ది ఒడిస్సీ రివ్యూ.. ప్రపంచాన్నే ఊపేస్తోన్న ఈ సినిమా ఎలా ఉందంటే..! | తెలుగు సినిమా వార్తలు

దాదాపు పదేళ్ల పాటు సాగిన ట్రోజన్ యుద్ధంలో అద్భుతమైన తెలివితేటలతో విజయం సాధిస్తాడు ఒడిస్సియస్ (మాట్ డామన్). ఆ తర్వాత తన సైన్యంతో కలిసి తన సొంత రాజ్యమైన ఇథాకాకు సముద్ర మార్గంలో పయనం అవుతాడు. అక్కడ అతని రాక కోసం భార్య పెనెలోప్ (అన్నీ హాథవే), కొడుకు టెలిమాకస్ (టామ్ హాలెండ్) కళ్లు కాయలు కాచేలా ఎదురుచూస్తుంటారు. అయితే, ఒడిస్సియస్ ఇక తిరిగి రాడని, రాజ్యాన్ని హస్తగతం చేసుకోవాలని కుటిల బుద్ధి గల ఆంటినస్ (రాబర్ట్ పాటిన్సన్) పన్నంగాలు పన్నుతుంటాడు. పెనెలోప్‌ను తనను వివాహం చేసుకోవాలని నిత్యం వేధిస్తుంటాడు. పది రోజుల్లో ఇథాకాకు చేరాల్సిన ఒడిస్సియస్ ప్రయాణంలో దేవుళ్ల కోపం, సముద్రపు రాక్షసులు, భయంకరమైన సుడిగుండాలు ఎదురవుతాయి. ఈ ప్రకృతి ప్రకోపాన్ని, మాయలను దాటుకుని ఒడిస్సియస్ తన రాజ్యాన్ని, కుటుంబాన్ని ఎలా కాపాడుకున్నాడు అనేదే ఈ సినిమా మూల కథ.

రాజులు, రాక్షసులు, మంత్రాలు, ఇతిహాసాలు మన ప్రేక్షకులకు సుపరిచితమే. అయితే ఇలాంటి పాత కథను ఎంచుకున్నప్పుడు దర్శకుడు దానిని ఎలా ప్రెజెంట్ చేశాడు అనేదే ముఖ్యం. నోలన్ ఆ విషయంలో నూటికి నూరు శాతం సఫలమయ్యాడు. కథలో ఎలాంటి అతిశయోక్తులు లేకుండా, ప్రతి పాత్రకు ఒక బలమైన నాటకీయతను జోడించి ప్రేక్షకులను కథలో లీనమయ్యేలా చేశాడు.

ఒడిస్సియస్ పాత్రకు మాట్ డామన్ ప్రాణం పోశాడు. ఎలాంటి ఓవరాక్షన్ లేకుండా ఎమోషన్స్‌ను పండించి తన కెరీర్‌లోనే అత్యుత్తమ నటన కనబరిచాడు. రాణిగా అన్నీ హాథవే, కొడుకుగా టామ్ హాలెండ్ తమ పాత్రల్లో ఒదిగిపోయారు. నెగెటివ్ రోల్‌లో ఆంటినస్‌గా రాబర్ట్ పాటిన్సన్ కరుడుగట్టిన విలనిజాన్ని చూపించి ప్రేక్షకులను భయపెట్టాడు. సిర్సీగా సమంత మోర్టన్, అయోమయ కమాండర్‌గా ఏకైక భారతీయ నటుడు హిమేష్ పటేల్ అద్భుతంగా నటించి మెప్పించారు.

ఈ సినిమాకు అసలైన హీరో సినిమాటోగ్రాఫర్ హొయ్టే వన్ హొయ్టెమా. ఐమ్యాక్స్ 70ఎంఎం కెమెరాలతో మూడు గంటల పాటు సినిమాను చిత్రీకరించి విజువల్ వండర్‌గా మలిచాడు. రాక్షస అలలు, సుడిగుండాల దృశ్యాలు ఐమాక్స్ తెరపై చూస్తున్నప్పుడు థియేటర్లో ఎగిరి గంతేయడం ఖాయం. లుడ్విగ్ అందించిన బ్యాక్‌గ్రౌండ్ స్కోర్ మరో లెవెల్. సైలెంట్‌గా మొదలై క్లైమాక్స్‌లో థియేటర్ స్పీకర్లు బద్దలయ్యే రేంజ్‌లో మ్యూజిక్ ఇచ్చాడు. దీనికి మరో ఆస్కార్ ఖాయం అనిపిస్తుంది.