Last Updated:
టాలీవుడ్ స్టార్ హీరో జూనియర్ ఎన్టీఆర్ షూటింగ్ సందర్భంగా భుజానికి గాయపడ్డారు. వైద్యులు 6 నుంచి 8 వారాల విశ్రాంతి సూచించగా, రాబోయే చిత్రాల షూటింగ్లు తాత్కాలికంగా వాయిదా పడ్డాయి. పవన్ కళ్యాణ్, బాలకృష్ణ, రామ్ చరణ్ గాయాల తర్వాత మరో స్టార్ హీరోకు గాయం కావడం చర్చనీయాంశమైంది.
టాలీవుడ్ స్టార్ హీరో, “మ్యాన్ ఆఫ్ మాసెస్” జూనియర్ ఎన్టీఆర్ (Jr NTR) స్వల్పంగా గాయపడినట్లు ఆయన వ్యక్తిగత బృందం అధికారికంగా వెల్లడించింది. సోమవారం సాయంత్రం జరిగిన ఓ సినిమా షూటింగ్ సందర్భంగా ప్రమాదవశాత్తు ఆయన భుజానికి గాయం అయినట్లు తెలిపింది. వెంటనే అప్రమత్తమైన చిత్ర యూనిట్ సభ్యులు ఎన్టీఆర్ను ఆస్పత్రికి తరలించగా, వైద్యులు పరీక్షించి అవసరమైన చికిత్స అందించారు. ప్రస్తుతం ఆయన ఆరోగ్యం నిలకడగా ఉందని, అభిమానులు ఎలాంటి ఆందోళన చెందాల్సిన అవసరం లేదని ఎన్టీఆర్ టీమ్ స్పష్టం చేసింది.
ఎన్టీఆర్కు నగరానికి చెందిన ప్రముఖ ఆర్థోపెడిక్ నిపుణులు డా. జె. మధుసూదన్ రావు, డా. ఆర్.ఏ. పూర్ణచంద్ర తేజస్వి నేతృత్వంలోని వైద్య బృందం చికిత్స అందిస్తోంది. పరీక్షల అనంతరం భుజానికి విశ్రాంతి అవసరమని నిర్ధారించిన వైద్యులు, పూర్తిగా కోలుకోవడానికి కనీసం 6 నుంచి 8 వారాల పాటు విశ్రాంతి తీసుకోవాలని సూచించినట్లు అధికారిక ప్రకటనలో పేర్కొన్నారు.
We regret to inform everyone that Mr. NTR ( @tarak9999 ) sustained an unfortunate shoulder injury earlier this evening.
Following a thorough medical evaluation, the team of doctors headed by Dr. J. Madhusudan Rao and Dr. R. A. Purnachandra Tejaswi has advised complete rest for… pic.twitter.com/AlusvIHGIx— …. (@ynakg2) July 27, 2026
వైద్యుల సూచనల మేరకు ఎన్టీఆర్ తన రాబోయే చిత్రాల షూటింగ్లకు తాత్కాలికంగా విరామం ఇవ్వనున్నట్లు సమాచారం. పూర్తిస్థాయిలో కోలుకున్న తర్వాతే తిరిగి సెట్స్లోకి అడుగుపెట్టనున్నారని ఆయన సన్నిహిత వర్గాలు చెబుతున్నాయి. ప్రస్తుతం చికిత్సతో పాటు విశ్రాంతిపై దృష్టి సారిస్తున్నారని, ఆయన ఆరోగ్య పరిస్థితికి సంబంధించిన తాజా సమాచారం అధికారికంగా ఎప్పటికప్పుడు వెల్లడిస్తామని టీమ్ తెలిపింది.
ఎన్టీఆర్ గాయపడిన వార్త బయటకు రావడంతో అభిమానులు ఒక్కసారిగా ఆందోళనకు గురయ్యారు. అయితే ఆయన ఆరోగ్యం ప్రమాదకరంగా లేదని స్పష్టత రావడంతో అభిమానులు ఊపిరి పీల్చుకున్నారు. సోషల్ మీడియా వేదికల్లో #GetWellSoonNTR, #StayStrongNTR వంటి హ్యాష్ట్యాగ్లతో లక్షలాది మంది అభిమానులు త్వరగా కోలుకోవాలని ఆకాంక్షిస్తూ సందేశాలు పోస్టు చేస్తున్నారు. సినీ ప్రముఖులు, శ్రేయోభిలాషులు కూడా ఆయన త్వరగా కోలుకోవాలని కోరుతున్నారు.
ఇటీవల టాలీవుడ్లో యాక్షన్ సన్నివేశాల చిత్రీకరణ సమయంలో పలువురు స్టార్ హీరోలు గాయపడటం చర్చనీయాంశంగా మారింది. ఆంధ్రప్రదేశ్ ఉప ముఖ్యమంత్రి, నటుడు పవన్ కళ్యాణ్ కూడా ఇటీవల సినిమా షూటింగ్ సమయంలో భుజానికి గాయపడటంతో శస్త్రచికిత్స చేయించుకున్నారు. వైద్యుల సూచనల మేరకు కొంతకాలం విశ్రాంతి తీసుకున్న తర్వాతే ఆయన మళ్లీ ప్రభుత్వ కార్యక్రమాలు, సినిమా పనుల్లో పాల్గొన్నారు.
అదేవిధంగా నందమూరి బాలకృష్ణ కూడా ఇటీవల ఓ సినిమా యాక్షన్ సీక్వెన్స్ చిత్రీకరణ సందర్భంగా గాయపడ్డారు. అనంతరం ఆయనను హైదరాబాద్లోని ఏఐజీ ఆస్పత్రికి తరలించి చికిత్స అందించారు. ప్రస్తుతం వైద్యుల పర్యవేక్షణలో కోలుకుంటున్నట్లు సమాచారం. అలాగే గ్లోబల్ స్టార్ రామ్ చరణ్ కూడా గతంలో షూటింగ్ సమయంలో భుజానికి గాయపడటంతో శస్త్రచికిత్స చేయించుకోవాల్సి వచ్చింది. విశ్రాంతి అనంతరం ఫిజియోథెరపీ పూర్తి చేసి తిరిగి షూటింగ్లలో పాల్గొన్నారు. ఈ వరుస సంఘటనలు యాక్షన్ సన్నివేశాల చిత్రీకరణలో భద్రతా ప్రమాణాలపై మరోసారి చర్చకు దారితీశాయి.
జూనియర్ ఎన్టీఆర్ విషయంలో కూడా వైద్యులు పూర్తి విశ్రాంతినే సూచించిన నేపథ్యంలో ఆయన ఆరోగ్యానికి ప్రాధాన్యం ఇస్తూ షూటింగ్లను వాయిదా వేయాలని నిర్ణయించినట్లు తెలుస్తోంది. ప్రస్తుతం ఆయన ఆరోగ్య పరిస్థితి స్థిరంగా ఉందని, అభిమానులు ఆందోళన చెందాల్సిన అవసరం లేదని ఎన్టీఆర్ కార్యాలయం మరోసారి స్పష్టం చేసింది. ఆయన కోలుకునే ప్రక్రియకు సంబంధించిన ప్రతి అప్డేట్ను అధికారికంగా వెల్లడిస్తామని కూడా తెలిపింది. అభిమానుల ప్రార్థనలు, శుభాకాంక్షల మధ్య ఎన్టీఆర్ త్వరగా పూర్తిస్థాయిలో కోలుకుని మళ్లీ కెమెరా ముందుకు రావాలని సినీ వర్గాలు ఆశాభావం వ్యక్తం చేస్తున్నాయి.
Click here to add News18 as your preferred news source on Google. సినిమా న్యూస్, మూవీ అప్డేట్స్, సినిమా రివ్యూస్, OTT అప్డేట్స్, టీవీ షోస్, రియాల్టీ షోస్, వెబ్స్టోరీస్ ఈ కేటగిరీలో చూడొచ్చు. న్యూస్ 18 తెలుగులో లేటెస్ట్ ఎంటర్టైన్మెంట్ అప్డేట్స్ చదవండి. మరిన్ని వార్తల కోసం న్యూస్ 18 తెలుగు ఫాలో అవండి.
Hyderabad,Telangana
Jul 27, 2026 10:08 PM IST
