Last Updated:
ఓటర్ల జాబితాల ప్రత్యేక సమగ్ర సవరణ (SIR) ప్రక్రియపై రాజకీయ వివాదం మరో కీలక మలుపు తీసుకుంది. ఈ ప్రక్రియలో అక్రమాలు జరిగాయంటూ కాంగ్రెస్ అగ్రనేత రాహుల్ గాంధీ సుప్రీంకోర్టును ఆశ్రయించారు.
ఓటర్ల జాబితాల ప్రత్యేక సమగ్ర సవరణ (ఎస్‌ఐఆర్‌) ప్రక్రియలో అక్రమాలు జరిగాయంటూ కాంగ్రెస్ అగ్రనేత, లోక్‌సభలో ప్రతిపక్ష నేత రాహుల్ గాంధీ సుప్రీంకోర్టును ఆశ్రయించారు. భారత ఎన్నికల సంఘం (ఈసీఐ) చేపట్టిన ఈ ప్రక్రియను సవాలు చేస్తూ సోమవారం, అక్టోబర్‌ 12న రిట్ పిటిషన్ దాఖలు చేశారు. ఎన్నికల సంఘం పనితీరుపై కాంగ్రెస్ నేతృత్వంలోని ప్రతిపక్షాలు నిరసనలు కొనసాగిస్తున్న వేళ ఈ పరిణామం చోటుచేసుకుంది. ప్రధాన ఎన్నికల కమిషనర్‌ జ్ఞానేశ్‌ కుమార్‌ రాజీనామా చేయాలన్న డిమాండ్‌తోనూ విపక్షాలు ఆందోళన చేస్తున్నాయి.
ఎస్‌ఐఆర్‌ ప్రక్రియపై తమ అభ్యంతరాలను వివరించేందుకు సుప్రీంకోర్టు ప్రధాన న్యాయమూర్తి జస్టిస్‌ సూర్యకాంత్‌ను కలవాలని రాహుల్ గాంధీ, రాజ్యసభలో ప్రతిపక్ష నేత, కాంగ్రెస్ అధ్యక్షుడు మల్లికార్జున ఖర్గే కోరారు. ఈ ప్రక్రియపై ఆందోళనలు, ఎన్నికల ప్రధాన కమిషనర్‌ రాజీనామా డిమాండ్‌తో కూడిన వినతిపత్రాన్ని సమర్పించాలనుకున్నారు. అయితే, భేటీకి సీజేఐ అంగీకరించలేదు. న్యాయపరమైన అంశాలపై కోర్టును సాధారణ పిటిషనర్‌ మాదిరిగా ఆశ్రయించాలని సూచించినట్లు సమాచారం. దీంతో వినతిపత్రం సమర్పించాలన్న ప్రణాళికను మార్చుకుని, అధికారికంగా న్యాయస్థానాన్ని ఆశ్రయించాలని నేతలు నిర్ణయించారు.
సోమవారం రాహుల్ గాంధీ, ప్రియాంక గాంధీ వాద్రా, కాంగ్రెస్, ఇండియా కూటమికి చెందిన ఇతర నాయకులు, వేలాది మంది మద్దతుదారులతో కలిసి సుప్రీంకోర్టు వైపు మార్చ్ నిర్వహించారు. కనాట్‌ ప్లేస్‌ నుంచి కోర్టు వరకు చేపట్టిన ఈ మార్చ్‌కు ‘చలో ఢిల్లీ’ అని పేరు పెట్టారు. ప్రజాస్వామ్యం, న్యాయం కోసం ఈ మార్చ్ నిర్వహిస్తున్నట్లు రాహుల్ గాంధీ ఎక్స్‌ వేదికగా ప్రకటించారు. ఎన్నికల సంఘం పనితీరును నిరసిస్తూ, ఓటర్ల జాబితాల్లో అక్రమాలు జరిగాయన్న ఆరోపణలపై చర్యలు తీసుకోవాలని విపక్షాలు డిమాండ్‌ చేశాయి.
‘రాహుల్ గాంధీ వర్సెస్‌ ఎలక్షన్‌ కమిషన్‌ ఆఫ్‌ ఇండియా’ పేరుతో ఈ కేసు నమోదైంది. అడ్వకేట్‌ ఆన్‌ రికార్డ్‌ ఎస్‌. ప్రసన్న ద్వారా పిటిషన్ దాఖలైంది. కోర్టు ఫైలింగ్‌ కౌంటర్‌ మూసివేయడానికి కొద్దిసేపు ముందు ఈ ప్రక్రియ పూర్తయినట్లు సమాచారం. వ్యక్తిగతంగా పిటిషన్ దాఖలు చేసేందుకు గడువు పొడిగించాలని రాహుల్ న్యాయబృందం సుప్రీంకోర్టు రిజిస్ట్రీని కూడా సంప్రదించినట్లు తెలుస్తోంది.
ప్రతి భారత పౌరుడికి సుప్రీంకోర్టును ఆశ్రయించే హక్కు ఉందని, న్యాయస్థానం తలుపులు అందరికీ తెరిచే ఉన్నాయని సీజేఐ సూర్యకాంత్‌ సోమవారం పేర్కొన్నారు. రాహుల్ గాంధీ, మల్లికార్జున ఖర్గే దాఖలు చేసిన పిటిషన్‌లోని పూర్తి అభ్యర్థనలు, కోరిన ఉపశమన వివరాలు ఇంకా వెల్లడికావాల్సి ఉంది.
