సాధారణంగా గాయాలపై పసుపు, నూనె రాస్తే త్వరగా తగ్గుతుందని చాలామంది భావిస్తుంటారు. కానీ కుక్క కరిచినప్పుడు మాత్రం ఇలాంటి ప్రయోగాలు చేయకూడదని వైద్యులు సూచిస్తున్నారు. పసుపు, ఆవ నూనె, మట్టి వంటి పదార్థాలను గాయంపై పూయడం వల్ల ప్రయోజనం ఉండదు. పైగా గాయాన్ని సరిగ్గా శుభ్రం చేయకుండా ఇలాంటి చిట్కాలు పాటించడం వల్ల అసలైన చికిత్స ఆలస్యమవుతుంది. కుక్క కరిచిన వెంటనే చేయాల్సిన మొదటి పని గాయాన్ని శుభ్రం చేయడం. కరిచిన ప్రాంతాన్ని వెంటనే ప్రవహించే నీటి కింద ఉంచి, సబ్బుతో కలిపి కనీసం 15 నిమిషాల పాటు బాగా కడగాలి. ఇలా చేయడం వల్ల గాయంలోకి చేరిన కుక్క లాలాజలం, వైరస్ పరిమాణం తగ్గుతుందని డాక్టర్ జహీర్ అహ్మద్ తెలిపారు.
