Last Updated:
రాత్రిపూట సుదూర ప్రయాణాలు చేసే వారికి భారతీయ రైల్వే కొత్త సౌకర్యాలను అందించేందుకు సిద్ధమవుతోంది. 24 కోచ్‌లతో రూపొందిస్తున్న వందే భారత్ స్లీపర్ రైలులో ప్రత్యేక సదుపాయాలు ఉండనున్నాయి.
Vande Bharat Sleeper Train: రాత్రిపూట సుదూర ప్రయాణాలు చేసే ప్రయాణికులకు మరింత సౌకర్యవంతమైన అనుభూతిని అందించేందుకు భారతీయ రైల్వే కొత్త ప్రణాళికలు సిద్ధం చేస్తోంది. ఇప్పటికే 16 కోచ్‌ల వందే భారత్ రైళ్లను రూపొందించిన రైల్వే.. ఇప్పుడు 24 కోచ్‌లతో కూడిన వందే భారత్ స్లీపర్ రైలును అందుబాటులోకి తీసుకురావడానికి కసరత్తు చేస్తోంది. చెన్నైలోని ఇంటిగ్రల్ కోచ్ ఫ్యాక్టరీ (ఐసీఎఫ్) ఈ రైలును తయారు చేస్తోంది. ఈ కొత్త నమూనా రూపకల్పనను వచ్చే నెల రోజుల్లో ఖరారు చేయాలని అధికారులు లక్ష్యంగా పెట్టుకున్నారు. 2027 జూన్ నాటికి రైలును పట్టాలపైకి తీసుకురావాలని నిర్ణయించారు. మొత్తం 50 రైలు సెట్ల తయారీ బాధ్యతను ఐసీఎఫ్‌కు అప్పగించారు.
24 కోచ్‌ల వందే భారత్ స్లీపర్ రైలులో ప్రత్యేకంగా ఏర్పాటు చేయనున్న అంతర్గత ప్యాంట్రీ కార్ ప్రధాన ఆకర్షణగా నిలవనుంది. టైమ్స్ ఆఫ్ ఇండియా కథనం ప్రకారం.. సుదూర, రాత్రి ప్రయాణాలను దృష్టిలో పెట్టుకుని ఈ సదుపాయాన్ని చేర్చుతున్నారు. ఐసీఎఫ్ వివరాల ప్రకారం, వందే భారత్ స్లీపర్‌లోని ఇతర నమూనాల్లో ఈ సౌకర్యం లేదు. కొత్త రైలులో ప్యాంట్రీ కార్ ఉండటంతో ప్రయాణికులకు రైలు లోపలే వేడివేడి ఆహారాన్ని అందించే అవకాశం ఉంటుంది. అంతేకాకుండా, కోచ్‌లలో మరిన్ని మరుగుదొడ్లను ఏర్పాటు చేయనున్నారు.
ప్రయాణికుల సౌకర్యాలకు ప్రాధాన్యం ఇస్తూ ఈ రైలులో విమానాల్లో ఉండే తరహాలో బయో-వాక్యూమ్ టాయిలెట్స్ ఏర్పాటు చేయనున్నారు. ఏసీ ఫస్ట్ క్లాస్ ప్రయాణికుల కోసం వేడి నీటితో షవర్ సదుపాయం కూడా అందుబాటులోకి రానుంది. దివ్యాంగ ప్రయాణికులు సులభంగా ఉపయోగించుకునేలా ప్రత్యేక మరుగుదొడ్లను రూపొందిస్తారు. చిన్నారులతో ప్రయాణించే తల్లిదండ్రుల అవసరాలను దృష్టిలో పెట్టుకుని బేబీ కేర్ స్టేషన్లను కూడా ఏర్పాటు చేయనున్నారు.
కొత్త వందే భారత్ స్లీపర్ రైలు రూపకల్పనలో యూరోపియన్ రైళ్ల నమూనాలను పరిగణనలోకి తీసుకున్నారు. ప్రయాణికులు హాయిగా విశ్రాంతి తీసుకునేందుకు మెత్తని, సౌకర్యవంతమైన బెర్తులను అందించనున్నారు. పై బెర్తులపైకి సులభంగా చేరుకునేలా మెట్ల రూపకల్పనలోనూ మార్పులు చేస్తున్నారు.
కోచ్‌ల మధ్య రాకపోకలు సాగించేందుకు ఆటోమేటిక్ అనుసంధాన తలుపులు, పూర్తిగా మూసివేసిన మార్గాలను ఏర్పాటు చేయనున్నారు. వీటివల్ల రైలులో ఉష్ణోగ్రత నియంత్రణకు సహాయపడటంతో పాటు బయట దుమ్ము, శబ్దం లోపలికి రాకుండా అడ్డుకోవచ్చు. ప్రతి బెర్తు వద్ద వ్యక్తిగత రీడింగ్ లైట్, ఛార్జింగ్ పాయింట్, మడతపెట్టే టేబుల్ వంటి సదుపాయాలు ఉంటాయి. ఈ మార్పులతో సుదూర రాత్రి ప్రయాణాలను మరింత సౌకర్యవంతంగా మార్చాలని రైల్వే భావిస్తోంది.
