Last Updated:
Trade Agreement: ప్రపంచంలోనే రెండు అతిపెద్ద ప్రజాస్వామ్య దేశాలైన భారత్, అమెరికాల మధ్య ప్రతిష్టాత్మక ద్వైపాక్షిక వాణిజ్య ఒప్పందం (Bilateral Trade Agreement – BTA) కొలిక్కి వస్తోంది.
ఇరు దేశాలు ఒక సమగ్ర వాణిజ్య ఒప్పందానికి ‘చాలా చేరువలో’ ఉన్నాయని అమెరికా అధ్యక్షుడు డొనాల్డ్ ట్రంప్ స్వయంగా ప్రకటించారు. ఈ ప్రతిపాదిత ఒప్పందం గతంలో కుదుర్చుకున్న ఒప్పందాల కంటే “పూర్తిగా భిన్నమైనది”గా ఉండబోతోందని ఆయన స్పష్టం చేశారు. మంగళవారం వైట్‌హౌస్‌లోని ఓవల్ ఆఫీస్‌లో విలేకరులతో మాట్లాడిన సందర్భంగా ట్రంప్ ఈ కీలక వ్యాఖ్యలు చేశారు. భారత్‌తో వాణిజ్య ఒప్పందం సమీపంలోనే ఉందా అని మీడియా ప్రతినిధులు ప్రశ్నించగా.. “భారత్ ఒప్పందం చేసుకోవాలని కోరుకుంటోంది. మేము కూడా ఒప్పందం చేసుకోబోతున్నాం. అవును, మేము ఒప్పందానికి చాలా దగ్గరగా ఉన్నాం. గతంలో కుదిరిన ఒప్పందాలతో పోలిస్తే ఇది సరికొత్త రీతిలో, విభిన్నంగా ఉండబోతోంది” అని ట్రంప్ వివరించారు.
కొద్ది వారాల్లోనే ఖరారు: యూఎస్ విదేశాంగ మంత్రి మార్కో రూబియో
మరోవైపు అమెరికా విదేశాంగ కార్యదర్శి మార్కో రూబియో భారత పర్యటనలో భాగంగా ఈ ఒప్పందంపై అత్యంత సానుకూల సంకేతాలు ఇచ్చారు. భారత్-యూఎస్ వాణిజ్య ఒప్పందం ‘ఊహించలేనంత చేరువలో’ ఉందని ఆయన అభివర్ణించారు. చర్చలు చివరి అంకానికి చేరుకున్నాయని, ప్రస్తుతం కొన్ని సాంకేతిక అంశాల (Technical Details) పరిష్కారంపై కసరత్తు జరుగుతోందని తెలిపారు.
నెట్‌వర్క్ 18తో రూబియో ప్రత్యేకంగా మాట్లాడుతూ.. చర్చలను యూఎస్ ట్రేడ్ రిప్రజెంటేటివ్ పర్యవేక్షిస్తున్నప్పటికీ, తాను నిరంతరం గమనిస్తున్నానని చెప్పారు. ఈ ఒప్పందం కొలిక్కి రావడానికి నెలల సమయం పట్టదని, కొద్ది వారాల్లోనే కార్యరూపం దాల్చే అవకాశం ఉందని ధీమా వ్యక్తం చేశారు. అయితే పూర్తిస్థాయిలో అధికారిక ప్రకటన వెలువడేవరకు ప్రతి చిన్న నిబంధనను క్షుణ్ణంగా సరిచూసుకోవడం అత్యంత కీలకమని ఆయన స్పష్టం చేశారు. “రెండు దేశాలు ఒకే విధమైన భాషా నిర్వచనాలపై ఏకీభవించాలి. ప్రకటనలో ఏమాత్రం తొందరపాటు ప్రదర్శించినా ఇరు దేశాల వ్యూహాత్మక సంబంధాలకు ఇబ్బంది కలగవచ్చు” అని ఆయన వివరించారు.
భారత విదేశాంగ మంత్రి ఎస్. జైశంకర్ ఆహ్వానం మేరకు మార్కో రూబియో అక్టోబర్ 20, 21 తేదీల్లో భారత్‌లో అధికారిక పర్యటన నిర్వహిస్తున్నారు. మంగళవారం ముంబైలో జైశంకర్, రూబియోల మధ్య సుదీర్ఘంగా ద్వైపాక్షిక చర్చలు జరిగాయి. వాణిజ్యం, రక్షణ, సాంకేతికత, ఇంధన భద్రత రంగాల్లో సంబంధాల బలోపేతంపై ఇరు నేతలు విస్తృతంగా చర్చించారు. ప్రతిపాదిత బిలేటరల్ ట్రేడ్ అగ్రిమెంట్ చర్చల్లో సాధించిన పురోగతిని ఇరు దేశాలు స్వాగతించాయని, దీనిని త్వరితగతిన పూర్తి చేయాలని పునరుద్ఘాటించాయని భారత విదేశాంగ మంత్రిత్వ శాఖ (MEA) అధికారిక ప్రకటనలో తెలిపింది.
యూఎస్ రాయబారి సెర్గియో గోర్ ముంబైలో నిర్వహించిన ‘యూఎస్ ఫ్రీడమ్ 250’ కార్యక్రమంలో జైశంకర్‌తో కలిసి రూబియో పాల్గొన్నారు. ఈ సందర్భంగా మాట్లాడుతూ భారత్-అమెరికా వ్యూహాత్మక బంధాన్ని ‘అసాధారణమైనది’గా అభివర్ణించారు. అన్ని అంశాల్లో ఇరు దేశాలు ఏకీభవించకపోవచ్చు కానీ, రాబోయే దశాబ్దాల పాటు ప్రపంచ రాజకీయాలను, ఆర్థిక వ్యవస్థను, అంతర్జాతీయ వాణిజ్యాన్ని నిర్దేశించే శక్తి ఈ బంధానికి ఉందని స్పష్టం చేశారు. అనంతరం ఆయన గుజరాత్‌లోని జామ్‌నగర్‌కు వెళ్లి ఇంధన సహకారంపై ప్రత్యేక చర్చలు జరపనున్నారు.
ఈ ఒప్పందానికి సంబంధించి భారత వాణిజ్య శాఖ మంత్రి పీయూష్ గోయల్ ఇప్పటికే అమెరికా ట్రేడ్ రిప్రజెంటేటివ్ జేమీసన్ గ్రీర్‌తో మిల్వాకీ, వాషింగ్టన్‌లలో కీలక చర్చలు జరిపారు. ఈ ఏడాది ఫిబ్రవరిలోనే మొదటి దశ ద్వైపాక్షిక వాణిజ్య ముసాయిదాపై ఇరు దేశాలు ప్రాథమిక నిర్ణయానికి వచ్చాయి. అయితే అమెరికా సుంకాల విధానంలో వచ్చిన మార్పుల నేపథ్యంలో మరోసారి విస్తృత సంప్రదింపులు జరిపి ఒప్పందాన్ని తుది రూపునకు తెచ్చారు.
