ప్రియుడి మోజులో కాబోయే భర్త దారుణ హత్య.. 20 ఏళ్ల తర్వాత ఆ హంతకురాలికి షాకిచ్చిన సర్కార్! |

గురువారం జరిగిన రాష్ట్ర మంత్రివర్గ సమావేశంలో ఈ కీలకమైన క్షమాభిక్ష అంశంపై మంత్రులు సుదీర్ఘంగా చర్చించారు. కాబోయే భర్తను పథకం ప్రకారం అత్యంత క్రూరంగా హత్య చేయించిన శుభ, ఆమె ప్రియుడికి 2010లో రాష్ట్ర హైకోర్టు యావజ్జీవ కారాగార శిక్ష విధించింది. ఈ శిక్షను రద్దు చేసి తమను విడుదల చేయాలని కోరుతూ వీరు సుప్రీం కోర్టును ఆశ్రయించగా.. క్షమాభిక్ష తుది నిర్ణయాన్ని రాష్ట్ర గవర్నర్‌ విచక్షణకు వదిలేస్తూ గతేడాది జులైలో అత్యున్నత న్యాయస్థానం తీర్పు ఇచ్చింది. సుప్రీం కోర్టు ఆదేశాల మేరకు త్వరలో గవర్నర్ తన నిర్ణయం ప్రకటించాల్సి ఉంది. ఈ నేపథ్యంలో కిరాతకులకు క్షమాభిక్షను కచ్చితంగా తిరస్కరించాలని గవర్నర్‌కు గట్టి సిఫార్సు చేస్తూ క్యాబినెట్ ఏకగ్రీవంగా తీర్మానం చేసింది.

ఈ సంచలన ఘటనపై లోతైన దర్యాప్తు చేపట్టిన పోలీసుల విచారణలో శుభ అసలు నిజాలు అంగీకరించింది. తనకు ఏమాత్రం ఇష్టం లేని వివాహాన్ని తల్లిదండ్రులను ఎదిరించి ధైర్యంగా చెప్పలేకపోయానని విచారణలో వెల్లడించింది. అటు ప్రాణంగా ప్రేమించిన ప్రియుడిని వదులుకోలేక, ఇటు ఇంట్లో వాళ్లను కాదనలేక ఏ పాపం ఎరుగని గిరీష్‌ను అత్యంత దారుణంగా పొట్టనపెట్టుకున్నట్లు పోలీసుల ముందు ఒప్పుకుంది. ఈ కేసులో ప్రధాన నిందితులుగా ఉన్న నలుగురికి జీవిత ఖైదు పడగా.. తాజా మంత్రివర్గ కఠిన నిర్ణయంతో వీరికి ఎలాంటి క్షమాభిక్ష దక్కే అవకాశం లేకుండా పోయింది. చట్టం ముందు నేరస్తులు తప్పించుకోలేరని ఈ తీర్మానం మరోసారి నిరూపించింది.