మిస్టర్ మిడిల్ క్లాస్ రివ్యూ.. శ్రీకాంత్, రాజేంద్రప్రసాద్ మళ్ళీ పాత రోజుల్లోకి తీసుకెళ్లారులే..! | తెలుగు సినిమా వార్తలు

వెంకటరమణ (శ్రీకాంత్) ఒక సగటు మధ్యతరగతి కుటుంబీకుడు, అలాగే శ్రీవారికి పరమ భక్తుడు. భార్య పద్మావతి (లయ), పిల్లలు, వృద్ధ తండ్రి (మురళీధర్ గౌడ్), ఇతర కుటుంబ సభ్యులతో కలిసి ఒక హోటల్ నడుపుకుంటూ జీవిస్తుంటాడు. మరింత ఎదగాలనే అత్యాశతో పెద్ద రెస్టారెంట్ పెట్టి అప్పుల పాలవుతాడు. కట్టాల్సిన అప్పులు, పిల్లల ఫీజులు, ఇంటి ఖర్చులతో సతమతమవుతూ.. ఒకానొక దశలో విరక్తి చెంది తనకు ఇష్టమైన వేంకటేశ్వర స్వామినే నిందిస్తాడు. భక్తుడి ఆవేదన విన్న స్వామి (రాజేంద్రప్రసాద్) ప్రత్యక్షమై, కోరినట్లుగా కొన్ని నగలు ఇస్తాడు. అయితే అవి నకిలీవి (గిల్టీ నగలు) అనుకుని కుటుంబ సభ్యులు చెరువులో పారేయడంతో కథ మలుపు తిరుగుతుంది.

దర్శకుడు జి. నాగేశ్వరరెడ్డి తనకి అలవాటైన కామెడీ శైలిలోనే ఈ చిత్రాన్ని తెరకెక్కించారు. 2000-2010 దశకంలో వచ్చిన సోషియో ఫాంటసీ, ఫ్యామిలీ ఎమోషన్ కనిపించినా ఆడియన్స్ మాత్రం ఎంగేజ్ అయ్యేలా కథను ప్రెజెంట్ చేశారు. పాత జ్ఞాపకాలను గుర్తుచేసే ఫ్యామిలీ ఎంటర్‌టైనర్ ఇది. సినిమా ప్రారంభంలోనే మధ్యతరగతి కష్టాలు చూపిస్తూ ప్రేక్షకులను ఎమోషనల్‌గా కనెక్ట్ చేసిన దర్శకుడు, దేవుడి ఎంట్రీతో కామెడీ ట్రాక్ లోకి టర్న్ తీసుకున్నాడు. ఇంటర్వెల్ బ్యాంగ్ ఆసక్తికరంగా ఉంది. ఇంటర్వెల్ తర్వాత వచ్చే సన్నివేశాలు సగటు ప్రేక్షకుడికి బాగా కనెక్ట్ అవుతాయి. సెకండాఫ్ మొదట్లో కొద్దిపాటి స్లో నేరేషన్ అనిపించినా మనుషుల అత్యాశ, డబ్బు చుట్టూ తిరిగే సీన్స్ బాగా అల్లుకున్నారు.  వెన్నెల కిషోర్ చేసిన ‘అఖండ’ స్పూఫ్ థియేటర్లలో నవ్వులు పూయిస్తుంది. క్లైమాక్స్‌లో “ఎంత డబ్బు వచ్చినా దేవుని నిర్ణయమే అంతిమం” అనే ఒక మంచి సందేశంతో పాటు, పార్ట్-2 కు సంబంధించిన లీడ్ కూడా ఇవ్వడం విశేషం.

మధ్యతరగతి తండ్రిగా శ్రీకాంత్ తనదైన సహజ నటనతో ఆకట్టుకోగా, చాలా కాలం తర్వాత తెలుగు తెరపై కనిపించిన లయ.. భార్య పాత్రలో ఒదిగిపోయింది. రాజేంద్రప్రసాద్ స్వామివారి పాత్రలో ఎలాంటి ఆడంబరాలు లేకుండా హుందాగా కనిపించి పాత దేవుళ్ల సినిమాలను గుర్తుచేశారు. సునీల్ నెగెటివ్ ఛాయలున్న గెస్ట్ రోల్‌లో, ధనరాజ్ యముడి పాత్రలో మెప్పించారు. అలీ, మురళీధర్ గౌడ్, రఘుబాబు తమ కామెడీతో అలరించారు.