Last Updated:
స్మార్ట్‌ఫోన్‌తో పొలం కొలతలు.. నేరుగా ఇంటికే ఎరువులు.. మందులు కొనచ్చు, బోర్ వేయాలన్నా బుక్ చేసుకోవచ్చు. అదిరిపోయే యాప్.
అన్నదాతల కష్టాలను తీర్చేందుకు సాంకేతిక పరిజ్ఞానం రోజురోజుకూ కొత్త పుంతలు తొక్కుతోంది. వ్యవసాయ రంగంలో నిత్యం ఎదురయ్యే సవాళ్లకు చెక్ పెడుతూ, వ్యవసాయాన్ని మరింత లాభసాటిగా మార్చే దిశగా రైతన్నలకు అండగా నిలిచేందుకు ముగ్గురు యువ ఇంజనీరింగ్ విద్యార్థులు వినూత్న ఆవిష్కరణతో ముందుకొచ్చారు. గుజరాత్ రాష్ట్రంలోని ప్రసిద్ధ పారుల్ యూనివర్సిటీలో బీటెక్ చివరి సంవత్సరం అభ్యసిస్తున్న శివారెడ్డి (కడప), మధులత (ఏలూరు), అనూష (విజయనగరం) బృందంగా ఏర్పడి ‘రైతువాయిస్’ (RythuVoice) పేరుతో ఒక అద్భుతమైన అగ్రికల్చర్ యాప్‌ను రూపొందించారు. కేవలం తరగతి గది చదువులకే పరిమితం కాకుండా తమ సాంకేతిక జ్ఞానాన్ని సమాజానికి, ముఖ్యంగా గ్రామీణ వ్యవసాయ రంగానికి ఉపయోగపడేలా వీరు చేసిన ఈ గొప్ప కృషి సర్వత్రా ప్రశంసలు అందుకుంటోంది.
న్యూస్18 ప్రతినిధి మస్తాన్ వలీతో శివారెడ్డి యాప్‌కు సంబంధించిన పలు అంశాలు వెల్లడించారు. వ్యవసాయ రంగంలో విప్లవాత్మక మార్పులు తీసుకురావాలనే ఏకైక లక్ష్యంతో ఈ బృందం సుమారు తొమ్మిది నెలల పాటు శ్రమించింది. తమ సొంత నిధులు రూ.1.8 లక్షల పెట్టుబడితో ఈ మొబైల్ అప్లికేషన్‌ను పూర్తి స్థాయిలో అభివృద్ధి చేసి, సరిగ్గా రెండు నెలల క్రితం అధికారికంగా రైతుల వినియోగానికి లాంచ్ చేశారు. ప్రాంతీయ భాషల ప్రాధాన్యతను దృష్టిలో ఉంచుకుని తెలుగు, హిందీ, ఇంగ్లీష్ భాషల్లో సమర్థవంతంగా పనిచేసేలా బహుభాషా వాయిస్ కమాండ్ సదుపాయాన్ని ఇందులో పొందుపరిచారు. స్మార్ట్ ఫోన్ వాడకం అంతగా తెలియని, చదువురాని రైతులు కూడా కేవలం తమ వాయిస్ ద్వారా యాప్‌ను సులభంగా ఆపరేట్ చేస్తూ కావలసిన సమాచారాన్ని వెంటనే పొందేలా ఈ ఆధునిక సాంకేతికతను తీర్చిదిద్దారు.
సాగులో రైతులు ఎదుర్కొనే సమస్యలకు ఈ ‘రైతువాయిస్’ యాప్లో పరిష్కారం దొరుకుతుంది. వివిధ పంటలను ఆశించే తెగుళ్లు, వాటి నివారణ చర్యలతో పాటు ఎప్పటికప్పుడు తాజా వాతావరణ అప్‌డేట్స్, స్థానిక మార్కెట్లో విభిన్న పంటల ధరల వివరాలను రైతులు సులభంగా తెలుసుకోవచ్చు. ప్రభుత్వం అందించే అగ్రికల్చర్ మార్కెట్‌ డేటా ద్వారా ప్రతి రోజూ ఉదయం 9 గంటలకు పంటల ధరలు అప్‌డేట్ అవుతాయి. స్మార్ట్ ఫోన్ ద్వారా పొలం విస్తీర్ణాన్ని కచ్చితంగా కొలవడం, పంటకు అవసరమైన ఎరువులను నేరుగా ఆన్‌లైన్‌లో ఆర్డర్ చేసుకోవడం లాంటి అత్యాధునిక సదుపాయాలను ఇందులో అందించారు. మారుతున్న కాలానికి అనుగుణంగా ఆధునిక వ్యవసాయానికి అవసరమైన ట్రాక్టర్లు, ఇతర వ్యవసాయ యంత్రాలు, పనిముట్లను కొనుగోలు చేయడానికి కూడా ఈ ప్లాట్‌ఫామ్ ఒక అద్భుతమైన ఈ-కామర్స్ వేదికగా ఉపయోగపడుతుంది.
క్షేత్రస్థాయిలో ఉండే స్థానిక ఎరువుల దుకాణాలు, వ్యవసాయ నిపుణుల కన్సల్టేషన్ సేవలు, పురుగుమందులు పిచికారీ చేసే డ్రోన్ ఆపరేటర్లు, పాడి రైతులు, బోరుబావుల తవ్వకం ఏజెన్సీలు కూడా ఈ యాప్లో రిజిస్టర్ చేసుకోవచ్చు. రైతులు ఆర్డర్ చేసిన వస్తువులు, ఎరువులను నేరుగా వారి ఇండ్ల వద్దకే వేగంగా చేర్చేందుకు వీలుగా ఒక ప్రత్యేకమైన డెలివరీ నెట్‌వర్క్‌ను సైతం వీరు బలంగా ఏర్పాటు చేస్తున్నారు.
మార్కెట్లో మంచి స్పందన తెచ్చుకుంటున్న ఈ వినూత్న యాప్ మరింత ఉన్నత స్థాయికి తీసుకెళ్లేందుకు వీరు పెట్టుబడుల వేట ప్రారంభించారు. తెలంగాణ రాష్ట్ర రాజధాని హైదరాబాద్‌లోని ప్రతిష్టాత్మక స్టార్టప్ ఇంక్యుబేటర్ టీ-హబ్ (T-Hub) ద్వారా ఏకంగా కోటి రూపాయల ఫండింగ్ సాధించాలని ఈ బృందం లక్ష్యంగా పెట్టుకుంది. ఫండింగ్ లభిస్తే.. భవిష్యత్తులో తమ యాప్ సేవలను దేశవ్యాప్తంగా విస్తరించి లక్షలాది మంది రైతులకు సాంకేతిక అండదండలు అందించాలని ఈ యువ ఇంజనీర్లు ప్రణాళికలు సిద్ధం చేస్తున్నారు. గూగుల్ ప్లేస్టోర్ నుంచి ఈ యాప్ డౌన్‌లోడ్ చేసుకోవచ్చు.
