Last Updated:
సూపర్‌స్టార్ రజినీకాంత్, కోలీవుడ్ డైరెక్టర్ నెల్సన్ దిలీప్‌ కుమార్ క్రేజీ కాంబినేషన్‌లో వచ్చిన మోస్ట్ అవేటెడ్ సీక్వెల్ ‘జైలర్ 2’ బాక్సాఫీస్ వద్ద సరికొత్త చరిత్ర సృష్టించింది. గురువారం (అక్టోబర్ 15న) ప్రపంచవ్యాప్తంగా భారీ అంచనాల నడుమ థియేటర్లలోకి వచ్చిన ఈ చిత్రం భారీ వసూళ్లు రాబట్టింది.
సూపర్‌స్టార్ రజినీకాంత్, కోలీవుడ్ డైరెక్టర్ నెల్సన్ దిలీప్‌ కుమార్ క్రేజీ కాంబినేషన్‌లో వచ్చిన మోస్ట్ అవేటెడ్ సీక్వెల్ ‘జైలర్ 2’ బాక్సాఫీస్ వద్ద సరికొత్త చరిత్ర సృష్టించింది. గురువారం (అక్టోబర్ 15న) ప్రపంచవ్యాప్తంగా భారీ అంచనాల నడుమ థియేటర్లలోకి వచ్చిన ఈ చిత్రం.. తొలిరోజే వసూళ్ల సునామీ సృష్టించి రజినీ, మాస్ స్టామినాను మరోసారి నిరూపించింది. ట్రేడ్ వర్గాల అంచనాలను మించిపోయి, విడుదలైన మొదటి రోజే ఈ యాక్షన్ ఎంటర్‌టైనర్ ప్రపంచవ్యాప్తంగా ఏకంగా రూ.125.25 కోట్ల గ్రాస్ వసూళ్లను రాబట్టింది.
ప్రముఖ బాక్సాఫీస్ ట్రాకింగ్ సంస్థ సాక్‌నిల్క్ (Sacnilk) నివేదిక ప్రకారం.. ‘జైలర్ 2’ భారతీయ మార్కెట్లో తొలి రోజు రూ.70.25 కోట్ల గ్రాస్ కలెక్షన్లను సాధించింది (నెట్ వసూళ్లు రూ.59.70 కోట్లు). దేశవ్యాప్తంగా మొదటి రోజు ఏకంగా 16,599 షోలు ప్రదర్శితం కాగా, సుమారు 37.46 లక్షల మంది సినీ ప్రియులు ఈ చిత్రాన్ని వీక్షించినట్లు ట్రేడ్ పండితులు వెల్లడించారు. ఓవర్సీస్ మార్కెట్‌లోనూ తలైవా హవా ఏమాత్రం తగ్గలేదు. విదేశాల్లో మొదటి రోజే ఈ చిత్రం ఏకంగా రూ.55 కోట్ల గ్రాస్ వసూళ్లను కొల్లగొట్టి గ్లోబల్ బాక్సాఫీస్‌ను షేక్ చేసింది.
భాషల వారీగా వసూళ్లను పరిశీలిస్తే.. తమిళ వెర్షన్ బాక్సాఫీస్ వద్ద తిరుగులేని ఆధిపత్యాన్ని ప్రదర్శించింది. తమిళనాడు వ్యాప్తంగా 9,326 షోలకు గానూ 70.8 శాతం ఆక్యుపెన్సీతో ఏకంగా రూ.43.35 కోట్ల నెట్ కలెక్షన్లు సాధించింది. తెలుగు రాష్ట్రాల్లోనూ రజనీకాంత్‌కు ఉన్న మార్కెట్ పదిలంగా ఉందని ఈ వసూళ్లు నిరూపించాయి. తెలుగు వెర్షన్ 2,792 షోలలో 56.2 శాతం ఆక్యుపెన్సీ నమోదు చేసి రూ.12.50 కోట్ల నెట్ రాబట్టింది. ఇక నార్త్ బెల్ట్‌లో హిందీ వెర్షన్ రూ.3.50 కోట్లు, కన్నడ వెర్షన్ రూ.35 లక్షల నెట్ కలెక్షన్లు సాధించాయి.
రజనీకాంత్ సినీ కెరీర్‌లోనే ‘జైలర్ 2’ రెండవ అతిపెద్ద ఓపెనర్‌గా రికార్డులకెక్కింది. గతంలో వచ్చిన ‘కూలీ’ చిత్రం తొలిరోజు ప్రపంచవ్యాప్తంగా రూ.151.75 కోట్ల గ్రాస్ వసూళ్లతో అగ్రస్థానంలో కొనసాగుతోంది. గమనార్హం ఏమిటంటే, 2023లో వచ్చిన ‘జైలర్’ మొదటి భాగం తొలి రోజు రూ.48.35 కోట్ల వసూళ్లను మాత్రమే సాధించింది. ఇప్పుడు దానికి మూడు రెట్లు అధికంగా సీక్వెల్ ఓపెనింగ్స్ సాధించడం ఈ ఫ్రాంచైజీపై ఉన్న క్రేజ్‌కు అద్దం పడుతోంది.
దర్శకుడు నెల్సన్ దిలీప్‌కుమార్ మార్క్ డార్క్ హ్యూమర్, గూస్‌బంప్స్ తెప్పించే యాక్షన్ ఎలివేషన్లతో రజనీకాంత్ స్క్రీన్ ప్రెజెన్స్ అభిమానులకు పూనకాలు తెప్పిస్తోంది. దీనికి తోడుగా మోహన్‌లాల్, శివరాజ్‌కుమార్, జాకీ ష్రాఫ్ వంటి హేమాహేమీలు స్క్రీన్ షేర్ చేసుకోవడం, బాలీవుడ్ స్టార్ హృతిక్ రోషన్ స్పెషల్ క్యామియో సినిమా స్థాయిని అమాంతం పెంచేశాయి. ఈ బ్లాక్‌బస్టర్ పాజిటివ్ టాక్‌తో, వీకెండ్‌లో ‘జైలర్ 2’ మరెన్నో వసూళ్ల రికార్డులను బద్దలు కొట్టడం ఖాయంగా కనిపిస్తోంది.
