2026 సంవత్సరం ముగిసే నాటికి పసిడి ధరల పయనం ఎలా ఉండబోతోందన్న దానిపై ఎల్బీఎంఏ ప్రపంచవ్యాప్తంగా ఉన్న పలువురు ప్రముఖ ఆర్థిక విశ్లేషకుల అభిప్రాయాలను సేకరించి ఈ నివేదికను రూపొందించింది. ఈ సర్వేలో కేవలం ధరలు పెరిగే సానుకూల అంశాలనే కాకుండా, మార్కెట్ పడిపోయే ప్రతికూల పరిస్థితులను కూడా పరిగణనలోకి తీసుకున్నారు. ఈ విశ్లేషకులు అందించిన అంచనాల ప్రకారం, 2026 నాటికి ఔన్సు బంగారం ధర అత్యల్పంగా $3,450 నుండి అత్యధికంగా $7,150 మధ్య ఊగిసలాడే అవకాశం ఉంది. గరిష్ట స్థాయి అంచనాలకు భిన్నంగా, చాలా మంది విశ్లేషకుల ఉమ్మడి సగటు అంచనా ప్రకారం 2026లో ఔన్సు బంగారం సగటు ధర సుమారు $4,742 డాలర్ల వద్ద స్థిరపడవచ్చని భావిస్తున్నారు. గరిష్ట అంచనాకు, సగటు అంచనాకు మధ్య ఉన్న ఈ భారీ వ్యత్యాసం, రాబోయే రోజుల్లో మార్కెట్లో ఉండబోయే తీవ్రమైన ఒడిదుడుకులను సూచిస్తోంది.
