కందిపప్పు: 1 కప్పు
నాటు టమాటాలు: 3-4 (బాగా పండినవి, ముక్కలుగా కోసినవి)
ఉల్లిపాయ: 1 మీడియం సైజు (ముక్కలుగా తరిగినది)
పచ్చిమిరపకాయలు: 4-5 (నిలువుగా చీల్చినవి)
చింతపండు: చిన్న నిమ్మకాయ సైజు అంత (నానబెట్టినది)
పసుపు: పావు చిన్న చెంచా
కారం పొడి: 1 చిన్న చెంచా
కొత్తిమీర తరుగు: పావు కప్పు
ఉప్పు: రుచికి సరిపడా
నీళ్లు: 2 కప్పులు
నెయ్యి లేదా నూనె: 2 పెద్ద చెంచాలు
ఆవాలు: అర చిన్న చెంచా
జీలకర్ర: అర చిన్న చెంచా
మినప్పప్పు: అర చిన్న చెంచా
ఎండుమిరపకాయలు: 2-3 (తుంచినవి)
వెల్లుల్లి రెబ్బలు: 7-8 (కచ్చాపచ్చాగా దంచినవి)
కరివేపాకు: 2 రెమ్మలు
ఇంగువ: చిటికెడు
కందిపప్పును శుభ్రంగా కడిగి కుక్కర్‌లో వేయండి. అందులో తరిగిన టమోటా ముక్కలు, ఉల్లిపాయ, పచ్చిమిర్చి, పసుపు, కారం, నానబెట్టిన చింతపండు, రెండు కప్పుల నీళ్లు పోయండి. పప్పు పొంగిపోకుండా ఉండటానికి అర చెంచా నూనె కూడా వేసి కుక్కర్ మూతపెట్టండి. మీడియం మంటపై 3-4 విజిల్స్ రానిచ్చి స్టవ్ కట్టేయండి. ఆవిరి మొత్తం పోయిన తర్వాత మూత తీసి, రుచికి సరిపడా ఉప్పు వేసి పప్పుగుత్తితో మెత్తగా ఎనుపుకోండి (మరీ పేస్ట్‌లా కాకుండా టమోటా ముక్కలు కొద్దిగా తగిలేలా ఎనిపితే బాగుంటుంది). ఇప్పుడు చిన్న బాణలిలో నెయ్యి లేదా నూనె వేడి చేయండి. అందులో ఆవాలు, మినప్పప్పు, జీలకర్ర వేసి చిటపటలాడించండి. తర్వాత దంచిన వెల్లుల్లి రెబ్బలు వేసి లేత బంగారు రంగు వచ్చేవరకు వేపండి. ఆ వెంటనే ఎండుమిరపకాయ ముక్కలు, ఇంగువ, కరివేపాకు వేసి దోరగా వేయించి స్టవ్ కట్టేయండి. ఈ ఘుమఘుమలాడే తాళింపును ఎనిపి పెట్టుకున్న టమోటా పప్పులో పోసి బాగా కలపండి. చివరగా సన్నగా తరిగిన పచ్చి కొత్తిమీర చల్లుకుని ఒక్క నిమిషం చిన్న మంటపై ఉంచి దించేయండి. ఎంతో రుచికరమైన ఆంధ్రా స్టైల్ టమాటా పప్పు సిద్ధం.
వేడివేడి అన్నంలో నెయ్యి వేసుకుని, పక్కన ఆవకాయ లేదా ఏదైనా కూరగాయల వేపుడుతో నంజుకుని తింటే రుచి అమోఘం.
