగత పరిశుభ్రతతో పాటు కుటుంబ సభ్యుల ఆరోగ్యాన్ని కూడా కాపాడుకోవచ్చు.
