అకౌంట్ హోల్డర్, నామినీ ఇద్దరూ మరణిస్తే ఏం జరుగుతుంది? అనే సందేహం ఉండటం మామూలే. ఈ పరిస్థితిలో డబ్బు ఎవరికి అందుతుందనేది నామినీ డబ్బును ఇప్పటికే స్వీకరించారా లేదా అనే అంశంపై ఆధారపడి ఉంటుంది. నామినీ ముందుగా బ్యాంకు నుంచి డబ్బును తీసుకుని, ఆ తర్వాత మరణించినట్లయితే, ఆ మొత్తం నామినీ ఆస్తిలో భాగంగా కనిపించవచ్చు. అయితే, అసలు అకౌంట్ హోల్డర్‌కు చెందిన చట్టబద్ధ వారసులు తమ హక్కును క్లెయిమ్ చేయవచ్చు. ఇలాంటి సందర్భాల్లో రెండు కుటుంబాల మధ్య వివాదాలు తలెత్తి, అవి పరిష్కారం కావడానికి ఎక్కువ సమయం పట్టే అవకాశం ఉంటుంది. అకౌంట్ హోల్డర్, నామినీ ఇద్దరూ డబ్బు విడుదల కాకముందే మరణిస్తే, నామినేషన్ ద్వారా డబ్బును స్వీకరించే వ్యక్తి అందుబాటులో ఉండరు. అప్పుడు బ్యాంక్ అకౌంట్ హోల్డర్ చట్టబద్ధ వారసులను సంప్రదిస్తుంది. వారసులు తమ హక్కును నిరూపించడానికి అవసరమైన పత్రాలను సమర్పించాల్సి ఉంటుంది. వీటిలో పరిస్థితిని బట్టి మరణ ధ్రువీకరణ పత్రాలు, లీగల్ హెయిర్ సర్టిఫికేట్ లేదా సక్సెషన్ సర్టిఫికేట్, వీలునామా ఉంటే ప్రొబేట్‌కు సంబంధించిన పత్రాలు, కేవైసీ పత్రాలు, ఇండెమ్నిటీ పత్రాలు ఉండవచ్చు. అవసరమైన పత్రాలను సమర్పించి, బ్యాంకు తనిఖీ ప్రక్రియ పూర్తయిన తర్వాతే డబ్బు విడుదల అవుతుంది. (ప్రతీకాత్మక చిత్రం)
