తమన్ ఎస్ సంగీతం అందించగా, సిరాశ్రీ సాహిత్యాన్ని సమకూర్చారు. కనకదుర్గ అమ్మవారి దివ్య కృప, శక్తి, ఆధ్యాత్మిక ప్రాధాన్యాన్ని ఈ పాట ప్రతిబింబిస్తుంది. భక్తి, విశ్వాసం ప్రధానాంశాలుగా తెరకెక్కుతున్న ఈ చిత్ర కథలోని అంతర్లీన భావాన్ని పాట ద్వారా ప్రేక్షకులకు పరిచయం చేశారు.
కనకదుర్గ అమ్మవారి ప్రసిద్ధ ఆలయం ఉన్న విజయవాడకు ఆధ్యాత్మికంగా విశేష ప్రాధాన్యం ఉంది. ముఖ్యంగా నవరాత్రులు, భవానీ దీక్షల సమయంలో లక్షలాది మంది భక్తులు అమ్మవారిని దర్శించుకుంటారు. అలాంటి పవిత్ర నగరంలోనే ఈ పాటను విడుదల చేయడం విశేషంగా నిలిచింది. అమ్మవారిపై భక్తి సంప్రదాయానికి, చిత్ర సంగీత ప్రస్థానానికి ఈ కార్యక్రమం అనుసంధానంగా నిలిచింది.
సంగీత దర్శకుడు తమన్ ఎస్‌కు కనకదుర్గ అమ్మవారిపై ప్రత్యేక భక్తి ఉంది. ఆయన తరచూ విజయవాడకు వచ్చి అమ్మవారిని దర్శించుకుంటారు. ఈ నేపథ్యంలో ‘అమ్మ కనకదుర్గ’ పాటను వ్యక్తిగతంగా ఎంతో ప్రత్యేకంగా భావిస్తున్నట్లు తెలిపారు. భక్తుడు అమ్మవారిని ప్రార్థించే సమయంలో కలిగే భావోద్వేగాన్ని, అమ్మవారి దివ్యశక్తి, కరుణను స్వరాలు, సాహిత్యం ద్వారా ఆవిష్కరించేందుకు ప్రయత్నించినట్లు పేర్కొన్నారు.
బిర్లా స్టూడియోస్, టెంపుల్ టౌన్ పిక్చర్స్ నిర్మిస్తున్న ‘కనకదుర్గ’ చిత్రంలో అల్లరి నరేశ్, కాజల్ చౌదరి ప్రధాన పాత్రల్లో నటిస్తున్నారు. ప్రదీప్ మద్దాలి దర్శకత్వం వహిస్తుండగా, బీవీఎస్ రవి రచన అందించారు. భక్తి, పోరాటం, భావోద్వేగాలను మేళవిస్తూ అమ్మవారి ఆధ్యాత్మిక ప్రాధాన్యంతో కూడిన కథాంశంతో ఈ చిత్రాన్ని రూపొందిస్తున్నారు. తొలి పాట ద్వారా చిత్రంలోని భక్తి ప్రధానమైన అంశాన్ని ప్రేక్షకులకు పరిచయం చేశారు.
ఈ సినిమాలో తన పాత్ర కోసం అల్లరి నరేశ్ ప్రత్యేక క్రమశిక్షణను పాటించారు. చిత్రీకరణ సమయంలో భవానీ దీక్ష సంప్రదాయాలకు అనుగుణంగా మాంసాహారానికి, పాదరక్షలకు దూరంగా ఉన్నారు. విజయవాడలో నిర్వహించిన ప్రత్యేక కార్యక్రమంలో చిత్ర బృందం పాల్గొని పాటను ఆవిష్కరించింది. భక్తి, సంగీతానికి ప్రాధాన్యం ఇస్తూ చిత్ర ప్రచార కార్యక్రమాలను ప్రారంభించారు. ‘అమ్మ కనకదుర్గ’ పాట ప్రస్తుతం జీ మ్యూజిక్ కంపెనీ యూట్యూబ్ ఛానల్‌తో పాటు ప్రముఖ సంగీత ప్రసార వేదికల్లో అందుబాటులో ఉంది.
నటుడు అల్లరి నరేశ్ మాట్లాడుతూ.. “అమ్మవారి ఉత్సవాల సందర్భంగా విజయవాడకు రావడం చాలా సంతోషంగా ఉంది. మా నాన్న ఈవీవీ సత్యనారాయణ గారికి విజయవాడ కనకదుర్గ అమ్మవారంటే ఎంతో భక్తి. నేను విభిన్న కథాంశాలతో కూడిన సినిమాల్లో నటించినప్పటికీ, తొలిసారిగా ‘కనకదుర్గ’ అనే భక్తి చిత్రంలో నటిస్తున్నాను. అందుకే ఈ కార్యక్రమాన్ని విజయవాడలో నిర్వహించాలని నిర్ణయించుకున్నాం.
ఈ నవరాత్రుల్లో ఎక్కడ చూసినా వినిపించేలా ఒక పాటను స్వరపరచాలని తమన్ గారిని కోరాను. ఈ కార్యక్రమాన్ని సమన్వయం చేసిన బీవీఎస్ రవి గారికి, అజిత్ ఠాకూర్, సునీల్ చైనాని గార్లకు కృతజ్ఞతలు. దర్శకుడు ప్రదీప్ మద్దాలి, గేయరచయిత సిరాశ్రీ గారికి కూడా ధన్యవాదాలు. సినిమా చిత్రీకరణ పూర్తయింది. త్వరలో విడుదలకు సిద్ధమవుతోంది” అని తెలిపారు.
బిర్లా స్టూడియోస్ సహ నిర్మాత సునీల్ చైనాని మాట్లాడుతూ.. “కనకదుర్గ అమ్మవారిపై అపారమైన భక్తి ఉన్న విజయవాడలో, నవరాత్రుల శుభసందర్భంగా ‘అమ్మ కనకదుర్గ’ పాటను విడుదల చేయడం మాకు ఎంతో ప్రత్యేకం. తమన్ ఎస్ ఈ పాటకు అద్భుతమైన సంగీతాన్ని అందించారు. చిత్రానికి ప్రాణమైన భక్తి, ఆధ్యాత్మిక భావోద్వేగాలను తన స్వరాలతో చక్కగా ఆవిష్కరించారు. అమ్మవారి ఆలయ సన్నిధిలో ఆమెను కీర్తించే ఈ పాటను భక్తులకు పరిచయం చేస్తూ అమ్మవారి ఆశీస్సులు కోరుకుంటున్నాం” అని పేర్కొన్నారు.
టెంపుల్ టౌన్ పిక్చర్స్ నిర్మాతలు అజిత్ ఠాకూర్, బీవీఎస్ రవి మాట్లాడుతూ.. “అమ్మవారితో విజయవాడకు ఉన్న ఆధ్యాత్మిక అనుబంధం దృష్ట్యా ఇక్కడ ‘అమ్మ కనకదుర్గ’ పాటను విడుదల చేయడం మాకు ఎంతో ప్రత్యేకమైన సందర్భం. తమన్ ఎస్ సంగీతం, సిరాశ్రీ సాహిత్యం ద్వారా కనకదుర్గ అమ్మవారి భక్తిభావం, దివ్యశక్తి అద్భుతంగా ఆవిష్కృతమయ్యాయి. ఈ పాట భక్తుల హృదయాల్లో స్థానం సంపాదించడంతో పాటు వారి ప్రార్థనలు, పండుగ వేడుకల్లో భాగమవుతుందని ఆశిస్తున్నాం. విశ్వాసం, భక్తి ఆధారంగా రూపొందుతున్న ఈ కథను ప్రేక్షకుల ముందుకు తీసుకెళ్లే ప్రయాణంలో ఇది తొలి అడుగు” అని తెలిపారు.
జీ మ్యూజిక్ కంపెనీ చీఫ్ బిజినెస్ ఆఫీసర్ సుజల్ పరేఖ్ మాట్లాడుతూ.. “సంగీతం భిన్న సంస్కృతులు, భాషలు, తరాల ప్రజలను అనుసంధానించే శక్తి కలిగి ఉందని మేము విశ్వసిస్తాం. ‘అమ్మ కనకదుర్గ’ పాటలో కనకదుర్గ అమ్మవారి ఆధ్యాత్మిక ప్రాధాన్యం, భక్తి సంగీతంలోని శాశ్వతమైన గొప్పదనం కలిసివున్నాయి. ఈ పాటను ప్రేక్షకులకు అందించేందుకు బిర్లా స్టూడియోస్, టెంపుల్ టౌన్ పిక్చర్స్‌తో భాగస్వామ్యం కావడం ఆనందంగా ఉంది. ఈ నవరాత్రి వేడుకల్లో, భక్తుల సంగీత శ్రవణంలో ఈ పాట ప్రత్యేక స్థానాన్ని సంపాదిస్తుందని ఆశిస్తున్నాం” అని అన్నారు.
సంగీత దర్శకుడు తమన్ ఎస్ మాట్లాడుతూ.. “కనకదుర్గ అమ్మవారు నా హృదయంలో ఎప్పుడూ పవిత్రమైన స్థానాన్ని కలిగి ఉన్నారు. ‘అమ్మ కనకదుర్గ’ పాటకు సంగీతం అందించడం నాకు వ్యక్తిగతంగా ఎంతో సంతృప్తినిచ్చిన అనుభవం. ఇది కేవలం ఒక పాటగా మాత్రమే కాకుండా, భక్తుడు అమ్మవారిని ప్రార్థించే సమయంలో కలిగే గాఢమైన భావోద్వేగాన్ని, అమ్మవారి అపారమైన శక్తి, కరుణను ప్రతిబింబించాలని కోరుకున్నాను.
అమ్మవారిని దర్శించుకునేందుకు నేను తరచూ వచ్చే విజయవాడలో ఈ పాటను ఆవిష్కరించడం మరింత ప్రత్యేకంగా అనిపిస్తోంది. ఈ పాట ప్రతి భక్తుడి హృదయాన్ని చేరుకుని, వారి ప్రార్థనలు, వేడుకల్లో భాగమవుతుందని ఆశిస్తున్నాను” అని తెలిపారు. ‘అమ్మ కనకదుర్గ’ పాట జీ మ్యూజిక్ కంపెనీ యూట్యూబ్ ఛానల్‌తో పాటు ప్రముఖ సంగీత ప్రసార వేదికల్లో అందుబాటులో ఉంది.
