ఆంధ్రప్రదేశ్‌లో 2025–26 పంట సీజన్‌కు సంబంధించిన FCV పొగాకు వేలం మార్చి 25, 2026న ప్రారంభమయ్యాయి. ఇప్పటివరకు సుమారు 100 మిలియన్ కిలోల అంటే దాదాపు 10 కోట్ల కిలోల FCV పొగాకు వేలం జరిగినట్లు కేంద్రం వెల్లడించింది. ఈ పంటకు సంబంధించిన కొనుగోళ్లు, మార్కెటింగ్ ప్రక్రియలో వేలం ప్లాట్‌ఫారమ్‌లు కీలక పాత్ర పోషిస్తాయి. ఫ్లూ-క్యూర్డ్ వర్జీనియా పొగాకును ప్రధానంగా ఆంధ్రప్రదేశ్, కర్ణాటక రాష్ట్రాల్లో సాగు చేస్తారు. ముఖ్యంగా ఆంధ్రప్రదేశ్‌లో ఈ పంటపై ఆధారపడే రైతుల సంఖ్య గణనీయంగా ఉండటంతో, మార్కెట్ పరిస్థితులు మారినప్పుడు ధరలు, కొనుగోళ్లు, రైతుల నగదు ప్రవాహంపై ప్రభావం పడే అవకాశం ఉంటుంది. ప్రస్తుతం ప్రపంచ పొగాకు మార్కెట్‌లో కూడా మార్పులు చోటుచేసుకుంటున్నాయని కేంద్రం తెలిపింది. అంతర్జాతీయంగా పొగాకుకు ఉన్న డిమాండ్‌లో మార్పులు, భౌగోళిక రాజకీయ పరిణామాలు, అంతర్జాతీయ వాణిజ్య పరిస్థితుల్లో వస్తున్న మార్పులు పొగాకు సేకరణ, మార్కెటింగ్‌పై ప్రభావం చూపుతున్నాయని పేర్కొంది.
