హే చికీతా మూవీ రివ్యూ.. ఈ పల్లెటూరి ప్రేమకథ ఎలా ఉందంటే..! | తెలుగు సినిమా వార్తలు

కథా నేపథ్యం:

నాగనూరు, లచ్చక్క పేట అనే రెండు గ్రామాల నేపథ్యంలో ఈ కథ నడుస్తుంది. చదువు అబ్బక, ఊర్లోనే వ్యవసాయం చేసుకునే ముక్కుసూటి కుర్రాడు శివ (అభినవ్). అతనికి చిట్టి (దివిజ), పొట్టి (తన్మయ్) అని ఇద్దరు మరదళ్లు. శివ, చిట్టి చిన్నప్పటి నుంచే గాఢంగా ప్రేమించుకుంటారు. కానీ, చిట్టి తండ్రి మాత్రం ప్రభుత్వ ఉద్యోగం ఉన్నవాడికే తన కూతురిని ఇచ్చి పెళ్లి చేస్తానని పట్టుబడతాడు. వ్యవసాయం చేసేవాడికి పిల్లనివ్వనని భీష్మించుకు కూర్చుంటాడు. ఈలోపు ఊళ్లో జరిగిన ఓ గొడవలో కత్తితో దాడి చేసిన శివ జైలు పాలవుతాడు. జైలు నుంచి వచ్చిన శివ తన ప్రేమను ఎలా దక్కించుకున్నాడు? అన్నదే ఈ చిత్ర ఇతివృత్తం.

విశ్లేషణ:

దర్శకుడు ధన్‌రాజ్ యూత్‌ఫుల్ ప్రేమకథకు, ‘రైతే రాజు’ అనే బలమైన సామాజిక సందేశాన్ని జోడించి ఈ చిత్రాన్ని తెరకెక్కించిన తీరు అభినందనీయం. ఆరంభంలో పాత్రల పరిచయంతో కాస్త నెమ్మదిగా సాగినప్పటికీ, హీరో గ్యాంగ్ అల్లరి, బావామరదళ్ల మధ్య వచ్చే సన్నివేశాలు వినోదాన్ని పంచుతాయి. వినాయక నిమజ్జనం గొడవలతో వచ్చే ఇంటర్వెల్ బ్యాంగ్ ద్వితీయార్థంపై ఆసక్తిని పెంచుతుంది. ముఖ్యంగా సెకండాఫ్‌లో రైతుల కష్టాలు, వ్యవసాయం గొప్పదనం, వారిపై సమాజంలో ఉన్న చిన్నచూపును కళ్లకు కట్టినట్లు చూపించిన సన్నివేశాలు ప్రేక్షకుడిని కంటతడి పెట్టిస్తాయి. ఎక్కడా అసభ్యతకు తావులేకుండా, కుటుంబ సమేతంగా చూసేలా సినిమాను రూపొందించారు.

నటీనటులు & సాంకేతిక వర్గం:

శివ పాత్రలో అభినవ్ పక్కింటి కుర్రాడిలా ఒదిగిపోయాడు. దివిజ, తన్మయ్ తమ పాత్రలకు పూర్తి న్యాయం చేశారు. రాజన్నగా దేవి ప్రసాద్, కల్లు మామ పాత్రలు కథలో కీలకంగా నిలుస్తాయి. సాంకేతికంగా ‘గరుడవేగ’ అంజి కెమెరా వర్క్ పల్లెటూరి అందాలను సహజంగా బంధించింది. చరణ్ అర్జున్ సంగీతం, బ్యాక్‌గ్రౌండ్ స్కోర్ సినిమాకు ప్రాణం పోశాయి. నిర్మాణ విలువలు ఎక్కడా రాజీ పడకుండా చాలా ఉన్నతంగా ఉన్నాయి.

ఓవరాల్‌గా చెప్పాలంటే.. యూత్‌ఫుల్ ఎలిమెంట్స్‌తో పాటు మంచి సామాజిక సందేశం ఉన్న చక్కటి కుటుంబ కథా చిత్రం ఈ ‘హే చికీతా’.

రేటింగ్: 2.75