Last Updated:
India US Trade Deal: భారత్-అమెరికా మధ్య వాణిజ్య ఒప్పందంపై కీలక పరిణామం చోటుచేసుకుంది. ఒప్పందానికి సంబంధించి పరిష్కరించాల్సిన అంశాలు కొన్నే మిగిలాయని, ఇరుదేశాలు తుది దశకు చేరుకున్నాయని అమెరికా విదేశాంగ కార్యదర్శి మార్కో రూబియో వెల్లడించారు. త్వరలోనే ఒప్పందంపై ప్రకటన వెలువడటంతో పాటు సంతకాలు జరిగే అవకాశం ఉందని ఆశాభావం వ్యక్తం చేశారు.
భారత్, అమెరికా మధ్య వాణిజ్య ఒప్పందం త్వరలోనే ఖరారయ్యే అవకాశం ఉందని అమెరికా విదేశాంగ కార్యదర్శి మార్కో రూబియో తెలిపారు. ఒప్పందానికి సంబంధించి కొన్ని అంశాలు మాత్రమే పరిష్కరించాల్సి ఉందని, ఇరుదేశాలు తుది ఒప్పందానికి చేరువయ్యాయని మంగళవారం ఆయన వెల్లడించారు. త్వరలోనే ఒప్పందంపై ప్రకటన వెలువడటంతో పాటు, సంతకాలు కూడా జరిగే అవకాశం ఉందని ఆశాభావం వ్యక్తం చేశారు.
భారత విదేశాంగ మంత్రి ఎస్. జైశంకర్‌తో చర్చలు జరిపేందుకు ముంబైకి వచ్చిన రూబియో ఈ వ్యాఖ్యలు చేశారు. భారత్, అమెరికా మధ్య చర్చలు దాదాపు తుది దశకు చేరుకున్నాయని ఆయన పేర్కొన్నారు. “ఒప్పందంపై ఇంకా సంతకాలు చేయలేదు. అయినప్పటికీ, సాధ్యమైనంత దగ్గరగా ఉన్నాం. పరిష్కరించాల్సిన కొన్ని అంశాలు మాత్రమే మిగిలి ఉన్నాయి. త్వరలోనే ఈ ప్రక్రియ పూర్తవుతుందని భావిస్తున్నాం” అని రూబియో తెలిపారు. త్వరలోనే కొన్ని శుభవార్తలు వెల్లడించి, ఆ తర్వాత ఒప్పందంపై సంతకాలు చేయగలమని వాషింగ్టన్ ఆశిస్తోందని చెప్పారు. అమెరికా విదేశాంగ శాఖ నేరుగా వాణిజ్య ఒప్పందాలపై చర్చలు జరపకపోయినా, ఈ ప్రక్రియలో కీలకంగా పాలుపంచుకుంటోందని రూబియో వివరించారు. తాను, అమెరికా జాతీయ భద్రతా సలహాదారు ఈ చర్చలను దగ్గరగా పర్యవేక్షిస్తున్నామని తెలిపారు. త్వరలోనే భారత్‌తో వాణిజ్య ఒప్పందం కుదురుతుందనే నమ్మకం తమకు ఉందని ఆయన పేర్కొన్నారు.
భారత్‌లోని అమెరికా రాయబారి సెర్గియో గోర్ కూడా చర్చల పురోగతిపై ఆశాభావం వ్యక్తం చేశారు. అక్టోబర్ 15న న్యూఢిల్లీలో జరిగిన బ్లూమ్‌బెర్గ్ న్యూ ఎకానమీ ఫోరమ్‌లో మాట్లాడుతూ, ఒప్పందానికి సంబంధించిన ప్రధాన అంశాలు ఇప్పటికే పరిష్కారమయ్యాయని చెప్పారు. “ఒప్పందానికి సంబంధించిన విస్తృత చట్రం, ప్రధాన అంశాలపై పని పూర్తయింది” అని పేర్కొన్నారు. ఇరుదేశాల మధ్య చర్చలు వేగంగా సాగుతున్నాయని, వాణిజ్య ఒప్పందం ఖరారవుతుందనే నమ్మకం తనకు ఉందని తెలిపారు.
రష్యా చమురుపై సుంకాల విషయంలో తాత్కాలిక ఊరట..
భారత్-అమెరికా వాణిజ్య చర్చలు కీలక దశకు చేరుకున్న తరుణంలో రష్యా చమురు కొనుగోళ్ల అంశం కూడా ప్రాధాన్యం సంతరించుకుంది. రష్యా నుంచి చమురు కొనుగోలు చేసే దేశాలపై శిక్షాత్మక సుంకాలు విధించేందుకు అమెరికా అధ్యక్షుడు డొనాల్డ్ ట్రంప్ ప్రభుత్వానికి అవకాశం కల్పించే చట్టంలోని కొన్ని నిబంధనల అమలును ఇటీవల 60 రోజుల పాటు నిలిపివేశారు. ఈ నిర్ణయం భారత్‌కు తాత్కాలిక ఊరటనిచ్చింది.
గత శుక్రవారం ప్రకటించిన ఈ మినహాయింపు ప్రకారం, ప్రతిపాదిత చర్యల వల్ల అమెరికా, ప్రపంచ ఆర్థిక వ్యవస్థలపై ఎలాంటి ప్రభావం పడుతుందో అంచనా వేసేందుకు వాషింగ్టన్‌కు సమయం లభిస్తుంది. రష్యా చమురు కొనుగోలు చేసే దేశాల నుంచి దిగుమతి చేసుకునే వస్తువులపై 100 శాతం వరకు సుంకాలు విధించే అవకాశం ఉండటంతో, ఈ ప్రతిపాదన భారత్ ఇంధన దిగుమతులు, ద్వైపాక్షిక వాణిజ్య చర్చలపై ఒత్తిడి పెంచే అంశంగా మారింది. ఇంధన సరఫరాలు, ప్రపంచ ఆర్థిక పరిస్థితులు, అమెరికా వాణిజ్య భాగస్వాముల ప్రయోజనాలను పరిగణనలోకి తీసుకుని సుంకాలు, ఆంక్షల ప్రభావాలను సమీక్షించేందుకు ఈ విరామం ఉపయోగపడుతుందని రూబియో తెలిపారు. ఈ అంశాలపై సమగ్రంగా పరిశీలించిన తర్వాత తదుపరి నిర్ణయాలు తీసుకునే అవకాశం ఉందని వివరించారు.
రష్యా ఇంధనంపై ఆధారపడుతున్న దేశాలు తమ సరఫరా వ్యవస్థలను మార్చుకోవడానికి సమయం అవసరమని అమెరికా రాయబారి సెర్గియో గోర్ అంగీకరించారు. భారత్ రాత్రికి రాత్రే రష్యా చమురు కొనుగోళ్లను పూర్తిగా నిలిపివేస్తుందని అమెరికా ఆశించడం లేదని ఆయన స్పష్టం చేశారు. “ఎవరినీ శిక్షించడం మా లక్ష్యం కాదు. రష్యా-ఉక్రెయిన్ యుద్ధాన్ని ముగించేందుకు సహకరించడమే ఆంక్షల ఉద్దేశం” అని గోర్ గత వారం తెలిపారు. రష్యా ఇంధనంపై ఆధారపడుతున్న దేశాలు ప్రత్యామ్నాయ సరఫరా మార్గాలకు మారడానికి సమయం పడుతుందని ట్రంప్ అర్థం చేసుకున్నారని చెప్పారు. దేశాలు తమ ఇంధన అవసరాలను ఒక్కసారిగా మార్చుకోవాలని అమెరికా ఆశించడం లేదని వివరించారు.
భారత్ ఇప్పటికే తన ఇంధన వనరులను వైవిధ్యపరచుకునే దిశగా పురోగతి సాధించిందని రూబియో గతంలో పేర్కొన్నారు. అయితే, ఇంధన సరఫరాదారులను వెంటనే మార్చడం సాధ్యం కాకపోవడంతో భారత్ రష్యా నుంచి గణనీయమైన మొత్తంలో చమురును దిగుమతి చేసుకుంటోందని తెలిపారు. భారత్‌ను అమెరికాకు ముఖ్యమైన మిత్రదేశంగా అభివర్ణించిన రూబియో, ఆంక్షలు, సుంకాల ప్రభావాలను అంచనా వేసేటప్పుడు ఇంధన అవసరాలు, విస్తృత ఆర్థిక ప్రయోజనాలను కూడా పరిగణనలోకి తీసుకోవాల్సి ఉంటుందని చెప్పారు. భారత్‌కు అవసరమైన ఇంధనంలో కొంత భాగాన్ని అమెరికా సరఫరా చేయగలదనే అభిప్రాయాన్ని వాషింగ్టన్ వ్యక్తం చేసింది.
