Panama Earthquake: పనామాలో భారీ భూకంపం.. 7.7 తీవ్రతతో వణికిపోయిన నగరం.. రోడ్లపైకి పరుగులు తీసిన జనం |

అమెరికా జియోలాజికల్ సర్వే (USGS) నివేదికల ప్రకారం.. పనామాలోని హెర్రెరా ప్రావిన్స్‌ పరిధిలోని పిటాలోజా అర్రిబా గ్రామానికి సమీపంలో భూకంప కేంద్రం కేంద్రీకృతమైంది. భూమి ఉపరితలం నుంచి సుమారు 12.6 కిలోమీటర్ల లోతులో ఈ భూకంపం చోటుచేసుకుంది. తొలుత భూకంప తీవ్రతను 8.0గా లెక్కించినప్పటికీ, ఆ తర్వాత శాస్త్రవేత్తలు క్షుణ్ణంగా విశ్లేషించి దానిని 7.7 తీవ్రతగా సవరించారు. లోతు తక్కువగా ఉండటం వల్ల ప్రకంపనల తీవ్రత భూమిపై భారీగా ప్రభావం చూపింది.

ఉపరితలం ఒక్కసారిగా ఊగిపోవడంతో ప్రజలు నిశ్చేష్టులయ్యారు. ఏం జరుగుతుందో తెలుసుకునే లోపే భవనాలు బలంగా కదలడంతో ప్రాణాలు కాపాడుకునేందుకు బయటకు పరుగులు పెట్టారు. ముఖ్యంగా పనామా సిటీలోని ప్రముఖ ‘టౌన్ సెంటర్ మాల్’ నుంచి వందలాది మంది ప్రజలు భయంతో కేకలు వేస్తూ రోడ్లపైకి చేరుకుంటున్న దృశ్యాలు సోషల్ మీడియాలో వైరల్‌గా మారాయి. బహుళ అంతస్తుల భవనాల నుంచి ప్రజలు ఖాళీ చేసి సురక్షితమైన మైదానాలు, రోడ్లపై గుమిగూడారు.

ప్రధాన భూకంపం తర్వాత కూడా భూమి నిరంతరం కంపిస్తూనే ఉంది. ఇప్పటివరకు 40కి పైగా తీవ్రమైన అనంతర ప్రకంపనలు నమోదైనట్లు అధికారులు వెల్లడించారు. వరుస ప్రకంపనల వల్ల ప్రజల్లో భయాందోళనలు మరింత పెరిగాయి. రానున్న గంటల్లో మరిన్ని ఆఫ్టర్‌షాక్స్ వచ్చే ప్రమాదం ఉన్నందున స్థానికులు బలహీనమైన నిర్మాణాల వద్దకు వెళ్లరాదని, పూర్తి అప్రమత్తతతో సురక్షిత ప్రాంతాల్లో ఉండాలని అధికారులు హెచ్చరికలు జారీ చేశారు.

ఈ పెను విపత్తు కారణంగా ప్రాథమిక సమాచారం మేరకు ఇద్దరు వ్యక్తులు మరణించినట్లు తెలుస్తోంది. పలు ప్రాంతాల్లో భారీ భవనాలు పగుళ్లు బారగా, రహదారులు నెర్రెలు బారాయి. పలు చోట్ల రవాణా, విద్యుత్ సరఫరాకు తీవ్ర అంతరాయం కలిగింది. విపత్తు నిర్వహణ సంస్థలు, సహాయక బృందాలు వెంటనే రంగంలోకి దిగి శిథిలాల తొలగింపు చర్యలను ప్రారంభించాయి. ఆస్తి, ప్రాణనష్టాల పూర్తి స్థాయి వివరాలను అధికారులు అంచనా వేస్తున్నారు.