Last Updated:
రేపు రైలు ప్రయాణం చేస్తున్నారా? అయితే ఈ వార్త మీకోసమే.. పలు రైళ్లు రద్దు, దారి మళ్లింపు!
బంగాళాఖాతంలో విరుచుకుపడుతున్న తీవ్ర తుపాను ‘అక్వాన్’ ప్రభావం కేవలం తీర ప్రాంతాలకే పరిమితం కాలేదు, ఇప్పుడు రైల్వే పట్టాలపైనా స్పష్టంగా కనిపిస్తోంది. రేపు రైలు ప్రయాణం చేయాలనుకునే వారికి రైల్వే శాఖ కీలక హెచ్చరిక జారీ చేసింది. తుపాను తీవ్రత, ప్రయాణికుల భద్రతను దృష్టిలో ఉంచుకుని ముందుజాగ్రత్త చర్యగా పలు ప్యాసింజర్ రైళ్లను రద్దు చేయడంతో పాటు, ఓ ప్రధాన ఎక్స్ప్రెస్ రైలును దారి మళ్లిస్తున్నట్లు దక్షిణ కోస్తా రైల్వే (South Coast Railway) సీపీఆర్ఓ బాలాజీ కిరణ్ అధికారికంగా ప్రకటించారు.
రైల్వే శాఖ విడుదల చేసిన తాజా వివరాల ప్రకారం, నవంబర్ 20వ తేదీన నడవాల్సిన నాలుగు ముఖ్యమైన ప్యాసింజర్ రైళ్లను పూర్తిస్థాయిలో రద్దు చేశారు. వీటిలో విశాఖపట్నం నుంచి గుణుపూర్ వెళ్లే రైలు నెంబర్ 58506 ప్యాసింజర్ను నిలిపివేశారు. అలాగే తిరుగు ప్రయాణంలో గుణుపూర్ నుంచి విశాఖపట్నం వచ్చే రైలు నెంబర్ 58505 ప్యాసింజర్ రైలును కూడా రద్దు చేస్తున్నట్లు అధికారులు స్పష్టం చేశారు.
గుణుపూర్ మార్గంతో పాటు పలాస రూట్లోనూ రైళ్ల రాకపోకలకు అంతరాయం ఏర్పడింది. నవంబర్ 20న విశాఖపట్నం నుంచి పలాస వెళ్లే రైలు నెంబర్ 67289 ప్యాసింజర్ రైలును రద్దు చేశారు. దీనికి తోడు తిరుగు ప్రయాణంలో పలాస నుంచి విశాఖపట్నం వచ్చే రైలు నెంబర్ 67290 ప్యాసింజర్ రైలును కూడా రేపు నడపడం లేదని దక్షిణ కోస్తా రైల్వే అధికారులు వెల్లడించారు. ఈ మార్గాల్లో నిత్యం ప్రయాణించే ఉద్యోగులు, సాధారణ ప్రయాణికులు ఈ మార్పును గమనించాల్సి ఉంది.
ప్యాసింజర్ రైళ్ల రద్దుతో పాటు సుదూర ప్రాంతాలకు వెళ్లే ఎక్స్ప్రెస్ రైలు మార్గంలోనూ కీలక మార్పులు చేశారు. నవంబర్ 20న విశాఖపట్నం నుంచి అమృత్సర్ వెళ్లే రైలు నెంబర్ 20807 హిరాకుడ్ ఎక్స్ప్రెస్ను దారి మళ్లించారు. ఈ రైలు సాధారణంగా వెళ్లే విజయనగరం, పలాస, ఖుర్దా రోడ్, తాల్చేర్, అంగుల్, సంబల్పూర్ మార్గానికి బదులుగా ప్రత్యామ్నాయ మార్గంలో నడవనుంది. దారి మళ్లింపు కారణంగా ఇది విజయనగరం, రాయగడ, టిట్లాగఢ్, సంబల్పూర్ మీదుగా తన ప్రయాణాన్ని కొనసాగిస్తుంది.
అక్వాన్ తీవ్ర తుపాను ప్రభావం వల్ల ప్రయాణికులకు ఎలాంటి ప్రమాదాలు తలెత్తకుండా ఉండేందుకే రైళ్ల రాకపోకల్లో ఈ కీలక మార్పులు చేసినట్లు దక్షిణ కోస్తా రైల్వే అధికారులు తెలిపారు. రద్దయిన రైళ్లు, దారి మళ్లించిన హిరాకుడ్ ఎక్స్ప్రెస్ వివరాలను ప్రయాణికులు ముందస్తుగా గమనించాలని కోరారు. చివరి నిమిషంలో అసౌకర్యానికి గురికాకుండా తమ ప్రయాణాలను ప్లాన్ చేసుకోవాలని, అవసరమైతే ప్రత్యామ్నాయ మార్గాలను ఎంచుకోవాలని రైల్వే శాఖ సూచించింది.

