భారత్‌లో ప్రీమియం స్కూటర్లకు మంచి అవకాశాలు
పియాజియో వెహికల్స్ ప్రైవేట్ లిమిటెడ్ చైర్మన్, మేనేజింగ్ డైరెక్టర్ డియాగో గ్రాఫీ ఈ కొత్త స్కూటర్ల గురించి మాట్లాడుతూ, భారత స్కూటర్ మార్కెట్లో ప్రీమియం మోడళ్లకు మరింత డిమాండ్ పెరిగే అవకాశం ఉందని చెప్పారు. వినియోగదారులు ఇప్పుడు కేవలం ప్రయాణానికి ఉపయోగపడే వాహనాలనే కాకుండా, ప్రత్యేకమైన అనుభవాన్ని ఇచ్చే స్కూటర్లను కోరుకుంటున్నారని తెలిపారు. భవిష్యత్తులో ప్రీమియం అర్బన్ మొబిలిటీ అంటే ఒక ప్రాంతం నుంచి మరో ప్రాంతానికి చేరుకోవడం మాత్రమే కాదని, ప్రయాణాన్ని ఎంత సౌకర్యవంతంగా, ఆసక్తికరంగా ఆస్వాదించగలమన్నది కూడా ముఖ్యమని ఆయన చెప్పారు. నేటి రైడర్లు పనితీరు, సౌకర్యం, టెక్నాలజీ, తమ వ్యక్తిత్వానికి తగ్గ ప్రత్యేకతలు ఉన్న వాహనాలను కోరుకుంటున్నారని వివరించారు. కొత్త ఏప్రిలియా ఎస్‌ఎక్స్‌ఆర్ జీటీ సిరీస్‌లో ఇటలీకి చెందిన ఏప్రిలియా డిజైన్, పనితీరు ప్రత్యేకతలను భారతీయుల రోజువారీ అవసరాలకు తగ్గట్టుగా అందించామని తెలిపారు. ప్రీమియం స్కూటర్ల విభాగంలో ఉన్న పాత పద్ధతులను సవాలు చేస్తూ, వినియోగదారుల అంచనాలను మరింత పెంచే కొత్త వాహనాలను తీసుకురావడమే తమ టూ వీలర్ వ్యాపార లక్ష్యమని డియాగో గ్రాఫీ చెప్పారు.
డిజైన్‌లో ప్రత్యేక ఆకర్షణ
కొత్త ఏప్రిలియా ఎస్‌ఎక్స్‌ఆర్ జీటీ స్కూటర్లను రోడ్డుపై ప్రత్యేకంగా కనిపించేలా రూపొందించారు. పెద్ద సైజు, ఆకర్షణీయమైన గ్రాఫిక్స్, అర్బన్ టూరింగ్ డిజైన్ వీటికి ప్రత్యేకమైన రూపాన్ని ఇస్తాయి. ప్రీమియం లుక్‌తో పాటు పనితీరుకు ప్రాధాన్యం ఇచ్చే స్కూటర్లుగా వీటిని రూపొందించారు. ఏప్రిలియా ప్రత్యేక గుర్తింపుగా నిలిచే ట్రైపాడ్ ఎల్‌ఈడీ ఫ్రంట్ లైట్ డిజైన్‌ను ఇందులో అందించారు. శక్తివంతమైన ఎల్‌ఈడీ లైట్లు ఉండటంతో సాయంత్రం, రాత్రి వేళల్లో రోడ్డు స్పష్టంగా కనిపిస్తుంది. దీనివల్ల చీకట్లో ప్రయాణించేటప్పుడు రైడర్లకు మరింత నమ్మకం కలుగుతుంది.
ఎస్‌ఎక్స్‌ఆర్ జీటీ సిరీస్‌లో ఇంతకుముందు చూడని ఆరు కొత్త కలర్ ఆప్షన్లను తీసుకొచ్చారు. ఆకర్షణీయమైన బాడీ గ్రాఫిక్స్‌తో పాటు వేర్వేరు రైడర్ల అభిరుచులకు తగ్గట్టుగా రంగులను అందించారు. ఏప్రిలియా ఎస్‌ఎక్స్‌ఆర్ జీటీ 125 మోడల్ మూడు రంగుల్లో లభిస్తుంది. వీటిలో మ్యాట్ బ్లాక్, గ్లోసీ అజ్జురో, గ్లోసీ వైట్ ఉన్నాయి. ఈ రంగులకు ప్రత్యేకమైన గ్రాఫిక్స్ జోడించడంతో స్కూటర్‌కు ప్రీమియం లుక్ వస్తుంది. తెలంగాణలో ఏప్రిలియా ఎస్‌ఎక్స్‌ఆర్ జీటీ 125 సీసీ మోడల్ ఎక్స్‌షోరూమ్ ధర రూ.1,10,374గా ఉంది. ఎస్‌ఎక్స్‌ఆర్ జీటీ 175 మోడల్‌లో కూడా మూడు ప్రత్యేక రంగులను అందించారు. మెటాలిక్ బ్లూ, మ్యాట్ బ్లాక్, మ్యాట్ గ్రీన్ రంగుల్లో ఈ స్కూటర్ లభిస్తుంది. ఈ రంగులు, గ్రాఫిక్స్ స్కూటర్‌కు ప్రత్యేకమైన రూపాన్ని ఇస్తాయి. 175 మోడల్‌లో ఫుట్‌బోర్డ్‌పై కూడా కొత్త గ్రాఫిక్స్ ఇచ్చారు. ఏప్రిలియా జీటీ సిరీస్ డిజైన్‌కు తగ్గట్టుగా వీటిని రూపొందించారు. తెలంగాణలో ఏప్రిలియా ఎస్‌ఎక్స్‌ఆర్ జీటీ 175 సీసీ మోడల్ ఎక్స్‌షోరూమ్ ధర రూ.1,30,374గా ఉంది.
శక్తివంతమైన ఇంజిన్‌తో మెరుగైన పనితీరు
కొత్త ఎస్‌ఎక్స్‌ఆర్ జీటీ సిరీస్‌లో మెరుగుపరిచిన ఎయిర్ కూల్డ్ ఇంజిన్‌ను అందించారు. ఇది 175 సీసీ హెచ్‌పీ-ఈ, 125 సీసీ హెచ్‌పీ-ఈ వేరియంట్లలో లభిస్తుంది. 125 సీసీ, 175 సీసీ ఇంజిన్లను మరింత మెరుగైన పవర్, టార్క్ అందించేలా అభివృద్ధి చేశారు. దీనివల్ల వేగం అందుకోవడం సులభమవుతుంది. రోజువారీ ప్రయాణాల్లోనే కాకుండా దూర ప్రయాణాల్లోనూ మెరుగైన పనితీరు, స్పందన లభించేలా రూపొందించారు. రోజూ స్కూటర్ ఉపయోగించే వినియోగదారుల అవసరాలకు తగ్గట్టుగా ఇంధన సామర్థ్యంపై కూడా దృష్టి పెట్టారు. ఎస్‌ఎక్స్‌ఆర్ జీటీ 175 సీసీ హెచ్‌పీ-ఈ ఇంజిన్ 7,200 ఆర్‌పీఎం వద్ద 9.76 కిలోవాట్ల పవర్‌ను ఉత్పత్తి చేస్తుంది. 6,000 ఆర్‌పీఎం వద్ద 14.14 ఎన్ఎం టార్క్‌ను అందిస్తుంది. ఎస్‌ఎక్స్‌ఆర్ జీటీ 125 సీసీ హెచ్‌పీ-ఈ ఇంజిన్ 7,400 ఆర్‌పీఎం వద్ద 7.8 కిలోవాట్ల పవర్‌ను ఉత్పత్తి చేస్తుంది. 6,200 ఆర్‌పీఎం వద్ద 10.4 ఎన్ఎం టార్క్‌ను అందిస్తుంది.
ఈ ఇంజిన్ పనితీరు వల్ల నగరంలో ప్రయాణించడంతో పాటు దూర ప్రయాణాల్లోనూ మంచి పనితీరును ఆశించవచ్చు. ప్రీమియం స్కూటర్‌కు అవసరమైన సౌలభ్యం, వివిధ రకాల రోడ్లపై ప్రయాణించే సామర్థ్యాన్ని కూడా కొనసాగించేలా దీన్ని రూపొందించారు. ఈ ఇంజిన్ బీఎస్-6 ఓబీడీ-2 స్టేజ్ బీ ప్రమాణాలకు అనుగుణంగా ఉంటుంది. ఈ20 ఇంధనంతోనూ పనిచేస్తుంది. అంటే మెరుగైన పనితీరుతో పాటు ప్రస్తుత పర్యావరణ ప్రమాణాలకు అనుగుణంగా ఉండేలా దీన్ని అభివృద్ధి చేశారు.
కొత్త ఎస్‌ఎక్స్‌ఆర్ జీటీ స్కూటర్లలో 14 అంగుళాల పెద్ద వీల్స్‌ను అందించారు. ఈ విభాగంలో ఇవి ప్రత్యేకతగా నిలుస్తాయని కంపెనీ తెలిపింది. పెద్ద వీల్స్ వల్ల స్కూటర్ రోడ్డుపై మరింత స్థిరంగా ఉంటుంది. హ్యాండ్లింగ్ మెరుగుపడటంతో పాటు రైడింగ్ కూడా సౌకర్యవంతంగా ఉంటుంది. రకరకాల రోడ్లపై ప్రయాణించేటప్పుడు మెరుగైన అనుభూతిని అందించడంలో ఇవి ఉపయోగపడతాయి. ముఖ్యంగా నగరంలో చిన్న చిన్న ప్రయాణాలకు మాత్రమే కాకుండా ఎక్కువ దూరం వెళ్లేటప్పుడు కూడా స్థిరత్వం, సౌకర్యం కీలకం. పెద్ద వీల్స్ వల్ల ఎక్కువసేపు ప్రయాణించినప్పుడు అలసట తగ్గేలా ఈ స్కూటర్‌ను రూపొందించారు.
ఆధునిక టెక్నాలజీతో 175 మోడల్
ఎస్‌ఎక్స్‌ఆర్ జీటీ 175 మోడల్‌లో టెక్నాలజీకి కూడా ప్రాధాన్యం ఇచ్చారు. ఇందులో 5 అంగుళాల ప్రీమియం టీఎఫ్‌టీ డిస్‌ప్లేను అందించారు. హ్యాండిల్‌బార్ కంట్రోల్స్‌లో అదనపు స్విచ్‌లను కూడా అమర్చారు. ఈ టీఎఫ్‌టీ స్క్రీన్‌పై రైడింగ్‌కు అవసరమైన ముఖ్యమైన సమాచారం, కనెక్టివిటీ వివరాలు స్పష్టంగా కనిపిస్తాయి. బ్లూటూత్ కనెక్టివిటీ, మ్యూజిక్ కంట్రోల్, కాల్ మేనేజ్‌మెంట్, నావిగేషన్ వంటి ఫీచర్లు ఉన్నాయి. దీంతో ప్రయాణంలోనే ఫోన్‌కు సంబంధించిన కొన్ని ఫీచర్లను ఉపయోగించుకోవచ్చు. తెలియని మార్గాల్లో ప్రయాణించేటప్పుడు దారి తెలుసుకోవడానికి టర్న్-బై-టర్న్ నావిగేషన్ కూడా ఉపయోగపడుతుంది. ఏ మలుపు వద్ద తిరగాలో దశలవారీగా తెలుసుకునే వీలుంటుంది. ఎస్‌ఎక్స్‌ఆర్ జీటీ 125 మోడల్‌లో 5 అంగుళాల ఎల్‌సీడీ డిస్‌ప్లేను అందించారు.
ఎస్‌ఎక్స్‌ఆర్ జీటీ 175 హెచ్‌పీ-ఈ మోడల్‌లో ముందు చక్రానికి ఏబీఎస్‌ను అందించారు. బ్రేకులు వేసేటప్పుడు నియంత్రణ మెరుగుపడటానికి ఇది ఉపయోగపడుతుంది. పెద్ద 14 అంగుళాల వీల్స్, ఫ్రంట్ డిస్క్ బ్రేక్, ఏబీఎస్ కలయికతో వివిధ రకాల రోడ్లపై ప్రయాణించేటప్పుడు రైడర్లకు మరింత నమ్మకం కలిగేలా రూపొందించారు. ఈ మోడల్‌లో వేడి నుంచి రక్షణ కల్పించే ప్రత్యేక ఏర్పాటుతో కొత్త మఫ్లర్‌ను కూడా అందించారు. ఇది స్కూటర్ పనితీరుకు అనుగుణంగా రూపొందించిన మరో ప్రత్యేకత. ఎస్‌ఎక్స్‌ఆర్ జీటీ 125 హెచ్‌పీ-ఈ మోడల్‌లో 220 మిల్లీమీటర్ల ఫ్రంట్ డిస్క్ బ్రేక్, 140 మిల్లీమీటర్ల వెనుక డ్రమ్ బ్రేక్ ఉన్నాయి. ఇవి సమర్థవంతమైన బ్రేకింగ్ కోసం ఉపయోగపడతాయి. మొత్తంగా ఈ స్కూటర్లలో నగర ప్రయాణాలకు అవసరమైన సౌలభ్యంతో పాటు వీకెండ్‌లో నగరం బయటకు దూర ప్రయాణాలు చేసేవారికి ఉపయోగపడే ఫీచర్లను అందించారు.
